Daniel i Bur Labwor
Ododo 79
Daniel i Bur Labwor
AH, AH! Nen calo Daniel tye i twon peko madit. Ento lwak labwor-ri pe gitye ka wanne! In ngeyo pingo? Anga ma oketo Daniel kany kacel ki labwor magi? Kong wanenu.
Kabaka me Babilon kombeddi dong obedo laco ma kilwongo ni Dario. En maro Daniel tutwal pien Daniel lakica mada dok ryek. Dario oyero Daniel me bedo laloc madit i kerre. Man omiyo jo mukene i ker-ri odoko nyek i kom Daniel, pi meno, man aye gin ma gutimo.
Gin gucito bot Dario ci guwaco ni: ‘Ai kabaka, wan waye ni in omyero iket cik ma waco ni pi nino 30 ngat mo myero pe oleg bot lubanga mo nyo dano mo kono ka boti keken, Ai Kabaka. Ka ngat mo pe olubo, ci omyero kibole i bur i kin labwor.’ Dario pe ngeyo pingo jo magi gimito ni kiket cik man. Ento en otamo ni obedo tam maber, pi meno en oketo cik-ki woko i coc. Cik man dong pe kitwero lokone.
I kare ma Daniel ongeyo pi cik man, en ocito paco ci olego, kit ma en yam timo con. Jo ma kitgi raco-ni gingeyo ni Daniel pe obiweko lega bot Jehovah. Gin cwinygi yom, pien nen ni tamgi me neko Daniel-li tye ka tic.
I kare ma Kabaka Dario ongeyo pingo joni gimito keto cik man, cwinye oton tutwal. Ento en pe twero loko cik-ki, pi meno omyero en omi cik wek kibol Daniel i bur labwor. Ento kabaka owaco ki Daniel ni: ‘An ageno ni Lubangani, ma in itiyo pire-ni, bikonyi.’
Cwiny Dario owang ma pe twero nino i dyewor meno. Orwone odiko en oringo i dog bur pa labwor-ri. Itwero neno en kuca ca. En odangnge ni: ‘Daniel, latic Lubanga makwo! Lubanga ma itiyo pire-ni olari ki i dog lwak labwor magi?’
‘Daniel ogamo ni: ‘Lubanga ocwalo lamalaikane, ci otweyo dog labwor magi woko oweko pe guwana.’
Kabaka iye yom adada. En ociko ni kiywa Daniel woko ki i bur. Dok jo ma kitgi raco ma gutemo neko Daniel-li en omiyo kibologi i kin lwak labwor. Ma pud peya guo piny i te bur, lwak labwor-ri ogamogi ci oturo cogo komgi woko ducu.
I ngeye Kabaka Dario ocoyo waraga bot dano ducu ma i kerre ni: ‘An ciko ni dano ducu omyero guwor Lubanga pa Daniel. En timo lwak tango madito. En olaro Daniel oweko labwor pe ocamo.’
