Geno Kony pa Lubanga
Ododo 81
Geno Kony pa Lubanga
DANO ma welgi alip mapol ata guwoto wot mabor me a ki Babilon me o Jerucalem. I kare ma guo, Jerucalem onongo oballe adada. Pe tye ngat mo ma kwo kunnu. Luicrael omyero guyub jami ducu odoco.
I kin jami ma gukwongo gerone aye keno tyer. Man aye ka ma gityero iye gitum lee, nyo mot, bot Jehovah. I nge dwe manok Luicrael gucako gero ot pa Lubanga. Ento lukwor ma gikwo i kabedo macok pe gimito ni Luicrael guger. Pi meno gutemo keto lworo i komgi wek guwek tic woko. Olo twal, lukwor-ri gumiyo kabaka manyen me Percia oketo cik me juko tic me gedo-ni woko.
Mwaka mapol okato. Man dong tye mwaka 17 cakke ma Luicrael gudwogo ki Babilon. Jehovah ocwalo lunebine Agai gin ki Jekaria me tito ki dano me cako tic doki. Dano gugeno kony pa Lubanga, dok guwinyo lunebi. Gin gucako gedo odoco, kadi bed cik mo onongo waco ni omyero gin pe gutim.
Pi meno ladit mo me Percia ma nyinge Tatenai obino ci openyo Luicrael kit twero ango ma gitye kwede me gero ot pa Lubanga. Luicrael guwacce ni i kare ma gitye i Babilon, Kabaka Ciro owaco botgi ni: ‘Cit kombeddi, i Jerucalem ci wuciger ot pa Jehovah Lubangawu.’
Tatenai ocwalo waraga i Babilon ci openyo ka Ciro, ma dong kombeddi oto woko-ni, ada owaco meno. Cutcut waraga ma oa ki bot kabaka manyen me Percia obino woko. Waraga-ni waco ni Ciro owaco lokki ada. Dong pi meno kabaka ocoyo ni: ‘Wek Luicrael guger ot pa Lubangagi. Dok acikowu me konyogi.’ I kine ka mwaka angwen gero ot pa Lubanga otum woko, dok cwiny Luicrael obedo yom mada.
Mwaka mukene mapol okato. Kombeddi dong cokcok mwaka 48 cakke i kare ma gero ot pa Lubanga otum kwede. Jo ma i Jerucalem lucan, dok boma kacel ki ot pa Lubanga pe ginen mamwonya mada. Ki i Babilon Ejira ma laicrael ongeyo pi gin ma mitte me yubo ot pa Lubanga. Ci ingeyo gin ma en otimo?
Ejira ocito ka neno Aritakcec, kabaka me Percia, ci kabaka man ma kite ber-ri omiyo mot mapol bot Ejira me terone Jerucalem. Ejira openyo Luicrael ma gitye i Babilon me konye me tero mot magi Jerucalem. Cokcok dano 6,000 guwaco ni gibicito. Gin gitye ki ryal ki jabu mapol kacel ki kidi me wel mukene ma omyero gucit kwede.
Ejira tye ki par, pien jo ma kitgi raco gitye i yo. Jo magi gitwero kwanyo ryal ki jabugi woko, dok gitwero nekogi woko. Pi meno Ejira olwongo dano ducu kacel, kit ma itye ka neno i cal-li. Ci gulego Jehovah me konyogi i wotgi mabor me cito Jerucalem.
Jehovah ogwokogi. Ci i nge wot pi dwe angwen, gin guo i Jerucalem labongo peko mo. Man pe nyuto ni Jehovah twero gwoko jo ma gigeno kony ma a ki bote?
