Ododo 80

Jo pa Lubanga Gua Woko ki Babilon

COKCOK mwaka aryo dong okato cakke i kare ma Lumedia ki Lupercia gumako Babilon. Nen kong gin ma tye ka timme kombeddi! Ada, Luicrael gitye ka a woko ki Babilon. Gin gua kono nining? Anga ma oweko gua?

Ciro, kabaka me Percia aye ogonyogi. Con ma pud peya kinywalo Ciro, Jehovah omiyo lanebi Icaya ocoyo lok i kome ni: ‘In ibitimo gin ma amito ni itim kikome. Kibiweko dogcel twolo piri wek imak boma woko.’ Dong Ciro aye ma otelo mako Babilon. Lumedia ki Lupercia gudonyo i boma ki i dogcel ma onongo kiweko twolo i dyewor.

Ento Icaya lanebi pa Jehovah bene owaco ni Ciro bimiyo cik pi gero Jerucalem ki ot pa Lubanga odoco. Ciro tika mono omiyo cik man? Ee, en omiyo. Man aye gin ma Ciro otito ki Luicrael: ‘Citu, Jerucalem kombeddi, wuciger ot pa Jehovah Lubangawu.’ Dok man aye gin ma Luicrael magi gitye ka wot me timo.

Ento pe Luicrael ducu ma i Babilon onongo gitwero woto wot me bor piny man me dok Jerucalem. Eni obedo wot mabor adada, ma romo kine ka mairo 500 (kilomita 800) dok jo mapol onongo guti nyo gitwo matek ma pe gitwero wot mabor kit meno. Dok tyen lok mukene tye ma omiyo jo mogo pe gucito. Ento Ciro otito ki jo mudong ni: ‘Miyu ryal ki jabu ki mic mukene bot jo ma gubidok ka gero Jerucalem kacel ki ot pa Lubanga.’

Pi meno, kimiyo mot mapol bot Luicrael magi ma gitye ka cito Jerucalem-mi. Me medo meno, Ciro omiyo atabo ki kikopo mapol ma Kabaka Nebukadnejar onongo okwanyo ki i ot pa Jehovah i kare ma en turo Jerucalem. Jo-ni gitye ki jami mapol ma myero guting gucit kwede.

I nge wot pi kine ka dwe angwen, Luicrael guo i kare ma rwatte kikome i Jerucalem. Kombeddi dong tye mwaka 70 kikome cakke i kare ma boma onongo gireto woko piny, dok lobo onongo kiweko odong nono labongo dano. Ento kadi bed Luicrael dong kombeddi gudwogo cen i lobogi pud gibinongo kwo matek, kit ma wabineno kwede i nge man.

Icaya 44:28; 45:1-4; Ejira 1:1-11.