Ododo 113

Paulo i Roma

NEN nyor ma i cing Paulo, dok nen lamony pa Luroma ma tye ka gwokke-ni. Paulo tye lamabuc i Roma. En tye ka kuro nio wang ma Cecar me Roma omoko gin ma myero gitim i kome. Ma en tye lamabuc, kiye dano me limme.

Nino adek i nge o pa Paulo i Roma en ocwalo kwena bot lutela mogo pa Lujudaya me bino bote. Pi meno, Lujudaya mapol ma i Roma gubino. Paulo otito botgi lok i kom Yecu ki ker pa Lubanga. Jo mogo guye ci gudoko Lukricitayo, ento jo mukene pe guye.

Paulo bene oloko ki lumony mapatpat ma ticgi obedo me gwokke. Pi mwaka aryo ma gigwoko en kany macalo lamabuc, Paulo loko ki ngat mo keken ma en twero. Pi meno, kadi wa jo me ot pa Cecar bene guwinyo lok i kom kwena me Ker pa Lubanga, dok jo mogo i kin-gi gudoko Lukricitayo.

Welo man ma tye ka coc i meja-ni kono dok anga? Itwero byekone? Ada, man Temceo. Temceo bene kong obedo i mabuc pi tito lok i kom Ker, ento kigonye woko doki. Dok en obino kany ka konyo Paulo. In ingeyo gin ma Temceo tye ka coyone-ni? Wanenu kong.

Wi po i kom boma me Pilipi ki Epeco i Ododo me 110? Paulo okonyo me cako kacokke pa Lukricitayo i boma magi. Kombeddi, dong, kadi en tye i mabuc, Paulo coyo waraga bot Lukricitayo magi. Waraga magi tye i Baibul, dok kilwongogi ni Jo Epeco ki Jo Pilipi. Paulo kombeddi tye ka tito ki Temceo gin me acoya bot Lukricitayo luremgi ma i Pilipi.

Lupilipi gutimo Paulo maber tutwal. Gucwalle mot i mabuc kany, pi meno en tye ka pwoyogi pire. Epaprodito aye ngat ma okelo mot-ti. Ento two omake ma omito to woko. Ento man dong ocang woko dok tye oyubbe woko me dok paco. En bitero waraga man ma bot Paulo gin ki Temceo-ni ka obidok cen Pilipi.

I kare ma Paulo tye i mabuc en ocoyo waraga aryo mukene ma watye kwede i Baibul. Acel pi Lukricitayo ma i boma me Kolocai. In ingeyo kit ma kilwongo kwede? Jo Kolocai. Mukene-ni obedo waraga ma mege pi lareme ma gimare kwede adada ma nyinge Pilemon ma bene bedo Kolocai. Waraga meno loko i kom latic pa Pilemon ma nyinge Onesimo.

Onesimo oringo woko ki bot Pilemon ci obino Roma. I yo mo Onesimo owinyo pi bedo pa Paulo i mabuc kany. En obino ka limo, ci Paulo opwonyo Onesimo. I ngeye cut Onesimo bene odoko Lakricitayo. Kombeddi Onesimo tye ka paro pingo eringo woko. Pi meno ingeyo gin ma Paulo ocoyo i waraga man bot Pilemon?

Paulo ocoyo ni Pilemon otim kica bot Onesimo. Paulo ocoyo ni: ‘An acwalo en me dwogo cen boti. Ento kombeddi en dong pe opiini keken. En bene omego ma kite ber ma Lakricitayo.’ I kare ma Onesimo odok cen i Kolocai en otero waraga aryo magi, acel bot jo Kolocai ki mukene-ni bot Pilemon. Watwero tamo kit ma cwiny Pilemon obedo yom kwede me ngeyo ni laticce odoko Lakricitayo.

I kare ma Paulo ocoyo waraga bot jo Pilipi ki bot Pilemon, en onongo tye ki kwena mogo mabeco adada. Paulo owaco bot Jo Pilipi ni: ‘An acwalo botwu Temceo. Dok an bene abilimowu ma cokcokki.’ Ki bot Pilemon en ocoyo ni: ‘Yub ka mo ma abibedo iye kunnu.’

I kare ma kigonyo Paulo en olimo Lukricitayo omegine ki lumegine i kabedo mapatpat. Ento lacen dok gitweyo Paulo Roma i mabuc. I kare man en dong ongeyo ni gibineke woko. Pi meno en ocoyo waraga bot Temceo ni obin bote oyotoyot. Paulo ocoyo ni: ‘An abedo lagen i nyim Lubanga, dok Lubanga bimiya bakacic.’ Mwaka manok keken i nge neko Paulo, dok gituro Jerucalem odoco, i kare man Luroma aye guturo.

Ento jami pud tye mapol i Baibul. Lubanga Jehovah omiyo lakwena Jon ocoyo buke me agikki, ma bene i kin-gi tye iye buk me Niyabo. Buk man me Baibul tito pi jami ma i anyim. Wakwanu kong dong lok i kom gin ma tye i anyim.

Tic pa Lukwena 28:16-31; Jo Pilipi 1:13; 2:19-30; 4:18-23;

Jo Ibru 13:23; Pilemon 1-25; Jo Kolocai 4:7-9; 2 Temceo 4:7-9.