Ododo 109

Petero Olimo Kornelio

MENO lakwena Petero aye ocung kuca ca-ni, dok lureme mogo aye gitye i ngeye-ni. Ento pingo laco-ni ogungo piny bot Petero. En mono myero otim meno? In ingeye?

Laco-ni aye Kornelio. En ladit mony pa Luroma. Kornelio pe ngeyo Petero, ento kiwacce ni olwong Petero i ode. Wanenu kong kit ma man ocakke kwede.

Lulub kor Yecu mukwongo gubedo Lujudaya, ento Kornelio pe Lajudaya. Kadi kumeno en maro Lubanga, en lego bote, dok timo jami mabeco mapol bot dano. Dong, otyeno mo acel lamalaika mo onyutte bote ci owaco ni: ‘Lubanga iye yom i komi, dok bigamo legani. Cwal jo mogo wek gulwong laco mo ma nyinge Petero. En tye i Jopa i ot pa Cimon, ma bedo cok ki dog nam.’

Dong, cutcut Kornelio ocwalo jo mogo me yenyo Petero. Orwone, ka jo-ni guo cok ki Jopa, Petero onongo tye i wi ot pa Cimon mupire-ni. Kunnu Lubanga omiyo Petero otamo ni eneno bongo madit ka bino piny ki i polo. I bongo-ni onongo tye iye kwai lee mapatpat ducu. Ma lubbe ki cik pa Lubanga, onongo lee magi pe gileng me acama, kadi bed kumeno dwan mo owaco ni: ‘Petero a malo. Nek wek icam.’

Petero ogamo ni: ‘Pe! Peya acamo gin ma pe leng.’ Ento dwan-ni owaco bot Petero ni: ‘Pe ilwong gin ma Lubanga kombeddi dong waco ni leng ni pe leng.’ Man otimme tyen adek. I kare ma Petero pud tye ka tamo tyen lok me gin magi ducu, jo ma Kornelio ocwalo-ni guo i ot meno ci gupenyo pi Petero.

Petero ocito i kicika ma piny ci owaco ni: ‘An aye laco ma wun wutye ka yenyo-ni. Wubino pingo?’ I kare ma jo-ni gutito bot Petero ni lamalaika owaco ki Kornelio me lwongo Petero i ode, Petero oye wot kwedgi. I nino ma lubo meno, Petero gin ki lureme gua me cito ka limo Kornelio i Cecaria.

Kornelio ocoko wadine ki lureme kacel. Ka Petero obino Kornelio orwatte kwede. En opoto piny ogungo ka tyen Petero, kit ma ineno kany-nyi. Ento Petero owaco ni: ‘A malo, an abedo dano adana.’ Ada, Baibul nyuto ni pe atir me gungo piny me nyuto woro madit makato bot dano. Wan myero wawor Jehovah keken.

Petero kombeddi dong otito lok bot lwak mugure. Petero owaco ni: ‘An aniang ni Lubanga jolo dano ducu ma gimito tic bote.’ Dok ma en pud tye ka lok, Lubanga ocwalo cwiny maleng, ci dano gucako loko leb mapatpat. Man omiyo lupwonnye ma Lujudaya ma gubino kacel ki Petero guuro mada, pien gin onongo tamo ni Lubanga cwako Lujudaya keken. Dong man pwonyo ni Lubanga pe neno ni jo me rok mo acel ber kato nyo pigi tek makato jo me rok mukene. Meno pe gin maber ma wan ducu myero wapo iye?

Tic pa Lukwena 10:1-48; 11:1-18; Niyabo 19:10.