Ododo 104

Yecu Odok i Polo

KA NINO woto ki kato, Yecu onyutte bot lulub kore tyen mapol. Nino mo acel lupwonnye ma romo 500 kulu guneno en. Ka en nyutte botgi in ingeyo gin ma en loko iye? Ker pa Lubanga. Jehovah ocwalo Yecu i lobo me pwonyo pi Ker-ri. Dok en tye ka medde ki timo man kadi wa i nge cere ki i to.

Wi po gin ma ker pa Lubanga obedo? Ee, Ker-ri aye gamente kikome pa Lubanga i polo, dok Yecu aye Ngat ma Lubanga oyero me bedo kabaka. Kit ma wakwano kwede, Yecu onyuto kit ma en ebibedo kwede kabaka maber adada kun pito jo ma kec onekogi, cango lutwo, dok bene cero wa jo muto!

Pi meno i kare ma Yecu biloc macalo kabaka pi mwaka alip acel, kwo bibedo nining i wi lobo? Ada lobo ducu gibiloko doko paradic ma mwonya adada. Lweny, nyo turo cik, nyo two, nyo kadi wa to bibedo pe. Wan wangeyo ni man tye ada pien Lubanga oyubo lobo me bedo paradic wek dano gunong mit me kwo iye. Meno aye gin mumiyo i acakki piny en oyubo poto me Eden. Dok Yecu bineno ni olo twal kitimo gin ma Lubanga mito ni otimme.

Kare dong oromo pi Yecu me dok cen i polo. Pi nino 40 Yecu obedo ka nyutte bot lupwonnyene. Pi meno gin gungeyo labongo gung cwiny mo ni en dok tye makwo odoco. Ento ma peya oweko lupwonnyene en owaco botgi ni: ‘Wubed i Jerucalem nio wang ma wunongo cwiny maleng.’ Cwiny maleng obedo teko pa Lubanga, calo yamo ma kodo, ma bikonyo lulub kore me tiyo gin ma Lubanga mito. Me agikki, Yecu owaco ni: ‘Wun myero wutit lok i koma wa i agikki lobo.’

Ka Yecu owaco man, gin mo me aura tutwal otimme. En ocako cito malo i polo, kit ma itwero neno kwede kany-nyi. Ci pol mo oume woko ki i wanggi, dok lupwonnye pe gumedo ki neno Yecu dong. Yecu odok i polo, ci ocako loyo lulub kore ma i wi lobo ki kunnu.

1 Jo Korint 15:3-8; Niyabo 21:3, 4; Tic pa Lukwena 1:1-11.