Ododo 6

Latin Laco Maber, ki En Maracce

NEN Kain gin ki Abel kombeddi. Gin ducu dong gudongo woko. Kain odoko lapur. En puro bel ki pot dek ki nyig yat.

Abel odoko lagwok romi. En maro gwoko lutino romi. Lutino romi gudongo gudoko romi madongo, pi meno Abel otugi nongo lwak romi me agwoka.

Nino mo acel Kain gin ki Abel gukelo mot bot Lubanga. Kain okelo cam mogo ma en opuro. Abel okelo romi mabeco loyo ducu ma en tye kwede. Jehovah iye yom i kom Abel ki motte. Ento iye pe yom i kom Kain ki motte. In ingeyo pingo?

Pe ni mot pa Abel ber kato pa Kain. Ento pien Abel obedo laco ma kite ber. En maro Jehovah kacel ki ominne. Ento Kain rac; en pe maro ominne.

Lubanga owaco ki Kain ni oyub kite. Ento Kain pe winyo. En iye tye ka wang tutwal pien Lubanga maro Abel makato. Pi meno Kain owaco ki Abel ni, “Wacit i poto.” Ki kunnu, ma onongo gitye ken-gi, Kain ogoyo ominne Abel. En ogoye matek adada ci oneke woko. Meno onongo pe obedo gin marac tutwal pi Kain me otimo?

Kadi bed Abel oto, Lubanga pud wiye po i kome. Abel onongo ber, dok Jehovah wiye pe wil i kom ngat ma kumeno. Pi meno nino mo acel Lubanga Jehovah dok bidwoko Abel cen i kwo. I kare meno Abel pe dong bito. En dong bibedo kwo i lobo kany nakanaka. Pe obibedo ber tutwal me ngeyo dano calo Abel?

Ento Lubanga iye pe yom i kom jo ma gical ki Kain. Pi meno i nge neko ominne, Lubanga opwodo Kain kun ryeme woko me cito ka mabor tutwal ki bot jo me otte. I kare ma Kain ocito me kwo i but lobo tung ka mukene, en owoto ki laminne acel, ci laminne-ni odoko dakone.

Motmot Kain gin ki dakone gucako nywalo lutino. Awobe ki anyira pa Adam ki Kawa mukene-ni gunyomo, dok gin bene gunywalo lutino. Cutcut dano odoko mapol i wi lobo. Wakwanu kong lok i kom mogo.

Acakki 4:2-26; 1 Jon 3:11, 12; Jon 11:25.