Nua Opayo Yeya
Ododo 9
Nua Opayo Yeya
NUA onongo tye ki dako ki lutino adek. Nying awobene obedo Cem, Kam ki Yafeci. Awobe-ni ducu onongo gitye ki dako acel acel. Pi meno onongo tye jo aboro i ot pa Nua.
Lubanga oweko Nua otimo gin mo mapat tutwal. Owacce ni opa yeya madit. Yeya man onongo lac calo meli, ento onongo nen calo bok madit mabor. Lubanga owacce ni: ‘Pok iye kabedo adek, ma piny ki me aryone ki ma malone, ci ipok kicika iye.’ Kicika magi onongo obibedo pi Nua ki jo me ode, lee kacel ki cam ma mitte pi gin ducu.
Lubanga bene owaco ki Nua ni omwon yeya maber ma pii pe twero donyo iye. Lubanga owaco ni: ‘Abicoro pii aluka madwong, wek otyek wi lobo ducu. Dano ducu ma pe tye i yeya gubito woko.’
Nua ki awobene guwinyo Jehovah ci gucako payo yeya. Ento jo mukene-ni gunyero megi anyera. Gumedde ki rac kitgi. Ngat mo pe ma oye i kare ma Nua owacigi gin ma Lubanga obitimo.
Payo yeya-ni otero kare malac pien onongo dit tutwal. I nge mwaka mapol, olo twal kityeko. Lubanga dong owacci Nua ote lee i yeya. Lubanga owaco ni lee mogo kikel ki aryo aryo macalo kit kwagi tye, co ki mon. Ento kit kwa lee mukene-ni, Lubanga owaco ki Nua ni kikelgi ki abiro abiro. Lubanga bene owaco ki Nua ni okel kwa winyo mapatpat-gu ducu. Nua otimo kit macalo Lubanga owaco.
Lacen, Nua ki jo ode bene gudonyo i yeya. Ci Lubanga oloro doggola woko. Ki i yeya, Nua ki jo ode gukuro. Keti in bene onongo i tye kwedgi i yeya, kun wutye ka kuro. Pii aluka mono obibedo tye ada kit ma Lubanga owaco-ni?
