Ododo 68

Awobe Aryo ma Gukwo Odoco

KA ITO, meni twero winyo nining ka ce dok kidwoki cen i kwo? En cwinye bedo yom adada! Ento ngat ma dong oto woko dok mono twero kwo odoco? Kong yam otimme con?

Nen kong laco dako kacel ki awobi-ny, ma tyen kany. Laco-ni aye lanebi Elia. Dako-ni aye dato me boma me Jarepat, dok awobi-ni wode. Dong, i nino mo acel two omako awobi-ni. Twone obedo ka medde ameda marac adada nio ka en oto woko. Elia dong owaco bot dako-ni ni: ‘Miya awobi-ni.’

Elia otero latin muto-ni i kicika ma malo ci opyelo en i wi kitanda. Ci en olego ni: ‘Ai Jehovah, mi awobi-ni okwo odoco.’ Ci awobi-ni ocako yweyo! Ka kenyo Elia odwoko awobi-ni i kicika ma piny ci owaco bot dako-ni ni: ‘Nen, wodi tye makwo!’ Man aye gin mumiyo cwiny minne yom tutwal.

Lanebi pa Jehovah mukene ma pire tek kilwongo nyinge ni Elica. En tiyo macalo lakony kor Elia. Ento lacen Jehovah bene otiyo ki Elica me timo tango. I nino mo acel Elica ocito i boma me Cunem, ka ma dako mo onongo konye iye maber tutwal. Lacen dako man onywalo latin awobi.

Odiko mo acel, ma awobi-ni dong odongo ma ditdit, en ocito bot wonne ma onongo tye ka tic i poto. Awobi-ni okok atura ni: ‘Wiya bara!’ I nge tero en paco, awobi-ni oto woko. Kit ma cwiny minne oton kwede! Labongo galle en ocito ci okelo Elica.

I kare ma Elica oo, en odonyo ki latin muto-ni i ot. En olego bot Jehovah, ka obuto i kom lato-ni. Cutcut kom awobi-ni odoko malyet, ci en ojiro tyen abiro. Kit ma minne iye obedo yom kwede i kare ma odonyo i ot ci onongo latinne tye makwo!

Dano mapol dong guto woko. Man ocwero cwiny jo me odigi kacel ki luremgi marac tutwal. Wan pe watye ki teko me cero jo muto. Ento Jehovah tye kwede. Lacen wabineno kit ma en bidwoko kwede dano milion mapol cen i kwo.

1 Luker 17:8-24; 2 Luker 4:8-37.