Ododo 62

Ayelayela i Ot pa Daudi

KA Daudi dong ocako loc i Jerucalem, Jehovah omiyo lumonnye guloyo lukworgi i lweny mapol. Jehovah onongo ocikke me miyo lobo me Kanaan bot Luicrael. Dok kombeddi dong, pi kony pa Jehovah, lobo ducu ma kiciko pire botgi-ni dong olo twal odoko megi.

Daudi obedo laloc maber. En maro Jehovah. Pi meno gin mukwongo ma en otimo i nge mako Jerucalem aye me kelo canduk me gicikke kenyo. Dok en mito gero ot me ketone iye.

Ka Daudi dong woto ki teggi, en otimo bal mo marac adada. Daudi ngeyo ni rac me kwanyo gin pa ngat mo mukene. Ento otyeno mo acel, ma en onongo tye i wi ode, en ongiyo piny ci oneno dako mo maleng adada. Nying dako meno Batceba, dok cware Uria obedo ngat acel i kin lumonnye.

Daudi omito Batceba tutwal ma omiyo en oweko kikelle woko i ot pa kabaka. Cware nongo ocito woko ka lweny. Daudi obuto kwede, ci lacen en onongo ni ebinywalo latin. Lworo omoko Daudi ci en ocwalo lok bot lawimonnye Joab wek oket Uria i nyim lweny ka ma kitwero neke woko iye. I kare ma Uria oto, Daudi onyomo Batceba.

Kiniga omako Jehovah tutwal i kom Daudi. Pi meno en ocwalo laticce Natan me titte balle. Itwero neno ka Natan tye ka lok ki Daudi kenyo. Daudi ongut pi gin ma etimo, dok pi meno Jehovah pe oneke woko. Ento Jehovah owaco ni: ‘Pien in itimo jami magi maraco-ni, ibibedo ki ayelayela madwong i odi.’ Dok ada Daudi obedo ki ayelayela madwong tutwal!

Me acel, wod pa Batceba-ni oto woko. Ci i ngeye latin kayo pa Daudi Ammon onongo laminne Tamar kene ci omako obuto kwede woko tektek. Abcalom wod pa Daudi okeco pire mada ci oneko Ammon woko. Lacen, Abcalom oloko cwiny jo mapol, ci omiyo kikette me bedo kabaka. I ngeye, Daudi oloyo lweny ki Abcalom ma kineko woko-ni. Ada, ayelayela oketo kom Daudi woko.

I kin kare ma jami magi timme-ni, Batceba onywalo latin awobi ma nyinge Solomon. Ka Daudi dong oti dok kome lit, wode Adoniya otemme me doko kabaka. Ka kenyo Daudi oweko lalam dog ma nyinge Jadok oonyo moo i wi Solomon me nyuto ni Solomon bidoko kabaka. I ngeye manok Daudi oto ma mwaka me ditte tye 70. En oloyo pi mwaka 40, ento kombeddi dong Solomon aye kabaka me Icrael.

2 Camuel 11:1-27; 12:1-18; 1 Luker 1:1-48.