Ododo 65

Ker-ri Opokke

IN INGEYO pingo laco-ni tye ka yeco bongone woko matitino? Jehovah owacce me timo meno. Laco man aye Akija lanebi pa Lubanga. In ingeyo nga ma lanebi obedo? En aye ngat ma Lubanga tito bote con gin ma bitimme.

Kany Akija tye ka lok ki Jeroboam. Jeroboam aye laco ma Solomon oketo me loyo ticce mogo me gedo. I kare ma Akija orwatte ki Jeroboam i gudo kany, Akija otimo gin me aura. En olunyo kanyi manyen ma onongo en oruko i kome-ni ci oyeco woko i dul 12 mapatpat. En owaco ki Jeroboam ni: ‘Kwany dul 10 obed meri.’ Ingeyo pingo Akija miyo ki Jeroboam dul 10?

Akija owaco ni Jehovah obikwanyo ker woko ki bot Solomon. En owaco ni Jehovah obimiyo kaka 10 bot Jeroboam. Man te lokke ni Rekoboam wod pa Solomon bidong ki kaka aryo keken me aloya.

I kare ma Solomon owinyo gin ma Akija owaco bot Jeroboam, kiniga omake adada. En otemo neko Jeroboam. Ento Jeroboam oringo woko Ejipt. Inge kare manok Solomon oto. En obedo kabaka pi mwaka 40, ento kombeddi dong wode Rekoboam aye kiketo odoko kabaka. Ki i Ejipt Jeroboam owinyo ni Solomon oto, pi meno en odwogo cen i Icrael.

Rekoboam obedo kabaka ma kite pe ber. En onongo loyo jo i yo marac makato pa wonne Solomon woko. Jeroboam kacel ki ludito mogo mukene gucito bot Kabaka Rekoboam ci gukwaye ni myero en olo dano i yo maber. Ento Rekoboam pe winyo. Ada, en kite odoko marac makato kit macon. Pi meno lwak guketo Jeroboam me bedo kabaka i wi kaka 10, ento kaka aryo pa Benjamin ki Juda gudong ki Rekoboam macalo kabakagi.

Jeroboam pe mito ni jone gucit Jerucalem ka woro i ot pa Jehovah. Pi meno en oyubo lutino dyangi aryo me jabu ci omiyo jo me ker me kaka 10 ca-ni me worogi. Cutcut lobo ocako pong woko ki turo cik ki bwami.

Ayelayela bene onongo tye i ker me kaka aryo-ni. Ma peya kabaka Rekoboam oloyo pi mwaka abic, kabaka me Ejipt obino ka lweny i kom Jerucalem. En okwanyo lonyo madwong tutwal ki i ot pa Jehovah. Pi meno ot pa Lubanga-ni obedo kit ma kiyubo kwede-ni pi kare manok adada.

1 Luker 11:26-43; 12:1-33; 14:21-31.