Ododo 61

Kiketo Daudi me Bedo Kabaka

CAULO otemo dok odoco me mako Daudi. En okwanyo lumonnye mabeco 3,000 ci ocito kwedgi ka yenyo Daudi. I kare ma Daudi ongeyo man, en ocwalo lurot-piny me neno ka ma Caulo ki jone gugony iye i dyewor meno. Ci Daudi openyo jone aryo ni: ‘Anga ki i kinwu ma biwot kweda i gony pa Caulo?’

Abicai ogamo ni: ‘An abicito kwedi.’ Abicai obedo wod pa Jeruya lamin Daudi. I kare ma Caulo ki jone gitye ka nino, Daudi gin ki Abicai gulibbe laling gudonyo i gony. Gin gukwanyo tong pa Caulo ki opoko piine, ma onongo tye i ka nget wiye. Ngat mo ma oneno nyo owinyogi pe pien gin ducu onongo gunino woko.

Nen Daudi gin ki Abicai dong kombeddi. Gin gua woko, dok dong gitye mere mot i wi got. Daudi odangnge bot lawimony me Icrael ma tye piny ni: ‘Abneri, pingo pe itye ka gwoko kabaka, laditti? Nen! Tongnge ki opoko piine kono tye kwene?’

Caulo oco woko. En ongeyo dwan Daudi, ci openyo ni: ‘Daudi, meno in?’ Itwero neno Caulo gin ki Abneri piny kenyo?

Daudi ogamo ki Caulo ni: ‘Ee, rwoda kabaka.’ Dok Daudi openyo ni: ‘Pingo imito maka? Gin ango marac ma atimo? Tongngi en, ai kabaka. Wek ngat acel mo ki i kin joni obin ci ogam.’

Caulo oye ni: ‘An atimo rac. Atimo tim me mingo.’ Ka kenyo Daudi ocito ki yone, ento Caulo odok cen paco. Ento Daudi oloko i cwinye kekene ni: ‘I kin nino mo ma cokcokki Caulo bineka woko. Myero alwi acit woko i lobo pa Lupiliciti.’ Dok meno aye gin ma en otimo. Daudi obwolo Lupiliciti ci oweko gutamo ni en dong tye tung botgi.

I kare mo lacen Lupiliciti gucito me lweny ki Icrael. I lweny meno, Caulo gin ki Yonacan kinekogi woko. Man ocwero cwiny Daudi marac, ci en ocoyo wer mo maber adada, ma en owero iye ni: ‘Cwinya cwer piri, omera Yonacan. Kit ma onongo amari kwede!’

I nge man Daudi odwogo Icrael i boma me Kebron. Lweny ocakke i kin jo ma guyero Icbocet wod pa Caulo me bedo kabaka ki jo mukene ma gimito ni Daudi aye obed kabaka. Ento i ngeye lacen jo pa Daudi guloyo. Daudi onongo tye ki mwaka 30 i kare ma kiketo en odoko kabaka. Pi mwaka abiro ki nucu en oloyo ki i Kebron. Awobene mogo ma en onywalo ki kunnu aye nyingi Ammon, Abcalom ki Adoniya.

Kare obino ma Daudi ki jone gucito ka mako boma mo maber adada ma kilwongo ni Jerucalem. Joab, wod pa Jeruya mukene, aye otelo mony meno. Pi meno Daudi omiyo bakacic bot Joab me doko lawimony. I kare meno Daudi dong ocako loc i Jerucalem.

1 Camuel 26:1-25; 27:1-7; 31:1-6; 2 Camuel 1:26; 3:1-21; 5:1-10; 1 Tekwaro 11:1-9.