Ododo 76

Kituro Jerucalem Woko

WAKA 10 dong okato cakke i kare ma Kabaka Nebukadnejar otero Luicrael ducu ma gukwano matek loyo i Babilon. Ento kombeddi nen kong gin ma tye ka timme! Kitye ka wango Jerucalem woko. Dok jo Icrael ma pe kinekogi gitye ka terogi Babilon i mabuc.

Po ni, man aye gin ma lunebi pa Jehovah owaco ni bitimme ka jo-ni pe guloko rac kitgi-ni. Ento jo Icrael pe guwinyo lunebi. Gin gumedde ameda ki woro lubanga me goba ma ka woro Jehovah. Pi meno jo-ni myero me apwoda. Wan wangeyo man pien lanebi pa Lubanga Ejekiel otittiwa jami maraco ma jo Icrael onongo gitimo.

In ingeyo nga ma Ejekiel obedo? En obedo ngat acel i kin awobe ma kabaka Nebukadnejar otero Babilon mwaka 10 i ngec ma peya turo Jerucalem marac tutwal-li otimme. Daniel ki lureme adek-ki, Cadrak, Mecak ki Abednego, bene giterogi Babilon i kare meno.

Ma Ejekiel onongo pud tye i Babilon, Jehovah onyutte jami maraco ma onongo tye ka timme i Jerucalem i ot pa Lubanga. Jehovah otiyo tango me nyuto man. I ada Ejekiel gire onongo pud tye Babilon, ento Jehovah omiyo en oneno gin maraco ducu ma tye ka timme i ot pa Lubanga. Dok gin ma Ejekiel oneno onongo rac adada!

Jehovah owaco bot Ejekiel ni: ‘Nen kong gin me kwer ma jo-ni gitye ka timone i ot pa Lubanga. Nen kor ot ka opong ki cal twol ki lee mukene. Dok nen jo Icrael ma tye ka worogi-ni!’ Ejekiel oneno jami magi, dok en ocoyo gin ma tye ka timme piny.

Jehovah openyo Ejekiel ni: ‘Ineno gin ma lutela me Icrael gitye ka timone i mung?’ Ada, en twero neno meno bene. Tye co 70, ma gin ducu gitye ka woro lubanga me goba. Gitye ka waco ni: ‘Jehovah pe nenowa. En dong oa woko ki i lobo man.’

Lacen Jehovah onyuto bot Ejekiel mon mogo ma i dog cel ma tung kumalo me ot pa Lubanga. Gin gubedo kunnu ka woro Tamuj lubanga me goba. Nen dok co ma gitye i dog ot pa Lubanga-ni! Cokcok gin 25. Ejekiel onenogi. Gin gugungo nyimgi okemo tung kunyango dok giworo ceng!

Jehovah owaco ni: ‘Jo man pe giwora. Gin pe gitimo gin marac atima keken, ento gibino ka timone wa i oda.’ Pi meno Jehovah okwongnge ni: ‘Gubiwinyo lyeto me akemona. Kica pe bimaka i komgi ka kinekogi.’

I nge mwaka adek keken ma Jehovah onyuto jami magi bot Ejekiel, jo Icrael gujemo woko i kom Kabaka Nebukadnejar. Pi meno en obino me lweny i komgi. I nge lweny pi mwaka acel ki nucu, jo Babilon guturo cel me Jerucalem ci guwango boma-ni woko. Pol dano kinekogi nyo kiterogi Babilon i opii.

Pingo Jehovah oweko gin marac kit man otimme i kom Luicrael? En weko pien gin onongo pe giwinyo Jehovah dok pe gilubo cikke. Man nyuto kit ma pire tek kwede pi wan me timo gin ma Lubanga waco kare ducu.

Mukwongo kong jo manok aye giye ni gubed i lobo me Icrael. Kabaka Nebukadnejar oketo Lajudaya ma nyinge Gedalia me gwoko jo magi. Ento Luicrael mogo guneko Gedalia woko. Kombeddi dong dano lworo omakogi ni jo Babilon bibino ci neko gin ducu pien gin marac-ci otimme. Pi meno gudiyo Jeremia me wot kwedgi, ci guringo gucito Ejipt.

Man oweko lobo Icrael odong nono labongo dano mo iye. Pi mwaka 70 pe tye ngat mo ma okwo i lobo Icrael. Lobo meno odong nono. Ento Jehovah ociko ni ebidwoko jone cen i lobo Icrael i nge mwaka 70. I kare meno, ngo mutimme i kom jo pa Lubanga i lobo Babilon ka ma kiterogi iye-ni? Wanenu kong.

2 Luker 25:1-26; Jeremia 29:10; Ejekiel 1:1-3; 8:1-18.