Ododo 37

Kema me Woro

IN INGEYO gedo eni? Obedo kema ma dok pat tutwal me woro Jehovah. Kilwongo bene ni ot kema. Lwak gutyeko yubone mwaka acel i nge weko Ejipt. In ingeyo nga ma omiyo tam me yubone?

Obedo tam pa Jehovah. I kare ma Moses onongo tye malo i wi Got Cinai, Jehovah otitte kit me yubone. En owaco ni omyero kiyub ma poko iye bedo yot. I yo ma kit man bute mapatpat kitwero tingogi kikobo kwedgi i kabedo mukene, ka dok kiketogi kacel ki kunnu. Pi meno ka jo Icrael gikobo ki ka moni me cito i kabedo mukene i dye tim, gitingo kema gicito kwede.

Ka ineno i kicika matidi ma tye i agikki me kema-ni, itwero neno bok, nyo canduk. Man kilwongo ni canduk me gicikke. Onongo tye lumalaika aryo nyo lukerubi ma kiyubo ki jabu, acel tungi ki acel tung ca. Lubanga dok ocoyo Cik Apar-ri i kom kidi aryo ma apada, pien Moses onongo otyero mukwongo ca woko. Dok kidi magi onongo kigwokogi i canduk me gicikke. Me medo i kom meno, abino me manna bene kigwoko iye. Wi po i kom gin ma manna obedo?

Aron omin Moses aye Jehovah oyero me bedo lalam dog madit. En telo lwak i woro Jehovah. Kadi awobene bene lulam dog.

Kombeddi nen dong kicika madit ma i kema-ni. Ditte dodo kicika matidi-ni tyen aryo. Itye ka neno bok, nyo canduk matidi, ki yito ma tye ka kati ki iye-ni? Man aye keno tyer ka ma lulam dog giwango iye gin ma ngwece kur ma kilwongo ni eceta. Dok bene onongo tye okar-mac ki laput macce abiro. Gin me adek i kicika meno aye obedo meja. Onongo kiketo mugati 12 i wiye.

I dyekal me kema-ni onongo tye iye otako madit, nyo becen, ma pii opong iye. Lulam dog gitiyo kwede me logo. Keno tyer madit onongo bene tye. Kany kiwango iye lee muto macalo tyer bot Jehovah. Kema-ni onongo tye i dye gony, dok Luicrael onongo gikwo i kemagi ma orumo kema-ni i dyere.

Nia 25:8-40; 26:1-37; 27:1-8; 28:1; 30:1-10, 17-21; 34:1, 2; Jo Ibru 9:1-5.