Ododo 34

Kit Cam Manyen

ITWERO tito gin ma dano gitye ka coko ki i ngom-mi? Ginne cal ki pee. Tar, mareb dok matur ngidde woko oyot oyot. Obedo gin acama gire; ento pe pee.

Onongo pud okato dwe acel keken cakke i kare ma Luicrael guweko kwede Ejipt. Gin onongo gitye i dye tim. Ginapita manok keken aye dongo kany, pi meno dano gungur, guwaco ni: ‘Kono nene Jehovah onekowa woko i Ejipt. Twara kunnu onongo watye ki cam ducu ma wamito.’

Pi meno Jehovah owaco ni: ‘Abimiyo cam cwer ki malo i polo.’ Dok man aye gin ma Jehovah otimo. Orwone odiko ka Luicrael guneno gin matar ma opoto-ni, gupenye keken-gi ni: ‘Man ngo?’

Moses owaco ni: ‘Man aye cam ma Jehovah omiyowu me acama.’ Dano gulwongo ni MANNA. Onongo mit calo mugati ma apada ma kitedo ki moo kic.

Moses owaco ki lwak ni: ‘Wucok ma romo acama pa ngat acel acel.’ Pi meno odiko ducu man aye dong gin ma gitimo. Ci ka ceng odoko lyet, manna ma odong i ngom leny woko.

Moses bene owaco ni: ‘Ngat mo pe myero ogwok manna mo nio wa odiko.’ Ento jo mogo pe giwinyo lok. In ingeyo gin mutimme? Orwone odiko manna ma gin onongo gugwoko-ni odoko mangwe dok opong ki kwidi!

Ento, i cabit onongo tye nino acel ma Jehovah owaco ni dano gucok manna ma romo pi nino aryo. Man aye nino me abicel. Dok Jehovah owaco ni gugwok mukene nio wa i nino ma lubo meno, pien en pe ebimiyo mo poto i nino me abiro. Ka gin gugwoko mogo nio wa i nino me abiro, pe pong ki kwidi dok pe doko mangwe! Man obedo tango mukene!

Mwaka ducu ma Luicrael gubedo i dye tim, Jehovah obedo ka pitogi ki manna.

Nia 16:1-36; Wel 11:7-9; Yocwa 5:10-12.