Kwongnge pa Jeputa
Ododo 53
Kwongnge pa Jeputa
KONG ibikwongo kwong ci lacen inongo ni gwokone tek? Laco ma i cal man okwongnge, man aye omiyo cwinye tye ka wang tutwal-li. Laco-ni obedo langolkop ma cwinye tek me Icrael ma nyinge Jeputa.
Jeputa okwo i kare ma Luicrael onongo dong pe giworo Jehovah. Gin onongo dok gitye ka timo gin marac. Pi meno Jehovah oweko jo Ammon ounogi. Man omiyo Luicrael gikok bot Jehovah ni: ‘Wan wabalo i nyimi. Tim ber, i larwa!’
Lwak cwinygi oton pi jami maraco ma gutimo. Gin ginyuto ni gingut kun giworo Jehovah dok odoco. Pi meno Jehovah pud dok konyogi.
Lwak oyero Jeputa me lweny i kom jo Ammon ma giraco-ni. Jeputa mito tutwal ni Jehovah okonye i lweny. Pi meno en okwongnge bot Jehovah ni: ‘Ka imiyo aloyo jo Ammon, ngat mukwongo katti ki i oda me rwatte kweda ka adwogo ki i loyo lweny an abimiyo boti.’
Jehovah owinyo kwongnge pa Jeputa, dok omiyo en oloyo lweny. Ka Jeputa odwogo paco, ingeyo ngat ma okwongo bino me rwatte kwede? Nyare, ma bene obedo latin acel keken ma onongo en tye kwede. Jeputa okok ni: ‘Ai, nyara do! Kit ma itye ka kela twon cwercwiny kwede. Ento an dong akwongnge woko bot Jehovah, dok pe atwero loko kwongnga.’
I kare ma nya pa Jeputa ongeyo pi kwong pa wonne, cwinye kong bene ocwer. Pien man te lokke ni en biweko wonne wa ki lureme. Ento en bitic bot Jehovah i kema i Cilo pi kare me kwone ducu. Pi meno en owaco bot wonne ni: ‘Ka ikwongnge bot Jehovah, omyero igwoki.’
Pi meno nya pa Jeputa ocito i Cilo, dok otiyo bot Jehovah i kemane pi kare me kwone ducu. Nino angwen i mwaka acel acel, mon me Icrael gicito ka limme kunnu dok gibedo ki yomcwiny kacel kwede. Dano gimaro nya pa Jeputa pien en onongo latic pa Jehovah ma kite ber.
