Lakwo i Icrael
Ododo 47
Lakwo i Icrael
NEN gin ma laco man tye ka yikone piny i dye kemane! Bongo maber adada, ki dul jabu wa ki ryal mogo. En okwanyogi ki i boma me Jeriko. Ento jami me Jeriko onongo myero kitimgi nining? Wi po?
Onongo omyero kibalgi woko, dok jabu ki ryal onongo myero gimi i ka kano lim i kema pa Jehovah. Pi meno jo magi gukwero winyo Lubanga woko. Gin gukwalo gin pa Lubanga. Nying laco-ni Akan, dok jo ma tye kwede-ni jo me ode. Wanenu kong gin mutimme.
Ka Akan dong okwalo jami magi woko, Yocwa ocwalo co mogo me lweny i kom boma me Ai. Ento kiloyogi woko i lweny. Jo mogo kinekogi, mudonnge guringo woko. Cwiny Yocwa oton tutwal. En obuto oryebbe piny i ngom ci olego bot Jehovah ni: ‘Pingo iweko man otimme i komwa?’
Jehovah ogamo ni: ‘A malo! Icrael obalo. Gin gukwanyo jami mogo ma onongo myero kibal nyo kimi i kema pa Jehovah. Gin gukwalo bongo maber atikatika ci gukano woko i mung. Pe abicwakowu nio wang ma kibalo woko, kacel wa ki ngat ma okwanyo jami magi.’ Jehovah owaco ni ebinyuto bot Yocwa laco marac-ci.
Pi meno Yocwa ocoko dano ducu kacel, ci Jehovah oyero Akan laco marac-ci. Akan owaco ni: ‘An abalo. Aneno bongo ma ber adada, ki dul jabu wa ki ryal mogo. Onongo amitogi tutwal ci omiyo akwanyo. Wubinongo kiyiko i te kemana.’
Ka kinongo jami magi dok kikelogi bot Yocwa, en owaco bot Akan ni: ‘Pingo ikelo peko i komwa? Kombeddi Jehovah obikelo peko i komi!’ Cutcut lwak gucelo Akan kacel ki jo me ode ki gweng nio wa i to. Man pe nyuto ni omyero pe wakwany jami ma pe megwa?
Lacen Icrael dok ocito ka lweny i kom Ai. I lweny-nyi Jehovah dong okonyo jone, ci guloyo lweny.
