Ngolo Kulu Jordan
Ododo 45
Ngolo Kulu Jordan
NEN! Luicrael gitye ka ngolo Kulu Jordan! Ento pii kono tye kwene? Pien i kare meno me mwaka, kot onongo cwer madwong tutwal, dok kulu onongo opong tutwal i nge dakika mo manok ma okato angec. Ento kombeddi pii ducu dong peke! Dok Luicrael dong gitye ka kato loka kun giwoto i wi ngom mutwo kit ma gungolo kwede Nam Makwar-ri! Pii ducu owoto kwene? Kong wanenu.
Ma kare dong oo pi Luicrael me ngolo Kulu Jordan, man aye gin ma Jehovah omiyo Yocwa otito bot lwak: ‘Lulam dog omyero gukwany canduk me gicikke ci guwot i nyimwa. Ka gin guketo tyen-gi i pii me Kulu Jordan, ci piine bigiko mol woko.’
Ci lulam dog gukwanyo canduk me gicikke, kun gitelo kwede nyim lwak. I kare ma guo i Jordan, lulam dog gudonyo gucung wa i pii. Pii onongo tut dok tye ka mol oyot. Ento tekki tyen-gi gudo pii, mol pa pii otugi jukke woko! Man tango! Ki tung ka ma pii a ki iye Jehovah oguro pii woko kacel. Pi meno, cutcut pii odoko pe i kulu!
Lulam dog ma gitye ka tingo canduk me gicikke-ni gucito wa i dye kulu mutwo-ni. Itwero nenogi i cal-li? Ka gin gucung kunnu, Luicrael ducu gungolo gukato loka Kulu Jordan kun giwoto i wi ngom mutwo!
I kare ma jo ducu dong gukato loka, Jehovah omiyo Yocwa owaco ki co 12 ma tego ni: ‘Wudony i dye Kulu ka ma lulam dog gucung iye ki canduk me gicikke-ni. Coku gweng 12, ci wuketgi ka ma wubibuto iye i dyewor-ni. Ci, i anyim, ka lutinowu bipenyo te lok me gweng magi, myero wutittigi ni pii ocung woko i kare ma canduk me gicikke pa Jehovah tye ka ngolo Jordan. Gweng magi bipoyo wiwu i kom tango-ni!’ Yocwa bene oketo gweng 12 ka ma lulam dog gucung iye i dye kulu-ni.
Me agikki Yocwa owaco ki lulam dog ma gitye ka tingo canduk me gicikke ni: ‘Wua woko ki i Jordan.’ Cutcut ma gukato, kulu dok ocako mol odoco.
