Ododo 84

Lamalaika Olimo Maliam

DAKO man mamwonya-ni aye Maliam. En obedo Laicrael, ma kwo i boma me Najaret. Lubanga ngeyo ni en ngat ma kite ber. Meno aye omiyo en ocwalo lamalaikane Gabriel me lok kwede. In ingeyo gin ango ma Gabriel obino ka titone bot Maliam? Kong wanenu.

Gabriel owaco bote ni: ‘Itye maber, in ma kimari tutwal-li. Jehovah tye kwedi.’ Maliam wa yam con pud peya oneno dano man. En ocako par, pien en onongo pe ngeyo tyen lokke-ni. Ento cutcut Gabriel okweyo cwinye woko.

En owaco ni: ‘Maliam, pe ilwor, Jehovah cwinye yom i komi. Meno aye omiyo en obitimo gin me aura piri. Cokcoki ibinywalo latin. Dok myero ilwonge ni Yecu.’

Gabriel omedde ki titone ni: ‘Latin man bibedo dit, dok kibilwonge ni Wod pa Lubanga Mamalo Twal. Jehovah bikete bedo kabaka, kit ma yam Daudi obedo kwede. Ento Yecu bibedo kabaka matwal, dok kerre pe bigik!’

Maliam openyo ni: ‘Man ducu twero timme nining? An bene pud peya kinyoma. An pud pe abedo ki laco, ci atwero nywalo latin nining?’

Gabriel ogamo ni: ‘Teko pa Lubanga bibino i komi. Pi meno latin-ni kibilwongo ni Wod pa Lubanga.’ Ci en owaco ki Maliam ni: ‘Po pi watti Elicabet. Dano guwaco ni en dong oti ma pe romo nywalo lutino. Ento cokcokki dong en binywalo latin laco. Pi meno ineno, pe tye gin mo ma Lubanga pe romo timone.’

Cutcut Maliam owaco ni: ‘An anyaka ma latic pa Jehovah! Wek otimme i koma kit ma iwaco-ni kikome.’ Ci lamalaika dong ocito woko.

Maliam orune me cito ka limo Elicabet. Ka Elicabet owinyo dwan Maliam, latin ma i iye otinnge ki yomcwiny. Cwiny maleng pa Lubanga opongo Elicabet, ci en owaco ki Maliam ni: ‘In kimari ki mar mapat i kin mon.’ Maliam obedo bot Elicabet pi dwe ma romo adek, ci lacen odok cen paco i Najaret.

Onongo kicok miyo Maliam me anyoma bot laco mo ma nyinge Yucepu. Ento ka Yucepu ongeyo ni Maliam tye ki latin ma obinywalo, en otamo ni omyero dong pe enyome. Ci lamalaika pa Lubanga owaco bote ni: ‘Pe ilwor me tero Maliam me bedo dakoni. Pien Lubanga aye omiye latin laco.’ Pi meno Maliam gin ki Yucepu gunyomme, ci gukuro ni kong kinywal Yecu.

Luka 1:26-56; Matayo 1:18-25.