Yecu Bino Macalo Kabaka
Ododo 97
Yecu Bino Macalo Kabaka
KARE manok i nge cango lutowang ma lucan aryo ca, Yecu obino i paco mo matidi macok ki Jerucalem. En owaco bot lupwonnyene aryo ni: ‘Wucit i paco-ni ci wubinongo iye latin kana. Wugony wukel bota.’
Ka gikelo kana-ni bote, Yecu obedo i wiye. Ci en ongweco ocito Jerucalem ma dong tye cok-ki. Ka en oo cok ki boma, lwak dano mapol gukati woko me rwatte kwede. Polgi gukwanyo bongngigi gupeto i dye gudo. Jo mukene gutongo jang yadi otit. Gupeto bene i dye gudo, ci gudangnge ni: ‘Lubanga okony kor kabaka ma bino i nying Jehovah-ni!’
I kare macon i Icrael kabaka manyen onongo gibedo i wi latin kana ka gidonyo Jerucalem me nyutte bot lwak. Man aye gin ma Yecu tye ka timo. Dong lwak magi gitye ka nyuto ni gimito Yecu obed kabakagi. Ento pe dano ducu gimito en. Watwero neno man ki i gin ma timme ka Yecu ocito i ot pa Lubanga.
I ot pa Lubanga Yecu ocango jo ma lungolo ki luput. Ka lutino matino guneno man, gin gudangnge me pako Yecu. Man omiyo akemo omako lulam dog, ci guwaco bot Yecu ni: ‘In iwinyo gin ma lutino-ni gitye ka wacone?’
Yecu ogamo ni: ‘Ee, awinyo. Pe wukwano i Baibul ka ma waco ni: “Lubanga bimiyo pak kati ki i dog lutino matino?” ’ Pi meno lutino gumedde ameda ki pako kabaka pa Lubanga.
Wan wamito ni wabed calo lutino meno, pe kumeno? Jo mogo gire romo temo jukowa ki i tito lok i kom ker pa Lubanga. Ento wan wabimedde ameda ki tito bot jo mukene pi jami me aura ma Yecu bitimo pi dano.
I kare ma Yecu tye i lobo, kare onongo peya oromo pi en me loc macalo kabaka. Kare man bibino awene? Lupwonnye pa Yecu gimito ngeyone. Wabikwano lok iye i nge man.
