Ododo 91

Yecu Tye ka Pwony i Wi Got

NEN Yecu obedo kany. En tye ka pwonyo lwak magi ducu i wi got mo i Galilaya. Jo ma gubedo cok kwede tutwal-li aye lupwonnyene. En oyero jo 12 ki i kin-gi me bedo lukwena. Lukwena obedo lupwonnye pa Yecu ma dok gipat. In ingeyo nyinggi?

Onongo tye Cimon Petero gin ki ominne Anderiya. Ki dok onongo tye Yakobo gin ki Jon ma bene gubedo omego. Lakwena mukene bene kilwongo ni Yakobo, ki mukene bene onongo kilwongo ni Cimon. Lukwena aryo nyinggi Juda. Acel Juda Lakeriot, ki Juda mukene-ni bene kilwongo ki nying me Tadayo. Ki tye Pilipo gin ki Natanael (ma bene gilwongo ni Bartolomayo), ki Matayo gin ki Tomaci.

I nge dwogo cen ki Camaria, Yecu ocako tito lok pi tyen mukwongo ni: ‘Ker me polo dong onyiko cok.’ In ingeyo gin ma ker meno obedo? Man obedo gamente pa Lubanga kikome. Yecu aye kabakane. En biloc ki i polo ci kelo kuc i wi lobo. Ker pa Lubanga biloko wi lobo ducu doko paradic ma mwonya adada.

Kany Yecu tye ka pwonyo dano lok i kom ker pa Lubanga. En tye ka tito ni: ‘Man aye kit ma myero wuleg kwede. Wonwa ma tye i polo, nyingi myero kiwor. Wek ker meri obin. Wek kiti gin ma i mito i lobo, kit ma kitiyo i polo.’ Jo mapol gilwongo man ni ‘Lega pa Rwot.’ Jo mukene gilwongo ni ‘Wonwa ma i Polo’ Itwero waco lega-ni ducu?

Yecu bene tye ka pwonyo lwak kit ma myero gubed kwede ki luwotgi. En owaco ni: ‘Tim bot jo mukene gin ma imito ni gin gutim boti.’ Pe ber boti ka jo mukene gibedo kwedi maber? Pi meno, Yecu tye ka waco ni omyero wabed maber ki jo mukene. Itamo ni kwo pe bibedo mamwonya tutwal i paradic ka jo ducu bitimo man?

Matayo cura 5 nio wa i 7; 10:1-4.