Ododo 100

Yecu i Poto

INGE weko kicika ma malo-ni, Yecu ki lukwenane gucito woko i poto me Gececemane. Con kong gin gubedo ka bino kany tyen mapol. Kombeddi dong Yecu owaco botgi ni gubed ma wanggi twolo dok gulegi. Ci en ocito anyim manok, okulo wange piny wa i ngom ka lega.

Lacen Yecu odwogo cen ka ma lukwenane gitye iye. In itamo ni gin gitye ka timo ngo? Gin gunino woko! Yecu owaco botgi tyen adek ni myero gubed ma wanggi twolo, ento kare mo keken ma en dwogo, en nongo ni gitye ka nino. Tyen me agikki ma Yecu odwogo en owaco ni: ‘Wutwero nino nining i cawa ma kit man? Cawa dong oromo woko me miya i cing lukworra.’

I cawa meno cutcut woo pa lwak dano mapol dong twero winye. Nen! Co-ni gitye ka bino ki pala lucwan ki odoo! Dok gutingo mac raa me menyo piny. Ka gunyiko cok, ngat mo oa ki i kin lwak-ki ci obino wa bot Yecu. En odoto leme, kit ma itwero neno kany-nyi. Laco-ni aye Juda Lakeriot! Pingo en doto lem Yecu?

Yecu openyo ni: ‘Juda, in imiya i cing lukworra ki doto lem?’ Ada, doto lem-mi aye lanyut. Miyo jo ma gitye gin ki Juda-ni ngeyo ni man aye Yecu, laco ma gin gimito-ni. Pi meno lukwor pa Yecu gubino ka make. Ento Petero pe biye ni guter Yecu labongo lweny. En owoto pala lucwan ma onongo obino kwede ci otongo laco mo ma cok ki en. Pala lucwan obwot ki wi laco-ni manok ci onguno ite tung acuc woko. Ento Yecu ogudo it laco-ni ci ocango woko.

Yecu owaco bot Petero ni: ‘Dwok pala lucwanni kakare. Itamo ni an pe atwero penyo wora wek ocwal lumalaika alip mapol me larra?’ Ada, en twero! Ento Yecu pe openyo pi lumalaika mo, pien en ongeyo ni kare oromo pi lukworre me tere. Pi meno en oye ni gutere. Wanenu kong dong gin ma timme i kom Yecu kombeddi.

Matayo 26:36-56; Luka 22:39-53; Jon 18:1-12.