Kitweyo Yucepu i Mabuc
Ododo 22
Kitweyo Yucepu i Mabuc
YUCEPU onongo tye ki mwaka 17 keken i kare ma gitere Ejipt. Ki kunnu kicate bot laco mo ma nyinge Potipar. Potipar tiyo bot kabaka me Ejipt, ma kilwongo ni Parao.
Yucepu tiyo matek pi laditte Potipar. Pi meno i kare ma Yucepu odoko madit, Potipar okette me loyo ode ducu. Pingo kono dong Yucepu tye i mabuc kany? Pi dako pa Potipar.
Yucepu odongo odoko laco maleng ma neno mit atika, ci dako pa Potipar mito ni Yucepu obut kwede. Ento Yucepu ngeyo ni man rac, dok en pe ebitimo meno. Dako pa Potipar iye wang adada. Pi meno i kare ma cware odwogo paco, en obwole kun waco ni: ‘Yucepu ma kite rac-ci otemo buto kweda!’ Potipar oye lok pa dakone, ci iye owang adada i kom Yucepu. Pi meno en omiyo kibolo Yucepu i mabuc.
Cutcut ngat ma loyo mabuc oniang woko ni Yucepu obedo dano ma kite ber. Pi meno en okette me loyo lumabuc mukene ca ducu. Lacen kiniga omako Parao i kom lamak kikopone, ki lated mugatine, ci otweyogi i mabuc. I dyewor mo acel gin aryo-ni guleko lek ma dok pat, ento onongo pe gingeyo te lekgi-ni. I nino ma lubo meno Yucepu owaco ni: ‘Wutitta lekwu-ni.’ Ka gutitte, pi teko pa Lubanga, Yucepu ogonyo te lekgi-ni.
Yucepu owaco bot lamak kikopo ni: ‘I nge nino adek kibigonyi woko ki i mabuc, dok ibidoko lamak kikopo pa Parao odoco.’ Pi meno Yucepu omedo ni: ‘Ka ikato woko, lok bot Parao pira, ci ikonya wek aa woko ki i kabedo man.’ Ento bot lated mugati, Yucepu owacci: ‘I nge nino adek keken Parao obimiyo kingolo nguti kinguno woko.’
I nge nino adek otimme kit macalo Yucepu owaco kwede. Parao omiyo kingolo ngut lated mugati woko. Lamak kikopo gire kigonye woko ki i mabuc ci ocako tic bot Parao odoco. Ento lamak kikopo wiye owil woko i kom Yucepu! En pe oloko pi Yucepu bot Parao, ci Yucepu obedo gire i mabuc.
