Ododo 23

Lek pa Parao

MWAKA aryo okato, Yucepu pud tye i mabuc. Lamak kikopo-ni pud peya wiye opo i kome. Ci i dyewor mo acel Parao oleko lek aryo mapat tutwal, dok en obedo ka tamo te lek magi. In itye ka neno ka en obuto kenyo? Orwone Parao olwongo luryekone ci otitigi jami ma eleko-ni. Ento gin onongo pe giromo gonyo te lekke.

I kare meno wi lamak kikopo olo twal dong opo i kom Yucepu. En owaco bot Parao ni: ‘I kare ma onongo atye i mabuc onongo tye laco mo kunnu ma twero gonyo te lek.’ Parao otugi miyo gikelo Yucepu woko ki i mabuc.

Parao otito lekke bot Yucepu ni: ‘Aneno dyangi abiro, mabeco mucwer. Ci dok aneno dyangi abiro mujony lingok ma gudong cogo nono. Ci dyangi ma gujony-nyi gucamo mucwer-ni woko.

‘I lekka me aryo aneno wit kal abiro ma ocek mabeco ma gitye ka dongo i tyen kal acel. Dok i ngegi aneno wit kal abiro mutwo ma wigi tino. Ci wit kal matino-ni omwonyo wit kal mabeco-ni woko.’

Yucepu owaco bot Parao ni: ‘Te lek aryo-ni ducu tye acel. Dyangi abiro mucwer-ni ki wit kal abiro ma wigi dongo-ni cung pi mwaka abiro, dyangi abiro ma gujony-nyi ki wit kal abiro matino-ni cung pi mwaka abiro mukene. Mwaka abiro bibino ma cam bicek tutwal i Ejipt. Ci dok mwaka abiro mukene bibino ma cam bicek manok adada.’

Pi meno Yucepu owaco bot Parao ni: ‘Yer laco maryek ci ikete wek olo wi tic me coko cam i kare me mwaka abiro mabeco-ni. Ci dano pe gibito ki kec i kare me mwaka abiro maraco ma cam bicek iye ma nok tutwal-li.’

Parao omaro tam-mi. Dok en oyero Yucepu me coko cam, ki me gwokone. Yucepu odoko dano ma pire tek tutwal i Ejipt, ma rwomme lubo pa Parao.

Lacen i nge mwaka aboro, i kare me kec, Yucepu oneno co mogo tye ka bino. In ingeyo nga ma gin gubedo? Gin gubedo omegine 10 madongo ca! Won-gi Yakobo ocwalogi Ejipt pien camgi onongo dong cok tum woko ki paco i Kanaan kuja. Yucepu ongeyo omegine woko, ento gin pe gungeyo en. In ingeyo pingo? Pien Yucepu odongo odoko madit, dok en orukke ki kit bongo mapat.

Yucepu wiye opo ni ma pud en awobi matidi onongo eleko ni omegine gubino gugungo piny i nyime. Wi po kwano meno? Pi meno Yucepu dong ocako neno ni Lubanga aye ma ocwalle i Ejipt, pi tyen lok maber. In itamo ni Yucepu obitimo ngo? Kong wanenu.

Acakki 41:1-57; 42:1-8; 50:20.