Ododo 14

Lubanga Otemo Niye pa Abraim

ITWERO neno gin ma Abraim tye ka timone kany? En tye ki pala dok nen calo en mito neko wode woko. Pingo en timo meno? Me acel, wanenu kong kit ma Abraim gin ki Cara gunywalo kwede latin awobigi.

Wi myero opo ni, Lubanga ocikogi ni gibinywalo latin awobi. Ento meno onongo nen calo pe twere, pien Abraim gin ki Cara onongo dong guti tutwal. Abraim kono onongo ye gire ni Lubanga twero timo gin ma nen calo pe twero timme. Ci ngo dong ma otimme?

I nge cikke pa Lubanga, mwaka acel kulu okato. Dong, i kare ma mwaka me dit pa Abraim oromo 100 ki mwaka me dit pa Cara oo 90, ci gunywalo latin laco ma nyinge Icaka. Lubanga gire ogwoko cikkene!

Ento i kare ma Icaka odoko dit, Jehovah otemo niye pa Abraim. En olwongo ni: ‘Abraim!’ Ci Abraim ogamo ni: ‘An a ene!’ Ci Lubanga owacci: ‘Kwany wodi, wodi acel keken-ni, Icaka, ci icit i wi got ma abinyutti. Ki kunnu nek wodi ci ityere woko calo gitum.’

Lok man ocwero cwiny Abraim adada, pien Abraim onongo maro wode tutwal. Dok wi myero opo bene ni, Lubanga onongo ociko ni lutino pa Abraim gibikwo i lobo Kanaan. Ento meno twero timme nining ka Icaka dong oto woko? Abraim pe oniang, kadi kit meno en pud owinyo Lubanga.

I kare ma en oo i wi got-ti, Abraim otweyo Icaka ci okette i wi keno tyer ma onongo en oyubo. Ci okwanyo pala me neko wode. Ento cutcut i cawa meno kikome lamalaika pa Lubanga olwongo ni: ‘Abraim, Abraim!’ Ci Abraim ogamo ni: ‘An a ene!’

Lubanga owacce ni: ‘Pe iwan nyo itim gin mo i kom awobi-ni. Kombeddi dong angeyo ni itye ki niye i koma, pien pe i kwero miyo wodi acel keken-ni bota.’

Kit ma Abraim obedo ki niye madit tutwal kwede i kom Lubanga! En obedo ki niye ni pe tye gin mo ma loyo Jehovah, dok ni Jehovah onongo bene twero cero Icaka woko ki i to. Ento onongo pe obedo miti pa Lubanga ni Abraim onek Icaka. Pi meno Lubanga omiyo romo omoko i latin yat mo ma cok kenyo, ci en owaco ki Abraim ni otyer meno aye ma ka wode.

Acakki 21:1-7; 22:1-18.