Yakobo Ocito Karan
Ododo 18
Yakobo Ocito Karan
IN NGEYO jo magi ma Yakobo tye ka lok kwedgi-ni? I nge wot pi nino mapol, en orwatte kwedgi i nget wang it mo. Gin onongo gitye ka gwoko romigi. Yakobo openyo ni: ‘Wun wua ki kwene?’
Gin guwaco ni: ‘Karan.’
Yakobo openyo ni: ‘Wun wungeyo Laban?’
Gin gugamo ni: ‘Ee. Nen nyare Lakeri ca tye ka bino ki romine.’ Itwero neno Lakeri ka bino ki cen kuca ca?
I kare ma Yakobo oneno Lakeri ki romi pa nerone Laban, en ocito ci oloro kidi woko ki i dog wang it wek romi gumat pii. Ci Yakobo onoto lem Lakeri ci otitte nga ma en ebedo. Cwiny Lakeri obedo ma yom adada, en odok paco ci otito lok man bot Laban.
Laban iye obedo yom adada me bedo ki Yakobo i pacone. Dok i kare ma Yakobo openyo me nyomo Lakeri, Laban obedo ki yomcwiny tutwal. Ento en owaco ni Yakobo oti i potone pi mwaka abiro pi Lakeri. Yakobo otimo meno pien en onongo maro Lakeri tutwal. Ento ma kare me nyom oromo, ingeyo gin ma otimme?
Laban omiyo nyare Lea bot Yakobo ma ka Lakeri. I kare ma Yakobo oye me tic bot Laban pi mwaka abiro mukene, Laban bene omiye Lakeri macalo dakone. I kare meno Lubanga oye ni co obed ki mon makato acel. Ento kombeddi, kit ma Baibul nyuto kwede, laco myero obed ki dako acel keken.
