1. Pingo cobo ticci me i ot tye gin matek tutwal i kare-ni?

 ‘LOBO kit ma tye kwede-ni tye ka lokke.’ (1 Jo Korint 7:31) Lok man kicoyo mwaki mukato 1,900 angec, dok adane tye ka cobbe i kare-ni! Jami tye ka lokke, tutwalle i lok madok i kom kwo pa jo me ot. Jami ma onongo kinenogi ni ber mwaki 40 nyo 50 angec dong pol kare pe kiyegi i kare-ni. Pi meno, cobo tic ma mitte i ot i yo maber romo bedo gin matek adada. Ento, ka ilubu tira me Ginacoya, ci iromo cobogi.

2. Peko me can lim tye ka kelo lyeto ango i kom jo me ot?

² Jo mapol i kare-ni pe giyeng ki kwo me ot ma nongo gibedo ki jami manok. Pien lobo man me cato wil-li yubo jami madwong ata dok jone tiyo ki dirogi me miyo kwena me cato wil me temo bito dano, wege ki mege milion mapol gicwalo cawa malac i dog tic wek ginong cente me wilo jami magi. Lunywal milion mukene gitute nino ki nino wek ginong ginacama mo. Myero gucwal cawa malac i dog tic ma kato kare macon, kare mukene gitiyo tic aryo mapat pat wek okonygi me wilo jami ma mitte keken. Cwiny jo mukene bedo yom me nongo tic, kit macalo nongo tic obedo twon peko ka ducu-ni. Ki lok ada,  kwo me ot pe yot i kare-ni, ento cik me Baibul romo konyo jo me odi me tute matek kit ma gitwero kwede.

3. Lok ango ma lakwena Paulo otito, dok ketone i tic romo konyo ngat moni me cobo ticce me ot nining?

³ Lakwena Paulo obedo ki peko me can lim. En otito pwony ma en onongo i kit me cobo peko man i waragane ma ocoyo bot lareme Temceo. Paulo ocoyo ni: “Wan yam pe wakelo gin mo i lobo kany, dok bene pe wabitwero tero gin mo ka waa ki i lobo. Ento ka watye ki cam ki ginaruka, jami magi romowa gire.” (1 Temceo 6:7, 8) Tye gire ni, jo me ot pe gimito cam ki ginaruka keken. Gimito bene kabedo ma myero gibed iye. Lutino myero gucit i gang kwan. Ki cente me ot yat ki dong jami mukene ma mito cente. Ento, lok ma Paulo ocoyo-ni pud tiyo. Ka wayeng ki nongo jami ma mitte ento pe jami ma wamito, ci kwo bedo yot.

4, 5 Tamo tam anyim ki goyo pulan con konyo me cobo tic me i ot nining?

⁴ Lok mukene ma konyo nonge i lapor acel ma Yecu omiyo. En owacci: “Anga i kinwu ka mito gero ot ma winye bor, ci pe kong kwongo bedo piny ka kwano wel lim ma mitte, ka ce etye kwede ma eromo tyekone?” (Luka 14:28) Yecu onongo tye ka lok i kom tamo tam anyim ki goyo pulan con. Waneno i dul acel ma okato angec kit ma man konyo kwede ka jo mo matino gimito nyomme. Man bene konyo i kit me cobo tic me i ot i nge nyomme. Tamo tam anyim i lok man kwako goyo bajet ki pulan con wek kiti ki jami ma tye ki ryeko. I yo ma kit man, jo me ot moni gitiyo ki centegi maber, kun gigwoko me wilo jami  ma pigi tego nino ducu nyo cabit ducu, wek pe gikwo kwo ma kato cente ma gitye kwede.

⁵ I lobe mukene, goyo bajet ma kit meno mito lweny ki miti me deno cente pi wilo jami ma konygi pe ka i ngeye iculo ma wiye kato madit. I lobe mukene, goyo bajet obedo ngeyo kit me tic ki cente i yo maber. (Carolok 22:7) Man bene kwako lweny ki miti me wil ma pe iyubbe iye—wilo gin mo atura pien cwinyi opukke iye, labongo tamo ka ce mitte ki adwogine. Medo i kom meno, goyo bajet miyo nen ka maleng ni balo cente i jami calo goyo cente, mato taa, ki mato kongo i yo marac kelo peko me cente bot jo me ot, dok bene pe rwatte ki cik me Baibul.—Carolok 23:20, 21, 29-35; Jo Roma 6:19; Jo Epeco 5:3-5.

6. Ginacoya mene ma romo konyo jo ma gikwo ki can?

⁶ Ento jo ma piny odiyogi me kwo ki can kono? Gin giromo nongo kwe cwiny me ngeyone ni peko ma tye i lobo-ni tye pi kare mo manok. I lobo manyen ma tye ka bino oyot tutwal-li, Jehovah bijwayo can ki jami maraco ducu ma kelo cwercwiny bot dano. (Jabuli 72:1, 12-16) Ento i kare-ni, kadi bed Lukricitayo me ada lucan adada, pe dok giwinyo marac tutwal, pien gitye ki niye i cikke pa Jehovah ma wacci: “Pe abiboli, pe abibwoti ata.” Pi meno, dano muye romo waco ki tek cwiny ni: “Rwot [Jehovah] en lakony mera, pe abibedo ki lworo.” (Jo Ibru 13:5, 6) I kare man ma kwo tek tutwal-li, Jehovah konyo jone ma wore i yo mapat pat ka ce gigwoko cikke kun giketo pi Ker-re bedo mukwongo i kwogi. (Matayo 6:33) Jo mapol i kingi giromo moko lok pa lakwena Paulo ma owacci: ‘Angeyo bedo ki gin manok, dok bene  angeyo bedo ki gin mabup, yengo matek makato kare, nyo ciro kec, bedo ki lonyo madwong nyo bedo ki can. Atwero timo jami ducu liweng pi Kricito ma miyo teko.’—Jo Pilipi 4:12, 13.

7. Lok pa Yecu mene ma ka kiketo i tic ci konyo me cobo tic me i ot i yo maber?

⁷ I agikki me ticce me pwony, Yecu owacci: “Mar lawoti macalo imarre keni.” (Matayo 22:39) Keto tira man i tic i kwo me ot konyo mada me cobo tic me i ot. Ka ineno mot, dok mono tye jo mo macok kwedwa ma wamarogi, ma kato jo me otwa  ma wabedo kwedgi—laco ki dako, lunyodo ki lutino? Jo me ot giromo nyutu mar i kingi nining?

8. Kiromo nyutu mar i ot nining?

⁸ Yo me acel aye ni dano acel acel me ot myero oti ticce ma mitte. Pi meno, omyero kipwony lutino me dwoko jami ma gutiyo kwede i kakare, oromo bedo bongi nyo toyi. Peto kabuto odiko ducu romo bedo gin matek, ento man miyo kony madit me cobo tic me i ot. Kono gire tye ni weko jami mogo matino tino ata pi kare mo manok pe twero genge, ento jo ducu giromo tic kacel me gwoko gang wek obed maleng ki dok lwoko jami i nge cam. Wackom, timo gin ma ngat moni maro keken, bedo ki kiniga kelo adwogi marac i kom dano ducu. (Carolok 26:14-16) Kitungcel, yomcwiny ki cwiny me mine ken miyo kwo bedo yot i ot. “Lubanga maro ngat ma miyo jamine ki yomcwiny.”—2 Jo Korint 9:7.

9, 10. (a) Tic ango ma pol kare tye i wi mon ot, dok man kiromo weko bedo yot nining? (b) Tam mupore ango ma kimiyo i kom tic me i ot?

⁹ Tamo pi jo mukene ki dong nyuto mar konyo me gengo kodi kwo mo ma obedo peko madit i paci mogo. Cakke i tekwaro, mege aye gubedo twon guti madit me kwo me paco. Gigwoko lutino, giyubo gang bedo maleng, gilwoko bongi, giwilo cam dok gitedo tedo bene. I lobe mukene, mon gipuro pur, gicato jami acama i cuk, nyo gimiyo kony i yo mapat pat me kelo cente i ot. Kadi wa ka ma onongo yam mon pe gitimo jami magi, peko odiyo mon milion mapol me nongo tic ka mukene mapat ki i gang. Min ot ma obedo mego ma tiyo matek i yo magi mito apwoya. En tiyo matek calo dako “makwiri” ma kitito pire i Baibul-li. En pe camo cam me wackom pien ‘en pe  lawackom.’ (Carolok 31:10, 27) Man kono pe te lokke ni dako keken aye myero oti tic me gang. Ka dako ki laco gutiyo tic i gang tic dyeceng lung, dako aye dok myero oti tic me ot kene ma nongo laco ki jo mukene me ot giywe megi mot? Pe kumeno. (Por ki 2 Jo Korint 8:13, 14.) Me laporre, ka mego tye ka tedo, cwinye bedo yom ka jo mukene me ot gikonye ki twomo pii, kelo yen, lwoko jami, wilo jami mogo, nyo yubo ot wek obed maleng. Ada, jo ducu myero gunywak i tic me ot.—Por ki Jo Galatia 6:2.

¹⁰ Jo mukene guromo wacci: “Ka ma abedo iye-ni, co pe tiyo kodi tic eno-ni.” Meno romo bedo lok ada, ento mono pe bedo ber ka kong itamo i kom lok man? I kare ma Lubanga Jehovah ocako te yub me bedo i ot, en pe opoko ni tic mogo bibedo pa mon keken. I nino mo acel ma lukwena ma gua ki bot Jehovah gulimo Abraim, en kikome onywako i tedo ki dok keto cam i nyim wele. (Acakki 18:1-8) Baibul miyo tam ni: “Co bene gumar mongi macalo gimaro komgi kengi.” (Jo Epeco 5:28) Ka i otyeno laco dong winyo ni eol dok mito ni eywe, ci dako kono nongo pe winyo kit meno, nyo gwok makato? (1 Petero 3:7) Pi meno, pe nongo mono pore dok bedo me mar ka laco okonyo i tiyo tic ma paco?—Jo Pilipi 2:3, 4.

11. I yo ango ma Yecu oweko lanen maber pi ngat acel acel me ot?

¹¹ Yecu obedo lanen maber loyo ma oyomo cwiny Lubanga dok en okelo yomcwiny bot luwote bene. Kadi bed en pe onyomo, Yecu obedo lanen maber bot co, mon wa ki lutino bene. En owacci: “Wod pa dano pe obino wek kitii pire, ento wek en etii,” pi  jo mukene. (Matayo 20:28, Baibol pa Katoli) Jo me odi ma gibedo ki kodi cwiny man pud dong ginongo yomcwiny ya!

12. Ngo ma Jehovah mito ki bot jo ma tiyo pire?

¹² Lok mukene me Baibul ma konyo me cobo lok me ot nonge i 2 Jo Korint 7:1. Ma kwanne ni: “Myero walonnye woko kekenwa i gin mo ducu ma cido komwa nyo cwinywa.” Jehovah jolo jo ma gilubu lok man, pien en mito ‘woro maleng ma cilo pe iye.’ (Yakobo 1:27) Dok jo me odigi bene ginongo adwogi maber ma lubbe kwede.

13. Pingo lengo pire tek i cobo tic me i ot?

¹³ Me laporre, Baibul niangowa ni nino bibino ma two dong bibedo pe matwal. I kare meno, “Pe tye dano mo ma bedo i lobowa ma biwaco ni: ‘An koma lit.’” (Icaya 33:24; Niyabo 21:4, 5) Ma peya nino meno  obino, jo me odi ducu omyero guyelle ki two kare ki kare. Kadi wa kom Paulo ki Temceo obedo lit. (Jo Galatia 4:13; 1 Temceo 5:23) Ento, ludaktar giwacci pol pa two kiromo gengogi. Jo me odi maryek giromo loyo ki i two mogo ma genge ka gigwokke ki i tim cilo me kom ki me cwiny. Kong wanenu kit ma man twere kwede.—Por ki Carolok 22:3.

14. Bedo leng i yo me kwo gwoko jo me ot nining ki i kom two?

¹⁴ Lengo me cwiny bene kwako bedo leng i kwowa. Kit ma ngene kwede, Baibul dongo rwom me kwo matir ento kwero tim me buto mo keken i kin jo ma pe gunyomme. “Kadi lutim tim kwele, . . . ki lutim abor, nyo jo ma buto ki co wadgi,  . . ker pa Lubanga pe bibedo megi.” (1 Jo Korint 6:9, 10) Lubu cik man pire tek tutwal pi Lukricitayo ma gikwo i lobo ma oballe me kare man. Timo man yomocwiny Lubanga dok konyo jo me ot pe me nongo two mogo ma kobo i yo me buto calo two jonyo, syphilis, nyac, ki dong chlamydia.—Carolok 7:10-23.

15. Mi lapor acel ma nyutu kit ma bedo labongo lengo me kom acel mo twero kelo two.

¹⁵ ‘Lonnye kekenwa i gin mo ducu ma cido kom’ gwoko jo me ot ki i two mukene. Two mapol bino ka lengo me kom nok. Lapor maber obedo mato taa. Mato taa pe balo adunu, bongo, ki yamo keken ento kelo two bene i kom dano. Dano milion mapol gito mwaka ki mwaka pien gumato taa. Kong itam lok man; dano milion mapol kono pe gutwo dok guto ma karegi pudi ka onongo gugwokke ki i kom gin meno ma ‘cido kom-mi’!

16, 17. (a) Cik mene ma Jehovah omiyo ma ogwoko jo Icrael ki i two mogo? (b) Jo me odi ducu giromo keto cik ma tye i Nwoyo Cik 23:12, 13 i tic nining?

¹⁶ Tam kong i kom lapor mukene. Mwaka 3,500  angec, Lubanga omiyo Cikke bot jo Icrael me konyogi wek guyub worogi ki dong kwogi me nino ducu. Cik meno okonyo me gwokogi ki i kom two kun miyogi tira mabeco me gwoko lengo. I kine tye cik acel ma loko i kom yiko konye, ma myero onongo ki um woko maber i nge gony wek kabedo ma dano kwo iye pe obed cilo. (Nwoyo Cik 23:12, 13) Cik macon meno pud tiyo maber adada. Kadi wa i kare-ni dano gitwo dok gito pien pe gilubu cik man. a

¹⁷ Ma lubbe ki cik ma tye i cik ma kimiyo bot jo Icrael-li, jo me odi myero gugwok ka  nget coron ki ot lwokgi maleng, i iye wa kiwoko ducu. Ka pe kigwoko ka nget coron dok dog coron pe kiumo, ci lwangi gipong kunu ka dong gitero kwidi me two i kabedo mukene me paco—wa i cam ma wacamo! Medo i kom meno, lutino ki ludito myero gulwok cingi i nge tic ki coron. Ka pe ci gidwogo ki kwidi me two i cingi. Ma lubbe ki lok pa dakta mo me lobo France, lwoko cing aye “pud tye yo acel maber loyo me gengo two me ic, ot yamo, nyo me del komwa.”

18, 19. Tam ango ma kimiyo pi gwoko lengo me gang kadi bed wakwo i kabedo me can?

¹⁸ Ada, gwoko lengo i kabedo ma can tye iye tek, tutwalle ka ce danone pe giparo. Kadi bed kit meno, tute me gwoko lengo kelo adwogi maber. Wilo cabun ki pii kacel ki tic manok loyo wilo yat ki culo cente i ot yat. Lwoko komi nino ducu konyo me gengo two. Lutino matino ki lukere omyero bene kilwokgi nino ducu; latin ma kome kicilo lwango maro pye i kome dok romo nongo two oyot. Pe iwek lwango opye i kom latinni nyo i wange, i ume, onyo owot i wi cam. Lwango tingo kwidi me two dok nyayo two. Ngulo laa ata bene nyayo two. Omyero kiyik yugi nyo kiwang woko.

¹⁹ Ka ikwo i kabedo macilo, tute me gwoko otti ki dye kalli maleng labongo konye pa lutino ki pa lee kit ma itwero kwede. Pe iwek lutino gukonye i dye kal. Kadi wa latin matidi bene kiromo pwonyone me konye i coron nyo cito ka konye i lum ci i ngeye me yikone woko. Ka ce ngat mo oruko war nyo cilipa, mono pe ber me lunyone ma peya en odonyo i ot? Omyero  bene igwok wang piiwu obed maleng. Kibyeko ni dano ma romo milion aryo gito mwaka ki mwaka pi two ma kubbe ki pii macilo ki kabedo macilo.

20. Ngagi ma myero gunywak i tic me gwoko ot wek obed maleng?

²⁰ Gwoko lengo me gang cung i wi dano ducu—mego, wego, lutino, ki welle. Megi lutino aboro mo i Kenya owacci: “Wan ducu dong wangeyo ngo ma myero watim.” Gang ma kigwoko bedo maleng kelo deyo i kom jo me ot ducu. Carolok mo me lobo Spain wacci: “Bedo lacan pe gengi gwoko lengo.” Lengo obedo lagony me yotkom pi jo me ot kadi bed ngat moni bedo i ot madit, gurofa ma jo mapol bedo iye, ot me rwom ma piny, nyo ot lum.

21. Ma lubbe ki Carolok 31:28, ngo ma miyo jo me ot bedo ki yomcwiny?

²¹ I lok i kom dako makwiri, Carolok wacci: ‘Ka lutinone gua malo gilwonge ni layomcwiny; cware bene lwonge ni layomcwiny, dok pakke matek.’ (Carolok 31:28) Awene ma ipwoyo iye jo me otti, ci pud ogik kwede? Wan ducu wamito pwoc ma kimiyo ma gudu cwinywa. Miyo pwoc konyo dako me ngeyone ni cware pwoyo ticce, dok bene tere calo dano ma pire tek. (Carolok 15:23; 25:11) Cwiny laco bene bedo yom ka dakone pwoye pi ticce ma en timo ka mukene ki dong i gang. Lutino bene giwinyo maber ka lunyodogi minigi pwoc pi tutegi i gang, i cukul nyo i kacokke.  Miyo pwoc manok timo gin madit adada! Wacci: “Apwoyo” mono tek tutwal? Obedo gin matidi, ento cuko cwiny jo me ot matek adada.

22. Ngo ma mitte pi jo me ot me “cung matek liking,” dok man kiromo timone nining?

²² Cobo tic me i ot pe obedo gin mayot pi tyen lok mapol. Kadi bed kit meno, pud romo cobbe gire maber. Carolok mo acel me Baibul wacci: “Gitwero gero ot pi ryeko, dok pi niang matut miyo cung matek liking.” (Carolok 24:3) Jo me ot ducu giromo nongo ryeko ki niango matut ka gitute me pwonyo miti pa Lubanga kun giketo i tic i kwogi. Tute me kelo yomcwiny bot jo me otwa pe obedo gin ma balo tekowa nono!