1. Pingo jo me odi ma gitye ki wat matek pire tek i kwo pa lwak?

 KWO me ot aye pud dong obedo yub ma orii loyo i lobo, dok tye ki kony madit atika i kwo pa dano. Cakke wa con i tekwaro, jo me odi ma gitye ki wat matek okonyo tutwal i jingo kwo pa lwak. Kwo me ot obedo yub maber loyo me pito lutino wek gudong gubed jo muteggi.

2-5. (a) Tit gwok ma latin nongo i ot ma yomcwiny tye iye. (b) Peko ango ma tye i odi mukene?

² Kwo me ot me yomcwiny miyo gwok maber. Tam kong i kom jo me ot ma gitye ki kwo maber. I cawa me cam me otyeno, lunyodo ma giparo pi lutinogi gibedo kacel kwedgi kun ginyamo jami mogo  mutimme i dyeceng. Lutino gitito ki yomcwiny bot wongi ki mingi gin mutimme i cukul. Bedo agonya kacel kit man miyo ginongo kero me yelle ki kwo me lobo-ni nino ducu.

³ I kwo me ot me yomcwiny, latin nongo ngeyo ni mine ki wonne gibigwokke ka kome lit, nyo gileyo gwokke aleya i dyewor. En ngeyo ni eromo cito bot mine nyo wonne ka nongo tam ki kony i kom peko ma mako en macalo latin. Man miyo latin winyo ni etye ki gwok maber kadi bed lobo-ni opong ki pekki mapol atika.

⁴ Pol kare ka lutino gudongo, ginyome dok gicako ot ma meggi. Carolok mo acel wacci: “Ngat moni niang ni etye ki banya madit bot lunyodone ka en onywalo latin ma mege.” Ki cwiny me pwoc kacel ki mar madwong, lutino ma dong gudongo gitemme me weko jo me odigi bedo ki yomcwiny, dok bene gigwoko lunyodogi ma nongo gitye ka tii, ma cwinygi maro bedo kacel ki likwayogi.

⁵ Gwok nyo kombeddi itye ka tam ni: ‘An amaro jo me oda, ento kwo me ota pe tye kit ma kitito malo-ni. An ki luota watye ki cawa me tic mapat pat dok rwattewa tek tutwal. Wamaro lok i kom peko me can lim keken.’ Onyo iwacci, ‘Lutinona ki likwaya gikwo i taun mukene dok pe anongo kare me nenogi’? Ada, pi jami matego ma kato teko pa jo me odi miyo polgi pe gitye ki kwo me ot mupore. Ento, tye jo mukene ma gitye ki yomcwiny i kwogi me ot. I yo ango? Tika tye mung mo me nongo yomcwiny i kwo me ot? Lagamme tye ni: tye. Ento ma peya wanyamo ngo ma mung meno obedo, omyero kong wagamu lapeny mo acel ma pire tek.

6. Kodi jo me ot mene ma kibinyamo i buk man?

⁶ Jo me odi polle nongo tye laco, dako, ki dong lutino. Ento, kodi jo me ot mukene dok onya i mwaki mukato ma cokcok-ki—jo me ot ma nongo lanyodone tye acel keken, nyo jo me ot ma nongo lanywal acel pe obedo kom lanywal kikome, nyo jo me ot ma lunyodone nongo pe gikwo kacel pi tyen lok mogo.

7. Jo me odi mukene gikwo nining?

⁷ I tekwaro mukene, jo me odi mapol gibedo ki wat matek ki wadigi. Ite yub man, lutino pol kare gigwoko kwaro ki dadagi ka twere, gimiyo kony, dok kubbe bedo tye ki wadigi ma pe gubedo wadi macok. Me laporre, jo me odi giromo miyo kony me gwoko ki dong culo kwan pa lakeyogi, okeyogi, nyo wadigi ma pe obedo wadi macok. Cik ma kibinyamogi i buk man tiyo bene wa i kom jo me odi ma gibedo ki wat matek ki wadigi.

8, 9. Peko ango ma tye i lobe mogo ma nyutu ni kwo pa jo me ot tye ka lokke?

⁸ Tye me cwercwiny ni kwo pa jo me ot i kare-ni tye ka lokke ento pe pi berre. Labolle nen i lobo India ka ma dako romo kwo kacel ki lupaco pa cware dok tiyo i te twerogi. I kare-ni, pe dong obedo gin me ur pi mon me lobo India me yenyo tic ka mukene. Ento kadi bed kit meno, pud kimito ni gucob ticgi ma mitte i paco ma lubbe ki tekwarogi. Dong lapeny ma dano gipenye kwede i lobe mapol tye ni, Dako ma tiyo ka mukene myero oti ma rom mene i paco ka i poro ki jo mukene me ot?

⁹ I lobe mukene, cik me tekwaro miyo jo me ot gibedo ki wat matek ki wadigi. Ento, kodi kwo ma kit  man tye ka doko goro pien peko me can lim ki kodi kwo pa Muni, ma jo me ot moni cung pigi kengi-ni, tye ka rwenyone woko. Pi meno, jo mapol gineno gwoko wadigi mutii calo yec mapek ento pe calo gin ma mito atima nyo macalo mot. Inongo ni lunyodo muteggi mogo kiterogi marac. Ki lok ada, uno ki dok weko jo mutii ata dwong i lobe mapol i kare-ni.

10, 11. Ngo ma nyutu ni kwo pa jo me ot tye ka lokke i lobe mapol?

¹⁰ Ket keny tye ka nya i kin piny. I kare mukato angec dano onongo ginyomme ci gibedo kacel nio wa i to. I kare-ni, dano ginyomme ento i nge kare manok keken keny ket woko ci giyenyo ngat mukene. Mukene ginyomme tyen mapol ento kenye bedo ka ket bene kumeno. Wel odi ma tye ki lunyodo acel keken tye ka medde.

¹¹ Nen calo dano mapol gitye ka weko kodi kwo me ot me tekwaro woko. Jo mukene pe ginyomme, ento ginywalo lutino mapol. Pol pa dano ginongo ni bedo kacel labongo nyomme ber loyo nyom. Kodi kwo man tye ka nen i twok lobo ducu.

12. Lutino gideno can nining pi alokaloka ma tye i kwo pa jo me ot i kare-ni?

¹² Lutino kono? I lobe mapol, lutino ma kinywalogi polle gubedo lutino luk, ma mogo anyira ma pud tino aye nywalogi. Anyira me mwaka apar wiye nongo gitye ki lutino ma wegigi patpat. Ripot ma a i twok lobo nyutu ni lutino milion mapol ma kabedogi pe gilak i dye taun ata; polgi ngweco ki gang pien kiunugi nyo jo me odi ma pe romo gwokogi ryemogi woko.

13. Pekki mapat pat ango ma tye ka balo yomcwiny i odi mapol?

¹³ Ada, jo me ot tye i lyeto. Medo i kom jami ma kititogi-ni, jemo pa lutino, nywaro lutino, lweny i kin  laco ki dako, mato kongo i yo marac, ki dong pekki mukene tye ka balo yomcwiny i odi mapol. Pol pa lutino ki ludito pe dong ginongo kuc ki gwok i kwo me otgi.

14. (a) Ki tung bot jo mukene, ngo ma tye ka kelo lyeto i kom jo me ot? (b) Lapilida mo me cencwari me acel oloko i kom kit pa dano me kare-ni nining, dok adwogi ango ma cobbe pa lokke okelo i kom jo me ot?

¹⁴ Pingo jo me ot tye i lyeto? Jo mukene gikok i kom mon pi peko ma jo me ot tye iye, ni gin bene dong gudonyo i dog tic. Mukene kok i kom kit pa dano ma oballe marac i kare-ni. Tyen lok mukene bene kinyutogi. Mwaki ma romo alip aryo mukato angec, lapilida mo muywek owacci lyeto magwar bibedo i kom jo me ot i kare ma en ocoyo ni: “Ento omyero iniang man ni, i kare me agikki, piny bibedo marac i kare mogo. Pien dano bibedo ka maro komgi kengi kun gibedo lumar lim, luwakke, lucac, lunywar jo mukene. Pe gibiwinyo lunyodogi, pe gibimiyo pwoc mo, gibibedo jo ma pe leng. Pe gibimaro dano wadgi, gibibedo jo ma pe timo kica bot dano, gibibedo lucok dog jo mukene, gibibedo jo ma mitgi pe jukke, jo ma ger ma gidag gin mo maber, luroro, jo ma tye atata ma pe giparo piny, jo ma gikette malo kengi ki wakke, jo ma maro yomcwiny ma ka maro Lubanga.” (2 Temceo 3:1-4) Nga ma romo bedo ki akalakala ni lok man pe tye ka cobbe i kare-ni? Mono, omyero dok wabed ki ur ni jo me odi gitye i lyeto kit ma jami magi tye ka timme i lobo-ni?

15-17. Buk mene ma kibinyutu ni tye ki mung me nongo yomcwiny i kwo me ot i buk man?

¹⁵ Tam ma kimiyo me nongo yomcwiny i kwo me ot katti ki ka mapol mapat pat. Ludito muteggi  mapol gimiyo tam i kit me kwo me ot me tekwaro. Peko ma tye aye ni tam pa lumi tam magi pe rwatte ki pa luwotgi, dok tam ma kineno ni tiyo tin diki nongo dok gineno ni pe tiyo.

¹⁶ Dong waromo nongo tira ma konyo jo me ot ki kwene? Tika iromo tamo ni buk mo ma kicoyo mwaki 1,900 angec twero konyi? Nyo itamo ni buk ma kit man nongo dong karene okato woko? Ada pa lok-ki tye ni, mung me nongo yomcwiny kikome i kwo me ot nonge i buk meno.

¹⁷ Buk meno obedo Baibul. Jami mapol nyutu ni Lubanga kikome aye omiyo kicoyo. Wanongo lok magi i Baibul: ‘Ginacoya ducu ma yam gicoyo, gicoyo pi teko pa cwiny pa Lubanga. Konyo me pwony, me juko dano, me tiro kit pa dano, me nyebo dano wek gulub kit ma atir.’ (2 Temceo 3:16) I buk man, wacuko cwinyi me tamo kit ma Baibul romo konyi kwede me ‘tiro jami ducu’ ka itye ka lweny ki lyeto kacel ki pekki ma jo me ot rwatte kwede i kare-ni.

18. Pingo pore me ye ni Baibul tye ki twero me miyo tira i lok kom nyom?

¹⁸ Ka gwok itye ki tam ni Baibul pe romo konyo jo me ot me nongo yomcwiny, ci tam i kom lok man: Ngat ma omiyo kicoyo Baibul aye Ocako te yub me nyom. (Acakki 2:18-25) Baibul wacci ngat meno nyinge Jehovah. (Jabuli 83:18) En Lacwec dok obedo ‘Won, ma en aye acakki me odi ducu.’ (Jo Epeco 3:14, 15, Baibol pa Katoli) Jehovah ocako neno kwo pa jo me ot cakke wa i acakki pa dano. En ngeyo pekki ma romo bino dok omiyo tira i kit me cobogi. Cakke con i tekwaro, jo ma guketo cik me Baibul i tic i kwogi me ot ki cwinygi ducu gunongo yomcwiny madit adada.

19-21. Jami mene ma obedo ka timme i karewa-ni ma nyutu ni Baibul tye ki teko me cobo pekki ma tye i nyom?

 ¹⁹ Me laporre, min ot mo i lobo Indonesia onongo maro tuku me goyo cente tutwal. Pi mwaki mapol en onongo pe gwoko lutinone adek maber dok cawa ducu nongo gitye ka daa gin ki cware. Lacen en ocako kwano Baibul. Mot mot dako-ni ocako ye gin ma kicoyo i Baibul. En odoko min ot makwiri i kare ma oketo tirane i tic. Tutene me keto cik me Baibul i tic okelo yomcwiny bot jo me ode ducu.

²⁰ Min ot mo i lobo Spain owacci: “Wacako nongo peko magwa i nyomwa i nge mwaka acel keken.” Mitigi gin ki cware onongo pe rom, dok onongo pe gimaro lok i kingi nikwanyo ka gitye ka daa aye. Kadi bed ni onongo gitye ki nyargi matidi, gin onongo gumoko tamgi me pokke woko i te cik. Ento ma peya meno otimme, kicuko cwinygi me kwano Baibul. Gukwano tira ma loko i kom laco ki dako ma gunyomme ci gucako ketone i tic. I nge kare manok, gucako lok i kingi maber, ci gucako bedo kacel ki yomcwiny i otgi.

²¹ Baibul konyo jo muteggi bene. Me labolle, nen kong gin mutimme i kom jo mo ma gunyomme me lobo Japan. Laco onongo obedo dano ma keco oyot dok kine mukene timo tim gero. Mukwongo, anyiragi gucako kwano Baibul kadi bed ni lunyodogi onongo dag kwangi-ni. Ingeye, laco odonyo i kwan kacel ki anyirane, ento dakone pud okwero woko. I nge mwaki mapol, en oneno adwogi maber ma lubu cik me Baibul okelo i otgi. Anyirane onongo gigwokke maber, dok cware bene odoko dano mamwol. Alokaloka man omiyo dako-ni ocako kwano Baibul pire kene, dok en bene onongo adwogi maber acel-lu i  kwone. Mego man ma oteggi-ni owaco tyen mapol ni: “Wadoko dong jo munyomme kikome.”

22, 23. Baibul konyo dano me lobe ducu me nongo yomcwiny i kwo me otgi nining?

²² Jo magi gitye i kin dano mapol ma gupwonyo mung me nongo yomcwiny i kwo me ot. Gin gujolo tira ma tye i Baibul dok guketo i tic. Calo jo mukene-ni, gin bene gikwo i lobo man ma tim gero, tim maraco, ki dong peko me can lim tye malyet iye-ni. Kadi bed gitye ki roc, ento ginongo yomcwiny i tutegi me timo miti pa Ngat ma ocako Te yub me ot. Kit ma Baibul waco kwede, Lubanga Jehovah aye ‘pwonyowa wek wabed maber, kun telowa i yo ma myero wawot iye.’—Icaya 48:17.

²³ Kadi bed coyo Baibul otum cok mwaki alip aryo angec, tirane pud tiyo wa i karewa-ni. Medo i kom meno, kicoyo pi dano ducu. Baibul pe obedo buk pa Muni. Jehovah “ocweyo rok ducu nia ki i kom dano acel,” dok i kabedo ducu, En ngeyo kit ma gicweyogi kwede. (Tic pa Lukwena 17:26) Cik me Baibul tiyo pi dano ducu. Ka iketogi i tic, in bene ibingeyo mung me nongo yomcwiny i kwo me ot.