1. Jehovah onongo tye ki yub ango pi jo me ot?

 IKARE ma Jehovah oribo Adam ki Kawa i nyom, Adam onyutu yomcwinye ki loko lwod mukwongo ma kicoyo i Leb Ibru. (Acakki 2:22, 23) Ento, yub pa Lacwec onongo pe tye me kelo yom cwiny bot dano keken. En onongo mito ni jo munyomme kacel ki jo me odigi omyero gutim mitine. En owaco ki jo aryo mukwongo-ni ni: “Wunywal, wunya, wupong lobo, wulo bene; dok wulo wa rec ma i nam, ki winyo me polo, ki gin ducu makwo ma giwoto i wi lobo.” (Acakki 1:28) Meno pud dong onongo obedo tic ma kelo adwogi maber adada! Kono onongo Adam ki Kawa gubed luwiny i lubu cik pa Jehovah ki cwinygi ducu, kono onongo gin kacel ki lutinogi gubedo ki yomcwiny madit atika!

2, 3. Jo me ot giromo nongo yom cwiny madit loyo i kare-ni nining?

² I kare-ni bene, ka jo me ot gitiyo gin ma Lubanga mito kacel, ci gibedo ki yom cwiny madit mada. Lakwena Paulo ocoyo ni: “Lworo Lubanga konyo i yo ducu, pien twero kelo botwa gum i kare man ki i kwo ma bibino i anyim, macalo Lubanga yam ociko.” (1 Temceo 4:8) Jo me ot ma gilworo Lubanga dok gilubo tirane ma tye i Baibul gibinongo yom cwiny i kwo me “kare man.” (Jabuli 1:1-3; 119:105; 2 Temceo 3:16) Kadi bed dano acel keken me ot moni aye  lubu cik me Baibul, kwogi kong bedo ber ber loyo ka ngat mo pe ma lubo.

³ Buk man dong onyamo cik ma igi lac me Baibul mapol ma kelo yomcwiny bot jo me ot. Oromo bedo ni ineno kinwoyo cik mogo i kabedo mapol i buk man. Pingo? Pien gubedo lok ada ma gikonyo pi ber bedo pa jo ducu, i kabedo mapat pat me kwo me ot. Jo me ot ma gitemme me lubu cik magi me Baibul ginongo ni ada lworo Lubanga “kelo botwa gum i kare man.” Kong dok wanenu cik angwen ma pigi tego maca odoco.

4. Pingo jukke ken pire tek i nyom?

⁴ Kabaka Solomon owaco ni: “Ka ce onongo pe itwero loyo kinigani, ci irom ki gang ma gimonyo ma gimuko celle gireto woko.” (Carolok 25:28; 29:11) “Loyo kinigani,” nyo jukke ken, pire tek pi jo ma gimito bedo ki yomcwiny i nyomgi. Ka iweko cwiny maraco, calo cwiny me akemo nyo miti me kom ma kelo lewic oloyi woko, ci bikelo pekki ma cobone tero mwaki mapol—meno nongo ka twero cobbe.

5. Dano ma tye ki roc twero dongo kit me jukke ken nining, dok man kelo adwogi ango?

⁵ Ngene kene ni, pe tye lakwaro Adam mo ma twero jukke kene maber adada. (Jo Roma 7:21, 22) Ento, jukke ken obedo but nyig ma nyak pi cwiny maleng. (Jo Galatia 5:22, 23) Pi meno, cwiny pa Lubanga binyako kit me jukke ken i kwowa ka ce walego pire, kun walubo tira mupore ma tye i Ginacoya, ki dok ka wamaro bedo ki jo ma nyutu kit man ento wakwero bedo ki jo ma pe ginyutu. (Jabuli 119:100, 101, 130; Carolok 13:20; 1 Petero 4:7) Lubo yo man bikonyowa me ‘bolo tim kwele woko,’ kadi bed watye i atematema. (1 Jo Korint 6:18) Weko wakwero tim me  gero ki dok bedo opii pa kongo. Ki dong watero jo ma robowa nyo kwo mogo matego mot. Walego ni wan ducu—kadi wa lutino—myero wapwonye me dongo but nyig me cwiny maleng man ma pire tek-ki.—Jabuli 119:1, 2.

6. (a) Yub ango ma Lubanga oketo madok i kom tela? (b) Ngo ma myero wi laco opo iye ka mito ni telane okel yomcwiny bot jo me ode?

⁶ Cik ma iye lac me aryo ma pire tek aye ye yub me tela. Paulo onyutu yub ma tye madok i kom tela i kare ma owaco ni: “Amito wunge ni wi laco acel acel en aye Kricito, wi dako aye cware, ki wi Kricito aye Lubanga.” (1 Jo Korint 11:3) Man nyuto ni laco aye telo wi jo me ode, dakone cwako telane, kun lutino gibedo luwiny bot lunyodogi. (Jo Epeco 5:22-25, 28-33; 6:1-4) Nge ni, tela kelo yom cwiny keken ka kitero i yo maber. Co ma gilworo Lubanga gingeyo ni tela pe obedo loc me gero. Gilubo lanen pa Yecu, ma en aye Latel wigi. Kadi bed ni Yecu onongo myero obed ngat ma “loyo jami ducu,” en “pe obino ni gitine, ento ni wek en aye eti ki dano.” (Jo Epeco 1:22; Matayo 20:28) I yo acel-lu, laco ma obedo Lakricitayo telo tela, pe pi ber bedone keken, ento pi cobo miti pa dakone ki lutinone.—1 Jo Korint 13:4, 5.

7. Cik mene me Baibul ma konyo dako me cobo tic ma Lubanga omiye i ot?

⁷ Ki tung bot mon, dako ma lworo Lubanga pe bedo ki miti me pyem nyo yenyo yo me loyo wi cware. Cwinye bedo yom me cwako kor cware dok me tic kacel kwede. I kare mukene Baibul waco ni “rwod” dako munyomme aye cware, ma miyo wangeyo labongo akalakala mo ni cware aye latel wiye. (Acakki 20:3, NW) Nyom weko dako bedo i te “cik pa cware.”  (Jo Roma 7:2) Baibul lwonge bene ni “lakony.” (Acakki 2:20) En nyutu kodi kit ki dok kero mogo ma cware pe kwede, dok teno kor cware. (Carolok 31:10-31) Baibul bene waco ni dako obedo ‘lawot’ cware ma gitiyo kwede kacel. (Malaki 2:14) Cik magi me Baibul konyo laco ki dako me nyutu pwoc pi rwom ki tic pa ngat man ki dong me tero ngat man ki woro dok ki deyo.

8, 9. Tit kong cik ma igi lac mogo ma romo konyo jo ducu me ot me dongo kit me loko lok i kingi.

⁸ I buk man, kinyuto tyen mapol ni jo me ot myero gubed ma giloko i kingi. Pingo? Pien pekki cobbe maber ka moni loko bot lawote dok winyo lok ma lawote loko. Kinyuto tyen mapol ni kodi lok ma kit man pe bedo latung cel keken. Lakwena Yakobo oloko iye kit man ni: “Dano acel acel myero owiny lok oyotoyot, ento pe myero orune me gamone.”—Yakobo 1:19.

⁹ Pire tek bene ni wagwokke i kit ma waloko kwede. Rune i lok, daa, nyo waco lok ma cwero cwiny dano pe obedo yo me nywako lok maber. (Carolok 15:1; 21:9; 29:11, 20) Kadi bed ni waloko gin matir, ka waloko i yo me gero, awaka, nyo labongo paro pi dano, ci lokwa-ne pe bedo me kony ento me racce aye. Lokwa myero obed mamit, “ma kado oromo maber.” (Jo Kolocai 4:6) Lok ma waloko myero obed “calo jabu ma gimwono i kom ryal.” (Carolok 25:11) Jo me ot ma gupwonyo kit me loko lok maber i kingi rom ma nongo gucako wot i yo me yomcwiny.

10. Kodi mar ango ma pire tek i nyom?

¹⁰ Nyig lok ni “mar” okatti tyen mapol i buk man.  Wi mono pud po i kodi mar ma pire tek loyo ma waloko iye? Ada gire, mar ma bino pi miti i kin co ki mon (i leb Grik, eʹros) obedo gin ma pire tek mada i nyom, dok i kin jo munyomme maber, mar ma bedo i kin lurem macok (i leb Grik, phi·liʹa) bene myero odong i kin laco ki dakone. Ento ma dong pire tek loyo obedo mar ma i leb Grik gilwongo ni a·gaʹpe. Wadongo mar man pi Jehovah, Yecu, ki pi jiraniwa. (Matayo 22:37-39) Man aye obedo mar ma Jehovah nyutu pi dano. (Jon 3:16) Pud dong obedo gin maber mada ni wan watwero nyutu kit mar man bot luotwa ki dong bot lutinowa!—1 Jon 4:19.

11. I yo ma nining ma mar tiyo kwede pi ber bedo pa lunyom?

¹¹ I nyom, mar man me rwom ma malo-ni “tweyo jami ducu ribogi kacel ma cobo bene maber licwic.” (Jo Kolocai 3:14) Moko wat i kin luot dok weko gibedo ki miti me timo gin maber i kingi ki dok bot lutinogi. Ka jo me ot gitye ka lweny ki pekki mogo, mar konyogi me lweny kwede kacel. Ka luot dong gucako tii, mar aye konyogi me teno korgi kekengi ki dok me nyutu pwoc i kingi. “Mar . . . pe yenyo gin mukemo en kene. . . . Diyo cwinye i kom jami ducu, ye lok ducu, dok bedo ki gen i kare ducu, keto tek bene me ciro jami ducu. Mar pe gik.”—1 Jo Korint 13:4-8.

12. Pingo mar pa luot pi Lubanga jingo nyomgi?

¹² Wat i kin luot bedo tek tutwalle pe pi mar i kin jo aryo-ni ento pi mar pi Jehovah aye. (Latitlok 4:9-12) Pingo? Lakwena Jon ocoyo ni: “Pien maro Lubanga en aye gwoko cikke.” (1 Jon 5:3) Dong, luot myero gupwony lutinogi me lworo Lubanga pe ni pien ni gimaro lutinogi tutwal ento pien ni man obedo cik pa Jehovah. (Nwoyo Cik 6:6, 7) Luot myero pe gutim tim macilo pi mar ma gitye kwede i kingi keken ento pien gimaro Jehovah ma “bingolo kop i kom lutim  tim me abor ki jo ma balo nyomgi.” (Jo Ibru 13:4) Kadi ka dano acel i kin luot okelo peko madit i nyom, mar pi Jehovah biweko lawote medde ki lubu cik me Baibul. Jo me ot ma gicung matek pi maro Jehovah gitye ki yomcwiny madit!

13. I yo ango ma cung matek pi timo miti pa Lubanga konyo ngat moni me ciko wange i kom jami ma pigi tego?

¹³ Kwo pa Lakricitayo ducu cung i kom timo miti pa Lubanga. (Jabuli 143:10) Man aye gin ma lworo Lubanga ki cwinywa ducu obedo. Timo miti pa Lubanga bikonyo jo me odi me ciko wangi i kom jami ma pigi tego. (Jo Pilipi 1:9, 10) Me labolle, Yecu ocikowa ki lok man ni: “Abino me poko kin dano woko ki wonne, nyako bipokke woko ki minne, ki ci-wod bene bipokke woko ki dane. Lukwor pa dano bibedo jo ma i pacone.” (Matayo 10:35, 36) Gin ma Yecu  ociko-ni ocobbe, lulub kore mapol gulimo aunauna i cing jo me odigi. Tim ma kit meno kelo cwer cwiny adada! Ento, wat macok i kin jo me ot myero pe okat mar ma gitye kwede pi Lubanga Jehovah ki pi Yecu Kricito. (Matayo 10:37-39) Ka dano mo ociro adegadega ma jo me ot giketo i kome, luket ayela man giromo lokke ka guneno adwogi maber ma a ki i lworo Lubanga. (1 Jo Korint 7:12-16; 1 Petero 3:1, 2) Kadi bed jami ma kit meno pe otimme, pe tye gin mo maber ma wabinongo ka wajuko tic pi Lubanga pi adegadega.

14. Bedo ki cwiny me timo miti pa Lubanga konyo lunyodo me timo gin maber pi ber bedo pa lutinogi nining?

¹⁴ Timo miti pa Lubanga konyo lunyodo me moko tam matir. Me labolle, i kabedo mukene lunyodo gineno lutino calo cente ma ikano pi anyim, man miyo giketo gengi ni lutino aye bigwokogi i mwaka me tiyogi. Kadi bed ni pore pi lutino ma guteggi me gwoko lunyodogi ma dong gutii woko, tam ma kit man pe myero owek lunyodo gudwo wi lutinogi i kwo me yenyo jami me kom madwong. Pe bedo ber ka lunyodo gipwonyo lutinogi me tero jami me kom calo gin ma pire tek loyo jami me cwiny.—1 Temceo 6:9.

15. I yo ma nining ma min Temceo, Yuneki, obedo lanen maber macalo lanyodo ma otimo miti pa Lubanga?

¹⁵ Lanen maber i lok man obedo Yuneki, min Temceo ma obedo larem Paulo. (2 Temceo 1:5) Kadi bed Yuneki onongo onyomme ki laco ma pe obedo ngat muye, en, ki daa Temceo Loi, gupwonyo Temceo me bedo ki kwo me lworo Lubanga. (2 Temceo 3:14, 15) I kare ma Temceo odoko dit, Yuneki oye ki en me weko paco wek ocak tic me tito kwena me Ker-ri macalo lamiconari kacel ki Paulo. (Tic pa Lukwena 16:1-5) Omyero obed ni Yuneki obedo ki yomcwiny  madit adada i kare ma wode odoko lamiconari matek adada! Cwiny me lworo Lubanga ma Temceo obedo kwede onyutu ka maleng pwony maber ma en onongo i ka tinone. Adada, Yuneki onongo yengo kacel ki yomcwiny i winyo lok kom tic pa Temceo me ker-ri, kadi bed ni kine mukene gwok nyo onongo paro ni Temceo myero onongo obed gang kacel kwede.—Jo Pilipi 2:19, 20.

16. Macalo awobi madit, Yecu onyutu par ma opore nining, ento gin ango ma onongo pire tek loyo bote?

¹⁶ Yecu odongo i paco ma giworo iye Lubanga, dok i kare ma en oteggi, en onyutu par ma opore pi minne. (Luka 2:51, 52; Jon 19:26) Kadi bed kit meno, gin ma onongo pire tek loyo bot Yecu onongo obedo cobo miti pa Lubanga, man bene onongo kwako wa yabo yo me kwo me labed naka pi dano. En otimo meno ki tyero kwone ma roc pe iye wek odok ginkok pi dano ma lubal.—Marako 10:45; Jon 5:28, 29.

17. Kwo me anyim maber ango ma Yecu oyabo pi jo ma gitimo miti pa Lubanga?

¹⁷ I kare ma Yecu oto, Jehovah ocero en me kwo i polo kun miye twero madit, lacen oketo en macalo Kabaka i Ker me polo. (Matayo 28:18; Jo Roma 14:9; Niyabo 11:15) Gityer pa Yecu-ni oyabo yo pi dano mogo ma kiyerogi me loc kacel ki en i Ker meno. Oyabo bene yo pi jo mukene ma cwinygi atir me nongo mit pa kwo ma roc pe iye i lobo manyen me paradic. (Niyabo 5:9, 10; 14:1, 4; 21:3-5; 22:1-4) Mot madit ma watye kwede i kare-ni en aye me tito pi kwena maber man bot jiraniwa.—Matayo 24:14.

18. Tam ango me poyo wic ki cuko cwiny ma kimiyo bot jo me odi ki ngat acel acel?

¹⁸ Kit ma lakwena Paulo onyutu, jo ma gilworo Lubanga  gibedo ki gen ni dano twero nongo mot meno i kwo ma “bibino i anyim.” Adada, man aye pud dong obedo yo maber loyo me nongo yomcwiny! Wi opo ni, “lobo tum woko ki mitine ducu; ento ngat ma tiyo gin ma Lubanga mito ri nakanaka.” (1 Jon 2:17) Pi meno, kadi in ibedo latin nyo lanyodo, won ot nyo min ot, nyo dano ma tye kene ma tye ki lutino onyo pe, tute matek me timo miti pa Lubanga. Kadi bed itye i lyeto nyo i kwo matek, wi pe owil ni ibedo latic pa Lubanga makwo. Dong, wek kwoni oyom cwiny Jehovah. (Carolok 27:11) Walego ni yo me kwoni okel yomcwiny boti kombeddi ki kwo me labed naka i lobo manyen ma tye ka bino!