1, 2. (a) Yecu onyutu ni yubbe pire tek nining? (b) Gin ango ma yubbe dong mitte iye tutwal?

 GERO ot mito yubbe maber adada. Ma pud pe kicako te guti me ot, omyero kong kiwil lobo dok kigo pulan me ot. Ento, gin mukene dok mitte. Yecu owaco ni: “Anga i kinwu ka mito gero ot ma wiye bor, ci pe kong kwongo bedo piny ka kwano wel lim ma mitte, ka ce etye kwede ma eromo tyekone?”—Luka 14:28.

² Gin ma mitte pi gero ot bene mitte wek nyom moni obed maber. Dano mapol giwaco ni: “An amito nyomme.” Ento dano adi mono ma kong  gibedo piny me neno gin ma nyom kwako? Kadi bed ni Baibul loko maber i kom nyom, ento nyutu bene peko ma tye iye. (Carolok 18:22; 1 Jo Korint 7:28) Dong, jo ma gitye ki miti me donyo i nyom myero gubed ki neno matir i kom mot kacel ki peko ma tye i nyom.

3. Pingo Baibul obedo gin ma konyo jo ma gitye ka yubbe me nyomme, ki dok lapeny adek mene ma Baibul obikonyowa me gamone?

³ Baibul twero konyowa. Pwony ma iye kicoyo pi teko ma oa ki bot Lubanga Jehovah, ma obedo Lacak Te yub me nyom. (Jo Epeco 3:14, 15; 2 Temceo 3:16) Kong watiyu ki cik ma tye i buk man macon-ni me neno lok magi (1) Ngat moni romo ngeyo nining ni etye ma eyubbe me nyomme? (2) Kit dano ango ma myero me anyoma? ki (3) Kare me winye i kin lumit nyom mono giromo weko bedo me deyo nining?

4. Ngo ma obedo gin ma pire tek me gwoko nyomwa maber, dok pingo?

⁴ Gero ot romo tero cente madwong, ento gwokone pi kare malac bene mito cente madwong. Rom aroma ki nyom bene. Donyo i nyom nen gin matek; ento, gwoko wat me i ot mwaka ki mwaka bene myero kitam pire. Gwoko wat-ti kwako timo ngo? Gin acel ma pire tek en aye me moko i nyommi ki cwinyi ducu. Baibul loko kit man i kom wat ma tye i nyom: “Laco weko wonne ki minne, moko i kom dakone, gin aryo gidoko kom acel.” (Acakki 2:24) Yecu Kricito omiyo tyen lok acel keken i Ginacoya ma ye ki ngat moni me keto kennye  ki dong nyomo ngat mukene ka mito—“tim me tarwang,” ma obedo buto ki dano mapat ki ma onyomme kwede. (Matayo 19:9) Ka itye ki miti me nyomme, wi myero opo i kom lok me Ginacoya man. Ka pe itye atera me moko i nyommi, ci nongo pud pe itye ma iyubbe me nyom.—Nwoyo Cik 23:21; Latitlok 5:4, 5.

5. Kadi bed ni cikke me moko i nyom kelo lworo bot jo mukene, ento pingo jo ma gitye ki miti me nyom omyero gunen calo gin ma pire tek?

⁵ Tam man me moko i nyom-mi miyo lworo bot jo mukene. Awobi mo acel owaco ni: “Ngeyo ni wan aryo-ni omyero wabed kacel pi kwowa ducu omiyo awinyo calo ngat ma kirido wiye ka mading, ma ka kato pe.” Ento ka ada imaro ngat ma imito nyomone-ni, ci moko i kome pe binen calo yec mapek. Ma ka meno, binen calo gin ma gwokowu. Moko ma mitte i nyom-mi miyo jo aryo-ni bedo kacel i kare mabeco ki maraco-gu kun ngat acel konyo lawote kadi peko mo tye. Lakwena Paulo ocoyo ni mar me ada “diyo cwinye i kom jami ducu” dok “ciro jami ducu.” (1 Jo Korint 13:4, 7) Dako acel owaco ni: “moko ma mitte i nyom-mi miyo awinyo maber. Amaro kwe cwiny ma bino pi cikke ma wacikke i kinwa ki i nyim dano ni wabibedo kacel.”—Latitlok 4:9-12.

6. Pingo rune i nyom ma mwaka-ni pud tidi pe ber?

⁶ Cobo cikke me moko i nyom mito ngat muteggi. Pi meno, pe ber me nyomme ma nongo pud itidi ma miti me buto pud nyen dok tye matek ma umo wangi woko ki moko tam matir. Alokaloka mapat pat timme i kom jo matino ka gitye ka dongo. Dano mapol ma gunyomme ma gitino ginongo ni i nge  mwaka manok, mitigi kacel ki miti pa luotgi dong olokke woko. Gin ma kityeko kwedo ci kinongo nyutu ni jo ma ginyomme ki mwaka apar wiye pol kare pe gibedo ki yomcwiny dok giyenyo yo me keto kenygi woko ka kiporogi ki jo ma gikuro wang ma guteggi. Pi meno pe irune me nyom. Bedo labongo nyomme pi mwaki mo kadi bed ni dong idit miyo inongo ngec mapol ma bikonyi me doko ngat muteggi dok yubo kiti wek ka inyomo, ibed luot maber. Bedo keni pi kare mo olo romo bene konyi me ngene keni maber, ma obedo gin ma mitte adada pi dongo wat maber i nyommi.

7. Pingo jo ma gitye ki miti me nyomme myero kong gungine kekengi?

⁷ In mono inongo ni ryeyo kit dano ma imito nyomone yot? Pol pa dano ginongo ni yot. Ento, kiti keni kono? Kit ango ma itye kwede ma bikonyo nyommi me bedo maber? Kit laco nyo dako ango ma ibibedo? Me lapore, in tika iye bal ma itimo dok iye tira, nyo imaro pyem ka kinyuto balli? Tika ibedo dano ma cwinye yom ma neno anyim ki gen, nyo pol kare ibedo ma wangi col dok imaro nguru? (Carolok 8:33; 15:15) Wi myero opo ni, nyom pe biloko kiti. Ka ibedo lawaka, ngat ma keco oyot, nyo ngat ma cwinye pe yom ma peya inyomme, ibibedo kit meno bene ka dong inyomme. Ento, nene kekenwa i kit ma jo mukene ginenowa kwede tek tutwal, dong pingo pe ipeny tam pa lanyodoni nyo lawoti ma igeno? Ka iniang ni alokaloka mo mitte, tim ber ilokke ma peya idonyo i nyom.

8-10. Pwony mene ma Baibul miyo ma konyo ngat moni me yubbe pi nyom?

 ⁸ Baibul cuko cwinywa ni omyero wawek cwiny maleng pa Lubanga oti i kwowa, wek onyak nyig calo “mar, yomcwiny, kuc, diyo cwiny, kica, ber, gen, mwolo, gwokke ken.” Baibul wacciwa bene ni “wuwek Lubanga dong oroc tam me cwinywu odok manyen” dok “wuruk kit pa dano manyen ma giketo i cal pa Lubanga kikome i ada me kit ma atir ki maleng.” (Jo Galatia 5:22, 23; Jo Epeco 4:23, 24) Keto tira magi i tic ma peya inyomme rom ki coyo kodi i poto—ma ibikayo i kare me anyim, ka inyomme.

⁹ Me labolle, ka ibedo dako, ket cwinyi i kom “kit me cwiny ma pe nen” me ka ruk ma nen ki woko. (1 Petero 3:3, 4) Mwolo kacel ki wic makwiri bikonyi me bedo ki ryeko, man bedo calo ‘lalukana maber i wii.’ (Carolok 4:9; 31:10, 30; 1 Temceo 2:9, 10) Ka in laco, pwony kit me tero mon ki kica ki woro. (1 Temceo 5:1, 2) Ka itye ka pwonyo kit me moko tam maber ki kit me tiyo tic-ci calo laco, pwony bene kit me bedo mwol. Bedo ngat ma mito ni kiti ki tamme keken bikelo peko i nyom-mi.—Carolok 29:23; Mika 6:8; Jo Epeco 5:28, 29.

¹⁰ Kadi bed ni loko tammi wek ibedo kumeno pe yot, ento obedo gin ma Lukricitayo ducu omyero gutim. Bikonyi bene me bedo luot maber.

11, 12. Jo aryo mono gitwero ngeyo ka wigi rwatte nyo pe nining?

¹¹ Tekwarowu mono ye ni ngat moni myero oyeny ngat ma en mito nyomme kwede? Ka tye kit  meno, ci ngo ma myero itim ka inongo ni dano moni mwonya mada i wangi? Mukwongo, penye kekeni ni, ‘Mitina mono tye me nyom?’ Tuku ki cwiny dano kun imiyo en bedo ki gen ni imito nyomo en obedo gin marac adada. (Carolok 13:12) Ka dok, penye kekeni ni, ‘An mono dong atye ma atwero nyom?’ Ka lagammi pi lapeny aryo magi ducu tye ni ee, ci tim gin ma kitimo i kabedowu ma lube ki cik me tekwaro. I lobe mukene, i nge neno dano-ni pi kare mo olo, iromo wot bote ci iwacce mitini. Ka dano-nu okwero woko, pe imedde ki diyo en tek tek ma miyo cako dagi aye doki. Wi omyero opo ni, dano-nu bene tye ki twero me moko tamme i lok meno. Ka oye, ci wuromo yubbe me tero cawa i timo jami mogo kacel. Man bimini kare me neno ka dano-ni ber me anyoma. a Jami ango ma myero iket wangi me nenone i kare man?

¹² Me gamo lapeny meno, tam kong i kom jami aryo me goyo wer, calo lokeme ki adungu. Ka kiterogi maber, acel kene romo goyo wer ma winyone mit. Ento, ngo ma timme ka kimito goyo gin aryo-ni kacel? Myero dok kitergi ma dwan gin aryo-ni rwatte. Man rom aroma ki in ki ngat ma imito nyomone-ni. Ngat acel acel oromo bedo ni nongo otiyo matek me “tero” kite ma rwatte ki kwone. Ento lapeny ma tye en aye ni: Kwowu mono tye ma rwatte calo gin agoya ma kitero me kok kacel ma mit? Nyo ni wiwu tika rwatte?

13. Pingo cako winye me nyom ki ngat ma pe i niye obedo gin me mingo?

¹³ Pire tek ni niyewu ki cik ma wulubo myero  orwatte. Lakwena Paulo ocoyo ni: “Pe wuribbe kun wubedo kacel ki jo ma pe guye Yecu.” (2 Jo Korint 6:14; 1 Jo Korint 7:39) Nyomo dano ma pe ki niye i kom Lubanga pol kare miyo winye bedo pe i kinwu. Ki tung cel, woro Lubanga Jehovah obedo gin madit ma kelo note. Jehovah mito ni ibed ki yomcwiny ki dong wat matek ki ngat ma inyomo. En mito ni wumok i kome ki i komwu kekenwu calo tol adek me mar ma kiwiyogi kacel.—Latitlok 4:12.

14, 15. Bedo ki niye acel keken aye mono kelo note i nyom? Tit kong.

¹⁴ Kadi bed ni woro Lubanga kacel aye obedo gin ma pire tek loyo ma kelo note i ot, ento jami mukene bene mitte. Wek wubed calo gin agoya ma dwangi twero kok kacel, in ki dano ma ibinyomo-ni omyero wubed ki yub marom aroma. In itye ki yub ango? Me lapor-re, wun aryo-ni ducu wutamo ningo i kom nywalo lutino? Jami ango ma tye mukwongo i kwo-ni? b (Matayo 6:33) I nyom maber, jo aryo-ni gibedo lurem matek adada dok nongo giwinyo maber ka gitye kacel kadi bed ni i tekwarogi kodi bedo kit eno-ni pe kineno maber. (Carolok 17:17) Wek man otimme, mitigi myero orwatte. Bedo ki lirem matek pe yot—tutwalle i nyom—ka miti pe rwatte. Ket ni, ngat ma imito nyomone-ni maro jami calo wot me rwene ma ngat moni woto wa ka mabor ento in pe imaro, ci meno nongo nyutu ni wun omyero  pe wunyomme? Pe kumeno. Oromo bedo ni mitiwu rwatte i jami mukene ma pigi tego. Medo i kom meno, iromo kelo yomcwiny bot ngat ma ibinyomo-ni ki nywako kwede i timo jami ma en maro kadi bed ni in pe imaro.— Tic pa Lukwena 20:35.

¹⁵ Pol kare, ngeyo ni wiwu rwatte nen i kit ma ngat acel acel yelle me loko kwone wek orwatte ki pa lawote ento pe i kit ma kwowu rwatte kwede. Me kaka penyo ni, “Tika tamwa rwatte i jami ducu?” lapeny mogo mabeco romo bedo ni: “Ngo ma timme ka tamwa pe orwatte? Tika waromo nyamo lokke mot kun wanyutu woro i kinwa? Nyo nyamo lokwa pol kare o wa i laro lok malyet?” (Jo Epeco 4:29, 31) Ka imito nyomme, gwokke ki dano ma obedo lawaka, ma mito ni kiti ki tamme keken, nyo ma penyo jami tek tek dok tiyo ki diro wek mitine ocobbe.

16, 17. Ngo ma laco nyo dako romo ngiyone ka tye ka yenyo ngat ma myero enyom?

¹⁶ I kacokke pa Lukricitayo, jo ma gimiyogi tic “myero kong gikwong temogi.” (1 Temceo 3:10) In bene iromo tic ki cik ma iye lac man. Me laporre, dako romo penyo lapeny calo, “Laco man mono tye ki nying maber nyo pe? Angagi ma gubedo lureme? En tika nyutu cwiny me gwokke ken? En tero jo muti nining? En a ki i kit paco ango? En tye ki wat ango kwedgi? En neno cente nining? En mono mato kongo i yo marac? En tye ki akemo marac, latim tim gero bene? En tye ki tic ango i kacokke, dok timo ticce meno nining? Tika atwero miye woro matut?”—Lulevi 19:32;  Carolok 22:29; 31:23; Jo Epeco 5:3-5, 33; 1 Temceo 5:8; 6:10; Tito 2:6, 7.

¹⁷ Laco ma pud pe onyomme romo penyo ni, “Dako-ni tika nyutu mar ki woro pi Lubanga? En tika twero gwoko paco? Lupacone mono gibimito ngo ki botwa? En tika ryek, obedo latic matek dok ngeyo tic ki lim? En maro lok i kom ngo? Tika paro pi jo mukene, nyo paro pire kene, obedo ngat ma luto wiye i lok pa jo mukene? En genne? En tika ye mine i te loc, nyo wiye tek, obedo lajemo?”—Carolok 31:10-31; Luka 6:45; Jo Epeco 5:22, 23; 1 Temceo 5:13; 1 Petero 4:15.

18. Ka goro mogo matino tino onen i kare me winye-wu, ci ngo ma myero wiwu opo iye?

¹⁸ Wi myero opo ni itye ka tute ki lakwaro Adam ma tye ki roc. Ngat acel acel tye ki gorone, dong omyero pe waket cwinywa i kom goro ducu—goro ma meri ki pa ngat ma imito nyomone-ni. (Jo Roma 3:23; Yakobo 3:2) Medo i kom meno, goro ma tye romo miyowu kare me dongo i yo me cwiny. Me lapore, ka i kare me winye-wu laro lok obedo tye. Nge ni: Kadi wa jo ma gimare dok giwore bene kare mukene tamgi pe rwatte. (Por ki Acakki 30:2; Tic pa Lukwena 15:39.) Gwok nyo mitte ni wun aryo-ni myero ‘wudi kinigawu’ manok wek wupwony kit me tyeko lokwu mot ki kuc? (Carolok 25:28) Dano ma ibinyomo-ni mono nyutu cwiny me lokke? In kono? Iromo pwonyo kit me bedo dano ma pe keco oyot? (Latitlok 7:9) Pwonyo kit me cobo pekowu romo konyowu me bedo jo ma loko lok ma i cwinygi labongo kano lok mo ma man pire tek ka dong wunyomme.—Jo Kolocai 3:13.

19. Ngo ma nyutu ryeko ma iromo timone ka peko madongo ocako nen i kare me winyewu?

 ¹⁹ Ento ka ineno jami mogo ma yelo tammi adada kono? Omyero kong itam matut i kom gin ma kelo akalakala meno. Kadi bed ni itye ki miti madwong i kom dano-nu nyo imito nyomme oyot oyot, pe imi wangi i kom bal madongo. (Carolok 22:3; Latitlok 2:14) Ka itye ki akalakala madit i kom ngat ma itye ka winye kwede, ci juk winyewune woko dok pe idony i kit cikke mo keken ki dano-nu.

20. Jo ma gitye ka winye giromo gwoko kit me kwogi pe me kelo lewic nining?

²⁰ Iromo gwoko kare me winyewu bedo me deyo nining? Mukwongo, myero wunen ni kit me kwowu pe okel lewic mo. Ka ma wukwo iye, tika gineno mako cing, doto dog, nyo kwako kor calo jami mabeco pi jo aryo ma pud peya gunyomme? Kadi bed ni dano pe gineno kit me nyutu mar i yo magi marac, ento wuromo timone keken ka winyewu dong oo cok ki nyom adada. Wugwokke mada wek nyutu marwu pe oterwu wa i tim macilo nyo tim kwele. (Jo Epeco 4:18, 19; por ki Wer pa Solomon 1:2; 2:6; 8:5, 9, 10.) Kit ma cwiny dano en aye obedo gin ma bwolo dano-ni, wugwokke ki i bedo wun aryo keken i ot, i mutoka ma ocung kakene, nyo ka mo keken ma romo miyowu kare me timo tim marac. (Jeremia 17:9) Miyo winyewu bedo maleng nyutu maber ni in itye ka gwokke keni dok ni in iparo pi ber bedo pa lawoti ca-ni ma kato cobo mitini keni. Ma pire tek loyo aye ni, winye ma bedo  maleng yomo cwiny Lubanga Jehovah, ma ociko luticce me gwokke ki i tim caro ki tim kwele.—Jo Galatia 5:19-21.

21. Loko lok ma i cwiny ka maleng mitte pi weko winye bedo me deyo nining?

²¹ Me aryone, bedo ki winye me deyo bene kwako loko lok ma i cwinywu i kinwu. Ka winyewu dong cok o i nyom, myero wunyam jami mogo ka maleng. Wubibedo kwene? Wun aryo-ni ducu wubibedo ki dog tic? Wumito bedo ki lutino? Bedo ber bene pi ngat acel acel me tucu jami mogo ma otimme i kwone i angec ma romo gudo nyomgi. Romo bedo banya madongo nyo jami ma kwako yotkom, calo two mo matek ma itye kwede. Pien pol pa dano ma gitye ki HIV (kwidi ma kelo two jonyo) pe nyute i komgi cutcut, pe bedo rac pi ngat moni nyo lunyodo me waco ni omyero opim remo pi two AIDS, tutwalle ka dano-nu onongo yam obedo latim tarwang nyo obedo ka tucce ki jami calo jayigi-ni. Ka remo onyutu ni kwidi tye, ci dano ma tye ki kwidi-ni omyero pe orid lawote ma kome yot-ti wek gimedde ki winyegi ka ngat ca dong mito jukone woko. I ada, ngat mo keken ma okwo i yo ma pe genne i kare mukato angec omyero otim ber opim remone pi two jonyo ma pud peya ocako winye ki ngat mo.

22, 23. (a) I yo ango ma waromo moko tam marac ka watye ka yubbe pi nino me nyom? (b) Tam maber ango ma wiwa myero opo iye ka watye ka yubbe pi nino me nyom ki dong bedo i ot?

²² Ma nongo dong wudong ki dwe manok keken me nyomme, wun aryo-ni wubedo ki tic mapol  adada i yubbe pi nino me nyom. Wuromo bwot ki i bedo ki lyeto ki yubo yub me nyom ma pe lamal. Nyom ma lamal romo yomo cwiny wadi ki jirani, ento romo kelo olo ki banya madwong bot lunyom manyen ki lupacogi. Lubo kit me tekwarowu romo bedo ber, ento lubone i yo me pyem romo balo ninowu meno woko kacel ki yomcwiny ma myero wubed kwede. Kadi bed ni nywako tam ki jo mukene ber, ento moko tam i kom kit ma nino me nyomwu myero obed kwede cung i wi lanyom ma laco.—Jon 2:9.

²³ Wi myero opo ni nyom bedo nino acel keken, ento bedo i ot bedo pi kwowu lung. Pe iket cwinyi tutwal pi nino me nyom. Ma ka meno, wek Lubanga Jehovah otirri, dok ket yub pi kwo me bedo i ot con. Ka itimo meno, ci nongo dong iyubbe me bedo ki nyom maber.