Nicakke ma pud atidi onongo amaro cwec adada. Macalo jo me ot, onongo wamaro cito ka rwene i bwunga mogo ma nenogi mit ki dog nam ma mamwonya ma orumo taun ma wabedo iye, Jyväskylä, i Central Finland. Amaro lee bene adada. Ma pud atidi onongo amito ni akwak bwura ki gwoki ducu ma aneno! Ma adongo, onongo cwinya cwer adada ka aneno kit ma dano tero kwede lee ki gero. I nge kare mo, adonyo i dul pa jo ma ma lwenyo pi twero pa lee, dok arwatte ki jo ma onongo gineno lee calo an.

Wabedo ka lweny pi twero pa lee. Wamiyo ngec mogo bot dano dok wayubo dorre ki jemo i kom jo ma cato jami ma kiyubo ki laa nyo yer kom lee ki dong jo ma gitiyo ki lee me temo ka yat nyo jami ma guyubo tiyo maber. Wacako dul mukene bene ma gwoko lee. Wapoto i peko tyen mapol pi tutewa me lweny pi twero pa lee. Kimaka dok kitera i kot tyen mapol.

Medo i kom meno, cwiny ma atye kwede i kom lee oweko cwinya onongo cwer bene adada pi jami maraco mukene ma tye i lobo. Motmot, adonyo i dul mogo calo Amnesty International ki Greenpeace. Onongo acwalo kerona ducu me cwako yubgi. Onongo alwenyo pi twero pa lucan, jo ma pe gitwero nongo ginacama, ki dong jo ma tye i peko mukene mapat.

Ento acako niang motmot ni pe atwero loko lobo. Kadi bed dul magi gucobo pekki mogo matinotino, kom peko kikome onongo tye ka medde ameda. Onongo bedo calo tim maraco orumu lobo ducu dok pe tye ngat mo keken ma paro. Onongo awinyo calo pe dong atwero timo gin mo.

Cwinya otur adada pien onongo pe dong atwero timo gin mo, man oweko acako tam i kom Lubanga ki Baibul. Con onongo kong akwano Baibul ki Lucaden pa Jehovah. Kadi bed ni onongo amaro cwiny me kica pa Lucaden ki kit ma onongo giparo kwede pira, onongo pud pe atye atera me loko kwona. Ento i wang-ngi, jami onongo dong olokke woko.

Akwanyo Baibul ci acako kwanone. Dok man okweyo cwinya adada. Anongo tyeng mapol i Baibul ma pwonyowa me tero lee ki kica. Me labolle, Carolok 12:10 waco ni “Dano ma kite atir gwoko lee ma tye pacone maber.” Aniang bene ni Lubanga aye pe kelo pekki ma onya i lobo-ni. Me ka meno, pekkiwa tye ka medde ameda pien pol pa dano pe gilubo tela pa Lubanga. Cwinya obedo yom adada i kare ma apwonyo ni Lubanga lamar dok diyo cwinye.​—Jabuli 103:8-14.

I kare man bene anongo fom me penyo pi buk me Baibul Mono Ada Pwonyo Gin Ango? ci apenyo pi buk man. I nge kare mo manok, luot mo ma gitye Lucaden gubino ganga ci gupenyo ka amito kwano Baibul. Aye kwano Baibul dok acako cito i cokke pa Lukricitayo i Ot me Ker. Lok ada me Baibul ocako donyo i cwinya.

Baibul okonya me loko kwona. Ajuko mato taa ki mero. Aloko rukka ki kit ma aloko kwede. Aloko nenona i kom luloc pa gamente. (Jo Roma 13:1) Dok aweko tim tarwang ma onongo dong adonyo matut tutwal iye-ni.

Gin ma obedo tek loyo ducu me timone aye cako bedo ki neno matir i kom dul ma gilwenyo pi twero pa dano ki lee. Pe otimme nino acel. I acakkine, onongo awinyo calo obedo gin marac adada ka aweko dul magi. Ento aniang ni Ker pa Lubanga keken aye bicobo pekki me lobo. Amoko tamma me cwalo kerona ducu i cwako Ker meno ki konyo jo mukene wek gupwony lok i kome.​—Matayo 6:33.

Macalo ngat ma lwenyo pi alokaloka i lobo, onongo aneno dano ducu i dul aryo keken​—jo mabeco ki jo maraco​—dok onongo atye atera me timo gin mo keken i kom jo ma anenogi ni giraco. Ento Baibul okonya adada, pe dong atye ki cwiny me adegadega kit meno i kom dano. Me ka meno, atemme me dongo mar pi jo ducu. (Matayo 5:44) Atute me nyuto mar meno i yo mapatpat, me labolle, nywako lok i kom Ker pa Lubanga. Cwinya yom me neno kit ma tic man konyowa kwede me bedo ki kuc, yomcwiny, ki dong gen kikome pi anyim.

Atye ki kuc ki cwiny ma opye mot pien aweko jami ducu i cing Jehovah. Angeyo ni en macalo Lacwec, pe biye ni kiun dano ki lee pi naka, dok bene pe biye ni kibal lobo. Me ka meno, cokcok-ki en bitic ki Kerre me yubo jami muballe ducu. (Icaya 11:1-9) Atye ki yomcwiny madit adada pe pi ngeyo lok ada man keken ento me konyo bene jo mukene me bedo ki niye iye. Pe Dong Awinyo Calo Myero Atute me Loko Lobo.