PWONY ME 13
Kit ma Dini Goba Kelo Kwede Cac i kom Lubanga
Lubanga aye mar. Kadi bed kit meno, dini ma giwaco ni giloko pi Lubanga dok gitiyo pire gitimo jami maraco mapol. Man twere nining? Dini magi gubedo dini goba. Gin ma giwaco dok gitimo weko dano tamo marac i kom Lubanga. I yo ma nining ma gukelo kwede cac i kom Lubanga? En winyo nining i kom timgi meno? Dok en bitimo gin ango iye?
1. I yo ma nining ma pwony pa dini goba weko dano tamo marac i kom Lubanga?
Dini goba “guloko lok ada i kom Lubanga guwilo woko ki goba.” (Jo Roma 1:25) Me labolle, pol pa dini pe gipwonyo romigi ki nying Lubanga. Ento, Baibul waco ni omyero kiti ki nying Lubanga. (Jo Roma 10:13, 14) Lutela dini mogo giwaco ni ka gin mo marac otimme, nongo obedo yub pa Lubanga. Ento meno lok goba. Lubanga pe timo gin mo marac. (Kwan Yakobo 1:13.) Ki cwercwiny madit, goba ma dini magi giwaco oweko dano ginongo ni tek adada me maro Lubanga.
2. I yo ma nining ma jami ma dini goba timo weko dano tamo marac i kom Lubanga?
Dini goba pe tero dano kit ma Jehovah terogi kwede. Ka odok i kom dini goba, Baibul waco ni “balle dong odurre malo lipim, oo wa i polo.” (Niyabo 18:5) Pi mwaki miya mapol, dini mapol guroyo wigi i tim me wibye, gucwako lweny, dok guneko nyo gucwako to pa dano mapol ata. Lutela dini mogo gikwo kwo ma rwomme lamal dok gipenyo cente ki bot lulub korgi me culo pi kit kwo meno. Timgi meno nyuto ka maleng ni pe gingeyo Lubanga, pi meno pe gitye ki twero me cung pi Lubanga.—Kwan 1 Jon 4:8.
3. Lubanga winyo nining i kom dini goba?
Ka jami maraco ma dini goba timo cwero cwinyi, ci itamo ni Jehovah winyo nining i komgi? En maro dano, ento kiniga make i kom lutela dini ma gikelo cac i kom Lubanga dok gitero romigi marac. En ocikke ni ebijwero dini goba ducu dok ‘pe dong kibinongo matwal.’ (Niyabo 18:21) Ma pe orii, Lubanga bityeko dini goba ducu.—Niyabo 18:8.
NONG NGEC MATUT
Nong ngec matut i kom kit ma Lubanga winyo kwede i kom dini goba. Nen kong jami ma dini goba otimo, dok ipwony pingo meno omyero pe ogengi ki ngeyo Jehovah.
4. Lubanga pe cwako dini ducu
Pol pa dano giye ni dini obedo calo yo mapatpat ma tero dano bot Lubanga. Ento tika meno lok ada? Kwan Matayo 7:13, 14, ci wunyam lapeny man:
-
Gin ango ma Baibul waco i kom yo ma tero dano i kwo?
Tuk VIDIO, ci wunyam lapeny ma lubo.
-
Tika Baibul waco ni dini mapol giyomo cwiny Lubanga?
5. Dini goba pe ginyuto mar pa Lubanga
Dini goba gukelo cac i kom Lubanga i yo mapol. Gin acel marac adada ma gutimo aye rwako wigi i lweny. Me neno labol acel, tuk VIDIO. I nge meno wunyam lapeny ma lubo-ni.
-
Jami maraco ango ma kanica mapol gutimo i kare me Lweny me Wi Lobo me II?
-
Iwinyo nining i kom jami maraco ma gutimo-ni?
Kwan Jon 13:34, 35 ki 17:16. I nge meno wunyam lapeny magi:
-
Itamo ni Jehovah winyo nining ka oneno dini gidonyo i lweny?
-
Dini goba gutimo jami maraco mapol adada. Jami ango ma ineno ma moko ni dini magi pe gitye ka nyuto mar pa Lubanga?
Dini goba pe ginyuto mar pa Lubanga
6. Lubanga mito gonyo dano woko ki i dini goba
Kwan Niyabo 18:4, a ci wunyam lapeny man:
-
Iwinyo nining ka itamo i kom kit ma Lubanga mito laro kwede dano ma dini goba obwologi?
7. Medde ki pwonyo lok i kom Lubanga me ada
Tika omyero jami maraco ma dini goba giwaco dok gitimo ogud kit ma ineno kwede Lubanga? Go kong ni awobi mo okwero tam me ryeko ma wonne omine. Awobi-ni oa woko ki gang dok ocako kwo kwo marac adada. Wonne pe cwako tim maraco pa wode. Pingo itamo ni pe pore me kok i kom wego man pi kit ma wode tye ka kwo kwede marac?
-
Tika itamo ni pore me kok i kom Jehovah kun bene igiko pwonyo lok i kome pi jami maraco ma dini goba gitimo?
JO MOGO GIWACO NI: Pe atye ki miti mo me ngeyo Lubanga pien dini mapol ginywako i tim maraco adada.”
-
Tika meno aye kit ma iwinyo kwede?
-
Pingo tim maraco pa dini goba pe myero ogud kit ma waneno kwede Jehovah?
WOT WIYE WIYE
Dini goba gikelo cac i kom Lubanga ki pwony gobagi kacel ki timgi maraco. Lubanga bijwero dini goba woko.
Ngo ma ipwonyo?
-
Iwinyo nining i kom goba ma dini goba pwonyo kacel ki jami maraco ma gitimo?
-
Jehovah winyo nining i kom dini goba?
-
Gin ango ma Lubanga bitimo i kom dini goba?
TIM KWED
Nen kong yo aryo ma dini goba gicwero kwede cwiny Lubanga.
“Tika Dini Ducu Girom? Tika Gin Ducu Giterowa Bot Lubanga?” (Pwony ma tye i jw.org)
Pingo Jehovah mito ni wawore kacel ki jo mukene?
Padi mo cwinye obedo ka cwer pi tim pa dinine. Ento man pe ogenge ki pwonyo lok ada madok i kom Lubanga.
“Tyen Lok Mumiyo Padi Mo Oweko Kanicane” (Awake!, Febuari 2015)
Pi mwaki miya mapol, dini gubedo ka waco lok goba i kom Lubanga ma weko dano tamo ni en pe paro piwa dok cwinye col. Nen kong lok ada madok i kom goba magi adek.
“Goba ma Miyo Dano Pe Gitwero Maro Lubanga” (Wi Lubele, Novemba 1, 2013)
a Me niang pingo buk me Niyabo lwongo dini goba ni dako ma nyinge Babilon Madit, nen Lok me Giko Buk Man me 1.
