PWONY ME 14
Worowa Twero Bedo ma Yomo Cwiny Lubanga Nining?
Kit ma wanyamo kwede i pwony ma okato-ni, pe dini ducu giyomo cwiny Lubanga. Kadi bed kit meno, watwero woro Lacwecwa i yo ma yomo cwinye. “Dini [nyo yo me woro]” ma yomo cwiny Lubanga myero obed nining? (Yakobo 1:27) Nen kong gin ma Baibul pwonyo.
1. Worowa myero ojenge i kom gin ango?
Worowa myero ojenge i kom Baibul. Yecu owaco bot Lubanga ni: “Lokki en ada.” (Jon 17:17) Dini mogo gicayo lok ada ma nonge i Lok pa Lubanga, ma en aye Baibul. Me ka lubo pwony me Baibul, gilubo pwony ki tekwaro pa dano. Ento Jehovah cwinye pe yom i kom jo ma “kwero cik pa Lubanga.” (Kwan Marako 7:9.) Ki tungcel, wayomo cwiny Lubanga ka walubo cik ki tira ma nonge i Baibul.
2. Omyero wawor Jehovah nining?
Omyero wawor Jehovah keken pien en aye ma Ocweyowa. (Niyabo 4:11) Meno tyen lokke ni omyero wamare dok wawore labongo tic ki cal apaya nyo cal acweya mo keken.—Kwan Icaya 42:8.
Worowa myero obed “maleng ma yomo cwiny Lubanga.” (Jo Roma 12:1) Meno tyen lokke ni omyero wakwo ma rwatte ki rwom me kit ma atir pa Lubanga. Me labolle, jo ma gimaro Jehovah, gimaro dok gilubo cik ma en oketo pi nyom. Gigwokke ki jami ma twero wano komgi, calo mato taa, mero ki kongo, ki tic ki yadi i yo marac. a
3. Pingo omyero wawor Jehovah kacel ki luye luwotwa?
Cokke ma wabedo kwede cabit ki cabit konyowa me ‘pako Jehovah i dye lwak ma gucokke.’ (Jabuli 111:1, 2) Yo acel ma watimo kwede meno aye ki wero wer me pako Lubanga. (Kwan Jabuli 104:33.) Jehovah mito ni wacit i cokke pien en marowa dok ngeyo ni cokke magi bikonyowa me bedo ki kwo maber nakanaka. Ka wacokke kacel, wacuko cwiny luwotwa, dok gin bene gicuko cwinywa.
NONG NEC MATUT
Niang pingo Jehovah pe mito ni wati ki cal mo keken ka watye ka wore. Pwony yo ma pigi tego ma watwero tic kwede me pako Lubanga.
4. Pe omyero wati ki cal i worowa
Wangeyo nining ni timo meno pe yomo cwiny Lubanga? Tuk VIDIO, ci wunyam lapeny man ma lubo-ni.
-
Gin ango mutimme i kare ma jo pa Lubanga i kare macon gutemo tic ki cal apaya me wore?
Jo mukene gitamo ni ka gitiyo ki cal i worogi, ci ginyiko cok ki Lubanga. Ento, tika itamo ni timo meno pe twero weko gibedo bor ki Lubanga? Kwan Nia 20:4-6 ki Jabuli 106:35, 36, ci wunyam lapeny magi:
-
Jami ango, nyo cal ango ma ineno dano gitiyo kwede i worogi?
-
Jehovah winyo nining i kom tic ki cal me wore?
-
Tika itamo ni opore ka watiyo ki cal nyo gin mo i worowa? Pingo itamo kit meno?
5. Woro Jehovah kene weko wabedo agonya ki i pwony goba
Nen kong kit ma woro Jehovah i yo ma en cwako twero gonyowa ki i pwony goba. Tuk VIDIO.
Kwan Jabuli 91:14, ci wunyam lapeny man:
-
Gin ango ma Jehovah ocikke ni ebitimo piwa ka wanyuto ni wamare kun waworo en keken?
6. Waworo Lubanga i cokkewa
Wapako Jehovah dok wacuko cwiny luwotwa ka wawero dok wamiyo lagam i cawa me cokke. Kwan Jabuli 22:22, ci wunyam lapeny magi:
-
Tika imaro winyo lagam pa jo mukene i cawa me cokke?
-
In mono imito yubbe me miyo lagam i cokke?
7. Jehovah cwinye bedo yom ka wanywako ki jo mukene gin ma wapwonyo
Tye yo mapol ma watwero nywako ki jo mukene ada me Baibul. Kwan Jabuli 9:1 ki 34:1, ci wunyam lapeny man:
-
Gin ango ma dong ipwonyo ki i Baibul ma imito nywako ki ngat mukene?
JO MOGO GIWACO NI: “Lubanga pe paro dini ma wawore iye teke watimo mere jami mabeco.”
-
In itamo ningo?
WOT WIYE WIYE
Wayomo cwiny Lacwecwa ka waworo en keken, wapakke i cokkewa, dok wanywako jami ma wapwonyo ki jo mukene.
Ngo ma ipwonyo?
-
Gin ango ma myero worowa ojenge iye? Pingo?
-
Pingo omyero wawor Jehovah keken?
-
Pingo omyero wawor Lubanga i kin jo mukene ma gimito yomo cwinye?
TIM KWED
I pwony ma wiye tye ni “An Pe Dong Abedo Opii pa Cal Apaya,” kwan kit ma dako mo oweko kwede woro cal apaya.
Pwony gin ma twero konyi me miyo lagam i cawa me cokke.
Nen kong kit ma awobi mo onongo kwede adwogi maber ki i cokke kadi bed en onongo pe nongo yot me cito i cokke.
Pol pa dano gitamo ni yatariya cung pi dini pa Lukricitayo, ento tika omyero wati kwede i worowa?
“Pingo Lucaden pa Jehovah Pe Gitiyo ki Yatariya i Worogi?” (Pwony ma tye i jw.org)
a Wabinyamo lok i kom jami magi i pwony ma tye anyim.
