PWONY ME 18
Kit me Ngeyo Lukricitayo me Ada
Dano bilion mapol giwaco ni gibedo Lukricitayo. Ento giye pwony mapatpat, dok gikwo ma lubbe ki rwom me kwo mapatpat. Pi meno, watwero ngeyo Lukricitayo me ada nining?
1. Anga ma obedo Lakricitayo me ada?
Lukricitayo gubedo lupwonnye, nyo lulub kor Yecu Kricito. Baibul waco ni: “I Antiokia aye kikwongo lwongo iye lupwonnye ni Lukricitayo, kun nying man oa ki bot Lubanga.” (Tic pa Lukwena 11:26, NWT.) Ginyuto nining ni gibedo lupwonnye pa Yecu? Yecu owaco ni: “Ka wumoko i lokka, ci wun lupwonnyena adada.” (Jon 8:31) Meno nyuto ni Lukricitayo me ada myero gulub gin ma Yecu opwonyo. Dok kit macalo pwony pa Yecu ducu onongo jenge i kom Ginacoya, Lukricitayo me ada bene niyegi jenge i kom Baibul.—Kwan Luka 24:27.
2. Lukricitayo me ada ginyuto mar nining?
Yecu owaco ki lulub kore ni: “Wumarre kekenwu macalo ceng amarowu.” (Jon 15:12) Yecu onyuto nining ni emaro lupwonnyene? En okwanyo kare me bedo kacel kwedgi, ocuko cwinygi, dok okonyogi. En ojalo kadi wa kwone bene pigi. (1 Jon 3:16) I yo acel-lu, Lukricitayo me ada pe gigik ki pwonyo dano lok i kom mar keken. Lokgi ki jami ma gitimo nyuto ni gimare i kingi.
3. Tic ango ma Lukricitayo me ada gitye ka timone?
Yecu omiyo tic ki lupwonnyene. En, “oorogi ka tito lok i kom Ker pa Lubanga.” (Luka 9:2) Lukricitayo me cencwari me acel pe gutito kwena i odi legagi keken, ento gutito wa i dye lwak ki i gangi pa dano. (Kwan Tic pa Lukwena 5:42; 17:17.) Lukricitayo me ada bene i kare-ni gitito kwena ka mo keken ma ginongo iye dano. Gimaro dano, pi meno, gitiyo ki cawagi ki kerogi me nywako kwena me Baibul ma miyo gen ki kwecwiny bot dano.—Marako 12:31.
NONG NGEC MATUT
Nen kong kit ma itwero poko kwede Lukricitayo me ada ki i kin jo ma pe gilubo pwony ki lanen pa Yecu.
4. Giyenyo lok ada me Baibul
Lukricitayo me cencwari me acel onongo gimaro Lok pa Lubanga
Pe dano ducu ma giwaco ni gibedo Lukricitayo gitero lok ada me Baibul calo gin ma pire tek. Tuk VIDIO, ci wunyam lapeny ma lubo.
-
I yo ma nining ma kanica mogo ma gilwonge ni gibedo Lukricitayo pe gipwonyo ada ma Yecu opwonyo?
Yecu opwonyo lok ada ma tye i Lok pa Lubanga. Kwan Jon 18:37, ci wunyam lapeny man:
-
Ma lubbe ki lok pa Yecu-ni, watwero ngeyo Lukricitayo “me ada” nining?
5. Gipwonyo lok ada ma tye i Baibul
Lukricitayo me cencwari me acel onongo gitito kwena bot jo mukene
Ma peya Yecu odok cen i polo, en omiyo ki lulub kore tic ma pud tye ka medde wa i kare-ni. Kwan Matayo 28:19, 20 ki Tic pa Lukwena 1:8, ci wunyam lapeny man:
-
Tic me tito kwena man onongo kibititone wa awene dok wa i kabedo mene?
6. Giketo i tic jami ma gipwonyo
Gin ango ma oweko laco mo ma nyinge Tom omoko ni enongo Lukricitayo me ada? Tuk VIDIO, ci wunyam lapeny magi ma lubo.
-
Ki i vidio man, gin ango ma oweko Tom okwero dini woko?
-
Pingo en dong omoko ni enongo lulub kor Yecu me ada?
Ka ngat moni waco ni ebedo lalub kor Yecu ci omyero en onyut woko ka maleng ki i ticce. Kwan Matayo 7:21, ci wunyam lapeny man:
-
Ma lubbe ki lok pa Yecu man, pingo pe romo ka wawaco mere ki dogwa keken ni wabedo lulub kore?
7. Gitye ki mar i kingi
Lukricitayo me cencwari me acel onongo gimare i kingi
Tika Lukricitayo me ada dong gujalo kwogi pi Lukricitayo luwotgi? Tuk VIDIO, ci wunyam lapeny magi ma lubo.
-
I vidio man, gin ango ma otugo cwiny Lloyd me keto kwone ka mading pi konyo Omego Johansson?
-
Tika itamo ni gin ma en otimo nyuto ni en obedo Lakricitayo me ada?
Kwan Jon 13:34, 35, ci wunyam lapeny magi:
-
Lupwonnye pa Yecu (Lukricitayo me ada) onongo gibitero jo ma gia ki i kaka nyo lobo mukene nining?
-
Onongo gibitimo meno nining i kare me lweny?
JO MOGO GIWACO NI: “Dini ma itye iye pire pe tek, pien wan ducu waworo Lubanga acel.”
-
Ginacoya mene ma itwero tic kwede me nyuto kit ma watwero ngeyo kwede Lukricitayo me ada?
WOT WIYE WIYE
Lukricitayo me ada gilubo pwony me Baibul, ginyuto mar ma kwako jalle pigi kengi, dok gitito lok ada ma tye i Baibul bot dano.
Ngo ma ipwonyo?
-
Lukricitayo me ada pwonygi ducu jenge i kom ngo?
-
Lukricitayo me ada gingene pi nyuto kit mene?
-
Tic ango ma Lukricitayo me ada gitimo?
TIM KWED
Pwony lok i kom gurup mo ma gitute matek me lubo lanen pa Yecu kacel ki pwonye.
Nen kong gin ma okonyo dako mo ma yam obedo core pa Katoli me nongo “jo me ot me ada i yo me cwiny.”
“Gutiyo ki Baibul me Gamo Lapeny Ducu!” (Wi Lubele, April 1, 2014)
Nen kit ma Lukricitayo me ada ginyuto kwede mar pi luye luwotgi ma gimito kony.
Nen kong kit ma lulub kor Yecu i kare-ni gitimo jami ma Lukricitayo me cencwari me acel bene gutimo dok ma Yecu onongo owaco ni binyuto lulub kore me ada.
“Gin Ango ma Nyuto Lukricitayo me Ada?” (Wi Lubele, April 1, 2012)
