PWONY ME 37
Gin ma Baibul Waco i kom Dog Tic ki Cente
Tika nino mo ibedo ki par pi dog ticci nyo cente? Twero bedo tek adada me nongo jami ma mitte pi kwo kun bene watiyo pi Jehovah ki cwinywa ducu. Baibul miniwa tam ma twero konyowa.
1. Baibul waco gin ango madok i kom dog tic?
Lubanga mito ni wabed ki yomcwiny i ticwa. Baibul waco ni “gin maber makato ma dano myero otim en aye ni en myero . . . onong yomcwiny i tic ma en tiyo.” (Latitlok 2:24) Jehovah tiyo matek. Ka walubo lanene kun wan bene watiyo matek, wayomo cwinye dok cwinywa bedo yom i komwa kekenwa.
Tic pire tek. Ento pe omyero wawek pire obed tek ma loyo worowa bot Jehovah. (Jon 6:27) En ocikke ni ka waketo tic pire mukwongo i kwowa, en biminiwa jami ma mitte me kwo.
2. Bedo ki neno mupore i kom cente kwako ngo?
Kadi bed Baibul waco ni ‘lim gwoko ngat ma tye kwede,’ ento Baibul bene cikowa ni cente keken pe twero keliwa yomcwiny. (Latitlok 7:12) Pi meno, kicuko cwinywa pe me maro cente ento me neno ni ‘jami ma watye kwede romowa.’ (Kwan Jo Ibru 13:5.) Ka wabedo ma wayeng ki jami ma watye kwede, pe wabibedo ki cwercwiny pien ni watamo ni pe watye ki jami muromo. Wabigwokke ki banya ma pe mitte. (Carolok 22:7) Dok wabibwot ki i peko ma bino macalo adwogi me tuko luguma ki donyo i yub mogo me nongo lonyo madit oyotoyot.
3. Watwero bedo ma cingwa yot i tic ki centewa nining?
Jehovah obedo Lubanga ma cinge yot, dok walubo lanene ka ‘wapoko jami, dok wamiyo mot ki yomcwiny.’ (1 Temceo 6:18) Watwero tic ki centewa i yo maber ka wamiyo mot pi konyo kacokke ki dok ka wakonyo jo ma gitye i peko, tutwalle luworo luwotwa. Jehovah pe tye ki miti madit tutwal i kom wel cente ma wamiyo, ento cwiny ma wamiyo kwede. Ka wamiyo ki cwinywa ducu, wabibedo ki yomcwiny dok wabiyomo cwiny Jehovah.—Kwan Tic pa Lukwena 20:35.
NONG NGEC MATUT
Nen adwogi maber ma bino ka watye ki neno mupore i kom dog ticwa dok wayeng ki jami ma watye kwede.
4. Wek kit ma itiyo kwede ticci okel deyo i kom Jehovah
Watwa ki Jehovah myero ogud kit ma waneno kwede tic. Tuk VIDIO, ci wunyam lapeny ma lubo.
-
I vidio man, gin ango ma ogudo cwinyi madok i kom neno pa Jason i kom dog ticce kacel ki kite?
-
Gin ango ma en otimo me neno ni dog ticce pire pe obedo tek loyo ticce pi Jehovah?
Kwan Jo Kolocai 3:23, 24, ci wunyam lapeny man:
-
Pingo pire tek ni wati ki cwinywa ducu?
Tic pire tek. Ento pe omyero wawek pire obed tek ma loyo worowa bot Jehovah
5. Bedo ma wayeng ki jamiwa keliwa adwogi maber
Pol pa dano giyelle matek me nongo cente madwong kit ma gitwero. Ento Baibul cuko cwinywa me timo gin mukene. Kwan 1 Temceo 6:6-8, ci wunyam lapeny man:
-
Baibul cuko cwinywa me timo gin ango?
Kadi bed watye ki jami manok adada, watwero bedo ma cwinywa yom. Tuk VIDIO, ci wunyam lapeny ma lubo.
-
Kadi bed gitye ki cente manok, ngo mumiyo jo me odi magi cwinygi yom?
Ento ket kong ka watye ki jami mapol dok pud wamito medo mukene kono? Yecu omiyo labol mo ma nyuto kit ma timo meno rac kwede. Kwan Luka 12:15-21, ci wunyam lapeny man:
-
Gin ango ma ipwonyo ki i labol ma Yecu omiyo-ni?—Nen tyeng me 15.
Kwan ci ipor Carolok 10:22 ki 1 Temceo 6:10. I nge meno, wunyam lapeny magi:
-
Gin ango ma itamo ni pire tek loyo? Bedo larem Jehovah nyo bedo ki cente madwong? Pingo?
-
Peko ango ma watwero nongone ka kare ducu watye ki miti mukato kare me nongo cente?
6. Jehovah bimiyowa jami ma mitte pi kwo
Ka watye ki peko me nongo tic nyo pe watye ki cente muromo, man twero temo niyewa i kom Jehovah. Tuk VIDIO me neno gin ma watwero timone ka watye ki peko ma kit meno, ci wunyam lapeny ma lubo.
-
I vidio man, peko ango ma omego-ni okato ki iye?
-
Gin ango ma en otimo me lweny ki pekki ma en onongo tye ka kato ki iye-ni?
Kwan Matayo 6:25-34, ci wunyam lapeny man:
-
Ngo ma Jehovah ocikke me timo pi jo ma giketo pi Kerre mukwongo?
JO MOGO GIWACO NI: “Myero ati matek me nongo jami ma mitte pi jo me oda. Pe atwero cito i cokke cabit ducu.”
-
Wang Baibul mene ma moko boti ni Jehovah biminiwa jami ma mitte pi kwo ka waketo worone mukwongo i kwowa?
WOT WIYE WIYE
Dog tic kacel ki cente gubedo jami ma mitte, ento pe myero gudwo tamwa woko ki i tic pi Jehovah.
Ngo ma ipwonyo?
-
Ngo ma twero konyi me bedo ki neno mupore i kom tic?
-
Bedo ma iyeng ki jami ma itye kwede keli adwogi maber ango?
-
Itwero nyuto nining ni igeno cikke pa Jehovah ni en bimiyo jami ma mitte pi jone?
TIM KWED
Nen kong ka ce Baibul waco ni cente obedo gin marac.
“Tika Cente Aye Obedo Acakki me Gin Maraco Ducu?” (Pwony ma tye i jw.org)
Pwony kit ma watwero tic ki centewa me yomo cwiny Lubanga.
“Baibul Waco Gin Ango Madok i kom Miyo Mic?” (Pwony ma tye i jw.org)
Tika tuko luguma obedo gin ma pe rac?
“Gin ma Baibul Waco i kom—Tuko me Goyo Cente” (Awake!, Marci 2015)
Nen kong gin ma otugo cwiny laco mo me juko tuko me goyo cente ki kwalo kwo.
“Onongo Amaro Aguragura me Pyem Ngwec” (Wi Lubele, Novemba 1, 2011)
