Ka watye i kin luye luwotwa wawinyo kit ma Kabaka Daudi onongo winyo kwede: “Nen kit macalo bedo ber ki me yomcwiny ka omego gibedo kacel ki mer i kingi!” (Jabuli 133:1) Note ma tye i kacokke pe bino pire kene. Wan ducu myero watute matek.

1. Jo pa Lubanga gingene pi gin ango?

Ka icito i cokke pa Lucaden pa Jehovah ma i lobo mukene, twero bedo ni nongo pe iniang lebgi, ento kibijoli ki mar dok ibiwinyo agonya. Pingo? Pien wakwano Baibul kun watiyo ki ginakwana ma rom i kabedo ducu. Dok watute me nyuto mar bot jo ducu. I kabedo mo keken ma watye iye, wan ducu ‘walwongo nying Jehovah, dok wawore ki cwiny acel.’—Jepania 3:9.

2. Gin ango ma itwero timone wek jo me kacokke gubed ma gunote?

‘Myero wumarre kekenwu ki cwinywu ducu.’ (1 Petero 1:22) Itwero keto tira man i tic nining? Me ka keto cwinyi i kom goro pa jo mukene, ket cwinyi i kom kitgi mabeco. Me ka ribbe ki jo ma maro gin ma imaro keken, tute me ngeyo omege ki lumege ma gia ki i kabedo ki kwo mapatpat. Omyero bene watute matek me jwayo cwiny me apokapoka mo keken ma watye kwede.—Kwan 1 Petero 2:17. a

3. Gin ango ma ibitimo ka winye manok tye i kin in ki Lakricitayo lawoti?

Wan wanote i kinwa, ento bene watye ki roc. Pi meno, i kine mukene wacwero cwiny luwotwa. Meno aye oweko Lok pa Lubanga wacciwa ni omyero wamedde ki ‘timo kica i kinwa kekenwa,’ dok medde ni: “Timo kica pi bal myero obed tye macalo Rwot bene ceng otimowu kica.” (Kwan Jo Kolocai 3:13.) Wacwero cwiny Jehovah tyen mapol ata, ento en pud timiwa kica. Pi meno, en mito ni watim kica ki utmegiwa bene. Ka iniang ni icwero cwiny ngat mo, cit bote wek wuyub wat i kinwu.—Kwan Matayo 5:23, 24. b

 NONG NGEC MATUT

4. Jwa cwiny me apokapoka

Wamito ni wamar utmege ducu. Ento i kine mukene wanongo tek me jolo ngat ma kit kwone pat ki megwa. Gin ango ma twero konyowa? Kwan Tic pa Lukwena 10:34, 35, ci wunyam lapeny magi:

• Jehovah jolo jo ducu me bedo Lucadenne. Meno myero ogud kit ma ineno kwede jo ma kit kwogi pat ki megi nining?

• Kodi cwiny me apokapoka ango ma dano me kabedowu tye kwede? Dok pingo myero igwokke kwede?

Kwan 2 Jo Korint 6:11-13, ci wunyam lapeny man:

• Itwero pwonnye me maro omege ki lumege ma kit kwogi pat ki megi nining?

5. Tim kica ki cwinyi ducu dok igwok kuc

Jehovah timiwa kica kadi bed pe bimitte ni watimme kica. Kwan Jabuli 86:5, ci wunyam lapeny magi:

• Tyeng man pwonyowa gin ango madok i kom kica pa Jehovah?

• Pingo itye ki pwoc pi kica pa Jehovah?

• Gin ango ma weko bedo tek botwa me bedo ma wanote?

Watwero lubo lanen pa Jehovah nining wek wabed ma wanote kacel ki utmegiwa? Kwan Carolok 19:11, ci wunyam lapeny man:

• Ka ngat mo ocwero cwinyi nyo otimo gin mo marac i komi, gin ango ma itwero timone me yubo wat i kinwu?

I kine mukene wacwero cwiny jo mukene. Dong ka meno otimme, gin ango ma myero watim? Tuk VIDIO, ci wunyam lapeny ma lubo.

• Gin ango ma lamego ma i vidio-ni otimo me yubo wat i kingi?

 WOT WIYE WIYE

Itwero gwoko note ma tye i kacokke ka itimo kica dok inyuto mar bot omege ki lumege ducu.

Ngo ma ipwonyo?

• Itwero jwayo cwiny me apokapoka nining?

• Gin ango ma ibitimo ka winye manok tye i kin in ki Lakricitayo lawoti?

• Pingo imito ni ibed ngat ma timo kica calo Jehovah?