1. Yecu onongo tye ka paro ngo i dyewor ma peya kineke?

I DYEWOR ma peya kineko Yecu, en obedo ka paro anyim pa lupwonnyene pien onongo ngeyo ni ecok wekogi. En owaco botgi ni: ‘Wun pe wubedo jo me lobo.’ (Jon 15:19) Lacen, en olego pigi kun waco bot Wonne ni: “Gin pe jo me lobo, macalo an pe a dano me lobo.” (Jon 17:15, 16) Ngo ma Yecu onongo tye ka wacone?

2. “Lobo” ma Yecu oloko iye-ni obedo ngo?

² Kakany, “lobo” obedo jo ma pe gingeyo Lubanga dok gitye i te loc pa Catan. (Jon 14:30; Jo Epeco 2:2; Yakobo 4:4; 1 Jon 5:19) Watwero bedo ‘pat ki lobo-ni’ nining? I dul man wabinyamo yo mogo: Bedo lugen kun wacwako Ker pa Lubanga ka odok i lok me wibye, rukke i yo mupore ki bedo ki neno matir i kom cente, ki dong ruko jami lweny ma Jehovah ominiwa.​—Nen Lok me Giko Buk Man me 16.

3. Yecu onongo neno lok me wibye nining?

³ I kare ma Yecu tye i lobo, en oneno ni dano tye  ki pekki mapol dok kwo pe yot. En onongo paro pigi dok mito konyogi. En tika odoko lacungo wibye? Pe. En onongo ngeyo ni gin ma dano mito aye Ker nyo gamente pa Lubanga. Yecu oketo cwinye i tic me tito pi ker pa Lubanga, ma en onongo bidoko kabakane. (Daniel 7:13, 14; Luka 4:43; 17:20, 21) Yecu pe orwako wiye i lok me wibye, dok en kare ducu obedo ma pe cwako tung ka mo. I kare ma Yecu tye i nyim Gabuna me Roma, Pontio Pilato, en owacci: “Kerra pe me lobo man.” (Jon 18:36) Lupwonnyene bene onongo pe gicwako tung ka mo. Buk mo acel me tekwaro owaco ni Lukricitayo me kare macon onongo “pe gidonyo i lok me wibye.” I kare-ni Lukricitayo me ada gitye ki neno acel-lu. Wacwako Ker pa Lubanga keken dok pe wadonyo i lok me wibye.​—Matayo 24:14.

4. Lukricitayo me ada gicwako Ker pa Lubanga nining?

⁴ Lucungudwar gicung ma kaka gamentegi i lobo mukene, pi man gin pe gidonyo i lok me wibye me lobo meno. Jo ma kiwirogi ma gitye ki gen me loc kacel ki Kricito i wi polo bene gubedo lucungudwar. Paulo ocoyo bot Lukricitayo ma kiwirogi ni: ‘Wadoko luwang Kricito.’ (2 Jo Korint 5:20) Jo ma kiwirogi gicung pi gamente pa Lubanga. Gin pe girwako wigi i lok me loc lobo. (Jo Pilipi 3:20) Ma ka meno, jo ma kiwirogi dong gukonyo dano milion mapol me pwonyo lok i kom gamente pa Lubanga. “Romi mukene” ma gitye ki gen me kwo pi naka i lobo manyen giteno kor jo ma kiwirogi. Gin  bene pe gicwako tung ka mo. (Jon 10:16; Matayo 25:31-40) Ada, Lukricitayo me ada pe gidonyo i lok me wibye me lobo-ni.​—Kwan Icaya 2:2-4.

5. Pingo Lukricitayo pe gidonyo i lweny?

⁵ Lukricitayo me ada gineno luye luwotgi ducu macalo lupacogi kadi bed gia ki i lobo nyo tekwaro mukene. (1 Jo Korint 1:10) Ka ni wacit ka lweny, ci nongo watye ka lweny i kom lupacowa, nyo luye luwotwa, ma Yecu ocikowa ni omyero wamargi. (Jon 13:34, 35; 1 Jon 3:10-12) Medo i kom meno, Yecu owaco bot lupwonnyene ni gumar kadi wa lumonegi.​—Matayo 5:44; 26:52.

6. Lutic pa Jehovah gineno gamente nining?

⁶ Kadi bed wan macalo Lukricitayo pe wacwako  tung ka mo keken, ento wayelle matek me bedo lutedero maber. Me labolle, wanyuto woro bot gamente ki lubo cik ma gumoko dok waculo mucoro. Ento, kare ducu wamiyo “jami pa Lubanga . . .  bot Lubanga.” (Marako 12:17; Jo Roma 13:1-7; 1 Jo Korint 6:19, 20) “Jami pa Lubanga” kwako marwa pire, winywa bote, ki dong worowa. Watye atera me to me ka turo cik pa Jehovah.​—Luka 4:8; 10:27; kwan Tic pa Lukwena 5:29; Jo Roma 14:8.

7, 8. “Cwiny me lobo man” obedo ngo, dok gudo dano nining?

⁷ Me wek wabed pat ki lobo pa Catan-ni, pe myero wawek “cwiny me lobo man” odorwa. Cwiny man obedo yo me tam ki kit me kwo ma a ki bot Catan, dok doro jo ma pe gitiyo pi Jehovah. Ento Lukricitayo gikwero cwiny man. Lakwena Paulo owaco ni, “yam pe gimiyowa cwiny me lobo man, ento gimiyowa cwiny ma oa ki bot Lubanga.”​—1 Jo Korint 2:12; Jo Epeco 2:2, 3; nen Lok me Giko Buk Man 17.

⁸ Cwiny me lobo man weko dano gibedo luworo, luwakke, ki lujemo. Miyo gitamo ni pe mitte ni gibed luwiny bot Lubanga. Catan mito ni dano gutim gin mo keken ma gimito labongo paro pi adwogine. En mito ni gutam ni gin ma pire tek loyo i kwo obedo cobo “miti me komwa ma ginywalowa kwede, ki miti marac pi gin ma waneno ki wangwa.” (1 Jon 2:16; 1 Temceo 6:9, 10) Catan tye ka tute matek me bwolo lutic pa Jehovah wek  gutam kit ma en etamo kwede.​—Jon 8:44; Tic pa Lukwena 13:10; 1 Jon 3:8.

9. Cwiny me lobo man twero gudowa nining?

⁹ Calo yamo ma waywe kwede-ni, cwiny me lobo man orumowa woko dyere. Ka pe watiyo matek me kwero cwiny meno, ci bigudowa. (Kwan Carolok 4:23.) Man twero timme mot mot ka wacako lubo tam ki kit me kwo pa dano ma pe giworo Jehovah. (Carolok 13:20; 1 Jo Korint 15:33) Nyo bene twero gudowa ka wacako neno cal macilo ma tugo miti me buto, winyo tam pa jo mungak, nyo tuko tuko mogo me pyem magwar adada.​—Nen Lok me Giko Buk Man 18.

10. Watwero gwokke ki cwiny me lobo man nining?

¹⁰ Dong watwero gwokke ki cwiny me lobo nining? Omyero wabed cok ki Jehovah dok wawek ryekone otirwa. Omyero waleg pi cwiny mere maleng kare ducu dok walung wiwa i tic pire. Jehovah aye Ngat matek loyo i polo ki lobo. Watye ki gen ni en twero konyowa me kwero cwiny me lobo man.​—1 Jon 4:4.

11. Cwiny me lobo man ogudo kit ma dano girukke kwede nining?

¹¹ Kit ma warukke dok wanen kwede bene nyuto ni pe wabedo jo me lobo. Dano mapol i lobo-ni girukke me ywayo tam pa jo mukene i komgi, me tugo miti me buto i cwiny jo mukene, me nyuto cwiny me jemo, nyo kit ma cinggi dyak kwede. Jo mukene pe giparo kulu kit ma ginen kwede. Giruko  bongi muket oket nyo macol. Wan pe waye ni cwiny man ogud kit ma warukke kwede.

12, 13. Cik ma igi lac mene ma myero watam iye ka watye ka yero bongo me aruka?

¹² Wan macalo lutic pa Jehovah, kare ducu wamito ni waruk bongi maleng dok mupore pi gin moni ma watye ka timone. ‘Warukke maber ki mwolo,’ wek wanyut ni wabedo jo ma “woro Lubanga.”​—1 Temceo 2:9, 10; Juda 21.

¹³ Kit ma warukke kwede twero gudo kit ma  dano gineno kwede Jehovah ki jone. Wamito ni watim jami “ducu pi miyo deyo bot Lubanga.” (1 Jo Korint 10:31) Rukke i yo maber ki mwolo kwako woro kit ma jo mukene winyo kwede. Pi man ka watye ka yero bongi nyo kit ma wamito nen kwede, wiwa myero opo ni tam ma wamoko gudo jo mukene.​—1 Jo Korint 4:9; 2 Jo Korint 6:3, 4; 7:1.

14. Ngo ma myero watam iye ka watye ka yero bongi pi cokke nyo ticwa me pwony?

¹⁴ Rukwa mono tye nining ka watye i cokke nyo i ticwa me pwony? Tika waywayo tam pa dano i komwa? Bongiwa tika leyo wi jo mukene? Tika watamo ni kit ma warukke kwede pe kwako jo mukene? (Jo Pilipi 4:5; 1 Petero 5:6) Ngene kene ni kare ducu wamito ni wabed ma wanen maleng, ento gin ma miyo wanen mwonya bot jo mukene aye kitwa mabeco. Man aye gin ma Jehovah keto cwinye iye ka onenowa. Kitwa mabeco nyuto jo ma wabedo ki i cwinywa, nyo ‘cwiny ma pe nen, ma welle dit i nyim Lubanga.’​—1 Petero 3:3, 4.

15. Pingo Jehovah pe tittiwa kore ki kore kit ma myero warukke kwede?

¹⁵ Jehovah pe oryeyo cik mapol i kom gin ma myero warukki. Ma ka meno, en ominiwa cik ma igi lac me Baibul ma twero konyowa me moko tam maber. (Jo Ibru 5:14) En mito ni tam ma wamoko i kom jami ducu obed ma cung i kom marwa pire ki jo mukene. (Kwan Marako 12:30, 31.) I twok lobo lung, jo pa Jehovah girukke i yo mapat pat ma lubbe ki tekwarogi nyo bongo ma gimito. Nenone mit mada.

16. Kit ma lobo neno kwede cente pat ki gin ma Yecu opwonyo nining? Lapeny ango ma myero wapenye kwede?

¹⁶ Catan mito ni dano gutam ni cente ki jami me kom aye bikeligi yomcwiny, ento lutic pa Jehovah gingeyo ni meno pe lok ada. Wageno lok ma Yecu owaco ni: “Kwo pa dano pe cung i wel lim mapol ma en tye kwede.” (Luka 12:15) Cente pe twero keliwa yomcwiny me ada. Pe twero miniwa lurem me ada, wic mupye mot, nyo kwo ma pe tum. Ada gire, mitte ni wabed ki jami me kom dok wamito  nongo mit pa kwo. Ento Yecu opwonyowa ni wabibedo ki yomcwiny ka watye ki wat maber ki Lubanga dok ka worowa aye gin ma pire tek loyo i kwowa. (Matayo 5:3; 6:22) Penye kekeni ni: ‘Tika acako lubo kit ma jo me lobo gineno kwede cente? Cente aye mono gin ma atamo dok aloko iye cawa ducu?’​—Luka 6:45; 21:34-36; 2 Jon 6.

17. Adwogi maber ango ma wanongo ka wakwero tam ma lobo-ni tye kwede i kom cente?

¹⁷ Ka waketo cwinywa i tic pi Jehovah kun wakwero tam ma lobo-ni tye kwede i kom cente, ci kwowa bibedo ki tyen lok. (Matayo 11:29, 30) Wabibedo ma wayeng dok watye ki kuc i cwinywa. (Matayo 6:31, 32; Jo Roma 15:13) Pe wabibedo ki par mapol pi jami me kom. (Kwan 1 Temceo 6:9, 10.) Wabinongo yomcwiny ma bino pi miyo mic. (Tic pa Lukwena 20:35) Yo me kwowa biminiwa cawa malac me bedo kacel ki jowa me amara dok bene waromo nino maber.​—Latitlok 5:12.

18. Catan tye ka temme me timo ngo i komwa?

¹⁸ Catan tye ka temme me balo watwa ki Jehovah, pi meno omyero watim jami ducu ma twere me gwokone. Wan watye ka lweny i kom “dul mony mogo maraco me cwiny.” (Jo Epeco 6:12) Catan ki jogine pe gimito ni wabed ki yomcwiny dok wakwo pi naka. (1 Petero 5:8) Lumonewa magi matego-ni gitye ka lweny i komwa, ento ki kony pa Jehovah watwero loyogi woko!

19. I yo ango ma Jo Epeco 6:14-18 tito kwede “jami lweny” pa Lukricitayo?

 ¹⁹ I kare macon, lumony onongo giruko jami lweny me gwoko komgi ka gitye i dog lweny. I yo acel-li, wan bene omyero waruk “jami lweny” ma Jehovah ominiwa wek ogwokwa. (Jo Epeco 6:13) Wakwano lok i kom jami lweny man i Jo Epeco 6:14-18, ma wacci: “Pi meno, myero wucung ma wutweyo pyerwu woko ki ada, wuruk bene kit ma atir wek obed nyonyo me gengo korwu, kun wuyubbe me tito lok me kwena maber me kuc ma bedo macalo war ma wuruko i tyenwu. Makato ducu, niye aye omyero obed kwotwu ma bimiyo wutwero neko mac ki i kom atero ma Larac bayo. Wumak larre aye obed tok nyonyo me wiwu, ki lok pa Lubanga ma en aye pala lucwan pa cwiny maleng. Wuleg kare ducu i cwiny ki lega me bako dog. Wubed ma wuyubbe i lega kare ducu kun wuciro peko, kun wulego pi jo pa Lubanga ducu.”

20. Ngo ma myero watim wek ‘jami lwenywa’ ogwokwa?

²⁰ Ka lamony wiye owil woko i kom gin lwenye mo acel, kun pe ogwoko dul kome mo, meno aye ka ma lamonene bipimo ci celo litap. Ka wamito ni ‘jami lwenywa’ ogwokwa, ci wiwa myero pe owil i kom mo acel. Omyero waruk i cawa ducu dok wagwok maber. Lwenywa bimedde wang ma kijwero lobo pa Catan-ni dok kikwanyo Catan kacel ki jogine woko ki i lobo. (Niyabo 12:17; 20:1-3) Pi meno, ka watye ka lweny ki miti maraco nyo goro mo, omyero pe waony tongwa piny!​—1 Jo Korint 9:27.

21. Watwero loyo lwenywa nining?

 ²¹ Pe watwero loyo Catan piwa kenwa. Ento ki kony pa Jehovah, waromo loye woko! Me gwoko genewa, omyero waleg bot Jehovah, wakwan Lokke, dok waribbe kacel ki omegiwa ki lumegiwa. (Jo Ibru 10:24, 25) Timo jami magi bikonyowa me bedo lugen bot Lubanga kun wabedo atera me tito pi niyewa.

22, 23. (a) Ngo ma romo konyowa me bedo atera me tito pi niyewa bot jo mukene? (b) Ngo ma wabinyamo i dul ma lubo man?

²² Omyero wabed atera me dok i lok ma dano penyowa kwede i kom niyewa. (Jon 15:19) Ka odok i lok mogo, Lucaden pa Jehovah gitye ki neno mapat adada ki jo me lobo. Penye kekeni ni: ‘Tika ada aniang gin mumiyo watimo jami i yo mapat? Tika aye ni gin ma Baibul ki gin ma lagwok ot ma lagen waco tye kakare? Tika atye ki awaka me bedo Lacaden pa Jehovah? (Jabuli 34:2; Matayo 10:32, 33) Tika atwero tito pi niyena bot jo mukene?’​—Matayo 24:45; Jon 17:17; kwan 1 Petero 3:15.

²³ I kabedo mapol me kwowa, wangeyo maber ngo ma myero watim me bedo pat ki jo me lobo. Ento i cawa mukene, ngeyone pe yot. Catan tiyo ki owic mapat pat me makowa. Owic acel ma en tiyo kwede obedo galowang. Watwero yero galowang maber nining? Wabineno i dul ma lubo man.