1, 2. Ka pekki tye i nyom, man mono te lokke ni nyomme dong konye pe? Tit kong.

NYOM obedo mic mua ki bot Jehovah. Twero kelo yomcwiny madit i kwo pa ngat moni. Ento, nyom ducu tye ki pekone. Romo nen calo peko pe bigik, dok laco ki dako nongo pe giwinyo ni gitye ki wat macok kit ma yam con.

² Pe myero wabed ki ur ka nyomwa kato ki i peko kare ki kare. Ento man pe te lokke ni nyomwa dong konye pe. Kadi wa luot ma onongo gitye ki pekki madongo gunongo yo me yubo wat i kingi ki jingo nyomgi wek obed matek. I yo ma nining?

3, 4. Ngo ma cawa mukene timme i nyom?

³ Nyom ribo kacel jo aryo ma kitgi, mitigi, tamgi, ki dong yo me timo jamigi tye mapat pat. Ki bene, twero bedo ni laco ki dako gia ki i tekwaro mapat pat. Pi meno, cwalo kare ki laco ki dako me ngeyo ki niang lawote maber.

⁴ Ka kare woto ki kato, ngat acel acel romo cako lungo wiye i pekone keken ci wat i kingi doko goro.  Twero nen calo ngat man tye ka kwo kwone pire kene. Ngo ma romo konyogi me nyikke cok macalo laco ki dako?

5. (a) Gin ango ma twero konyo Lakricitayo me nyikke cok ki luotte? (b) Ma lubbe ki Jo Ibru 13:4, omyero wanen nyom nining?

⁵ Jehovah miyo tira maber adada ma twero konyi me nyikke cok bote ki bot luotwu. (Jabuli 25:4; Icaya 48:17, 18) En wacciwa ni: “Jo ducu myero guket deyo i kom nyom.” (Jo Ibru 13:4) Gin ma ineno calo obedo me deyo nongo obedo gin me wel dok pire tek. Igwoko maber dok pe itero tuko tuko. Meno aye kit ma Jehovah mito ni wanen kwede nyomwa.

6. Matayo 19:4-6 nyuto ni Jehovah neno nyom nining?

⁶ Jehovah aye ocako te yub me nyom. Wode Yecu owacci: “Pud pe wukwano lok ma wacci, cakke i acakki piny Lacwec ocweyogi co ki mon? Dok owaco ni, ‘Pi tyen lok man dano biweko wonne ki minne ci moko i kom dakone, gin aryo-nu gicako doko kom acel’? Kit meno pe dong gibedo kom aryo ento kom acel. Pi meno gin ma Lubanga oribo kacel, dano pe opok kingi.” (Matayo 19:4-6) Nicakke ki i acakki, yub pa Jehovah onongo tye ni nyom obed gin marii. En bene onongo mito ni jo me ot gubed ki wat macok dok ki yomcwiny, kun ginongo mit pa kwo kacel.

7. Co ki mon gitwero jingo nyomgi nining?

⁷ Ento, jo munyomme gitye ka kemme ki lyeto mapol i kareni. I kine mukene lyeto meno doko gwar adada ma miyo gitamo ni nyomgi pe twero cung, ci giilo cinggi woko. Ento, ngeyo kit ma Jehovah neno kwede nyom twero konyowa.​—1 Jon 5:3.

8, 9. (a) Awene ma myero walub kwede tira pa Jehovah i kom nyom? (b) Watwero nyutone nining ni nyomwa obedo gin ma pire tek botwa?

⁸ Tira ma Jehovah miniwa tye pi ber bedowa. Kit ma waneno kwede, en ominiwa tam ni: “Jo ducu myero guket deyo i kom nyom.” (Jo Ibru 13:4; Latitlok 5:4) Ka walubo tira pa Jehovah kadi bed ni tek me lubone, ci wabinongo adwogi maber.​—1 Jo Tecalonika 1:3; Jo Ibru 6:10.

⁹ Kit macalo nyom obedo gin ma pire tek  botwa-ni, wagwokke ki timo nyo waco gin mo keken ma twero balone woko. Ma ka meno, wamito jingo wat i kinwa ki luotwa wek obed matek. Watwero timo man nining?

10, 11. (a) Peko madit ango ma tye i nyom mogo? (b) Pingo kit ma iloko kwede bot luotwu pire tek?

¹⁰ Tye yo mapol ma ngat moni twero cwero kwede cwiny luotte. Wangeyo ni Lukricitayo pe myero gudong luotgi nyo gutim gin mo keken ma keto awano i komgi. Ento, watwero wano jo mukene ki lebwa. Lebwa twero doko gilweny magwar adada. Dako mo owaco ni: “Cwara yeta ki yet maraco. Kadi bed ape ki bwur mo i koma, ento yet ma en yeta kwede nino ducu oketo bwur woko i cwinya, yet calo ni ‘In ibedo twon yec!’ ki ni ‘In konyi pe!’” Laco mo acel owaco ni dakone kare ducu canye ki leb makec dok lwonge ki nying mogo me anywar. En owaco ni: “Pe atwero tito bot jo mukene leb malik ma en yeta kwede. Meno aye gin mumiyo pe atwero lok kwede dok agalle i dog ticca. Ber loyo dwogo paco.” Yet, ki loko lok makec ma cwero cwiny jo mukene tye ka weng i kare-ni.

¹¹ Ka laco ki dako gicanye ki leb makec, ci man twero keto awano i cwinygi ma tero kare malac me cang. Man pe obedo kit ma Jehovah mito ni laco ki  dako gubed kwede. Ento, yot me cwero cwiny luotwu labongo ngeyone. Twero bedo ni in itamo ni itero luotwu ki kica, ento en mono winyo nining? Ka ce gin mo ma iwaco ocwero cwiny luotwu, tika ibibedo atera me loko kit ma iloko kwede?​—Jo Galatia 5:15; kwan Jo Epeco 4:31.

12. Ngo ma twero gudo wat pa ngat munyomme ki Jehovah?

¹² Kit ma iloko kwede ki luotwu ka itye i dye lwak nyo wutye kenwu pire tek bot Jehovah. (Kwan 1 Petero 3:7.) Yakobo 1:26 poyo wiwa ni: ‘Ka ce dano mo tamo ni en ladini kun pe juko lebe,  nongo bwolle abwola kene ki i cwinye, dinine-nu konnye pe.’

13. I yo ango mukene ma ngat moni twero cwero cwiny luotte?

¹³ Tye yo mukene ma jo munyomme myero gunyut ni giparo pi kit ma ngat acel acel winyo kwede. Me labolle, luotwu biwinyo nining ka ce icako cwalo cawa malac ki ngat mukene? Kadi bed tye pi tyen lok matir calo tic kacel i tic me pwony nyo konyo me cobo peko moni, tika bicwero cwiny luotwu? Dako mo ma Lakricitayo owaco ni: “Neno ka cwara cwalo cawa malac dok keto cwinye tutwal i kom lamego mukene i kacokke cwero cwinya mada. Weko atamo ni an kara konya pe.”

14. (a) Lok ada ango ma wapwonyo ki i Acakki 2:24? (b) Ngo ma myero wapenye kwede?

¹⁴ Macalo Lukricitayo, omyero wakony lunyodowa, ki omegiwa ki lumegiwa ma i kacokke. Kadi bed kumeno, ka wanyomme omyero waket cwinywa tutwalle i kom luotwa. Jehovah owaco ni laco ‘bimoko kom dakone likang.’ (Acakki 2:24) Kit ma luotwa winyo kwede myero obed gin ma pire tek adada botwa. Penye kekeni ni: ‘An tika atye ka miyo cawana ki mar ma mitte bot luotwa?’

15. Pingo jo munyomme omyero gugwokke ki bedo cok tutwal ki ngat ma pe obedo luotgi?

¹⁵ Ka kinwa odoko cok tutwal ki ngat ma pe obedo luotwa, ci man twero kelo ayelayela i nyomwa. Watwero cako mito ngat meno. (Matayo 5:28) Miti man twero dongo i cwinyi ci teri me timo gin ma kelo alano i kom nyomwu.

16. Cik ango ma Baibul miyo i kom nyom?

¹⁶ I nge waco ni: “Jo ducu myero guket deyo i kom nyom,” Baibul waco ni: “Kitanda pa jo ma gunyomme myero giwor obed maleng; pien Lubanga bingolo kop i kom lutim tim me abor ki jo ma balo nyomgi.” (Jo Ibru 13:4) Kakany, “kitanda pa jo munyomme” obedo rwatte i buto i kin laco ki dako. (Carolok 5:18) Watwero nyuto woro i kom kitanda man kun waweko bedo maleng nining?

17. (a) Jo mapol i kareni gineno tim me abor nining? (b) Lukricitayo omyero gunen tim me abor nining?

¹⁷ Jo mukene i kareni gitamo ni pe rac me timo tim abor. Pe myero wawek cwiny man olok nenowa. Jehovah owaco ka maleng ni edag tim tarwang ki tim abor. (Kwan Jo Roma 12:9; Jo Ibru 10:31; 12:29) Ka wadonyo i tim me abor, ci nongo wabalo nyomwa woko. Man binyuto ni pe waworo cik pa Jehovah, dok bibalo watwa kwede. Pi meno, omyero wagwokke ki timo kadi wa gin mukwongo ma twero terowa me timo abor. Man kwako gwokke ki lwodo tam macilo i kom ngat mukene.​—Yubu 31:1.

18. (a) Pingo tim me abor obedo calo woro cal jogi? (b) Jehovah neno tim me abor nining?

¹⁸ I Cik pa Moses, tim me abor onongo obedo bal madit atika, marom aroma ki woro cal jogi. Pwod pi bal aryo-ni obedo to. (Lulevi 20:2, 10) Tim me abor onongo rom aroma ki woro cal jogi nining? Ka Laicrael mo oworo cal jok, nongo en  oturo cikkene me bedo lagen bot Jehovah. Ka en otimo abor, nongo en oturo cikkene me bedo lagen bot luotte. (Nia 19:5, 6; Nwoyo Cik 5:9; kwan Malaki 2:14.) Dong man nyuto ka maleng ni Jehovah tero tim abor calo bal madit adada.

19. Ngo ma twero konyowa me moko tamwa pe me donyo i tim abor?

¹⁹ I kareni kono? Kadi bed pe watye i te Cik pa Moses, neno pa Jehovah i kom tim me abor pud peya olokke. Kit macalo pe watwero woro cal jogi, omyero pe warwatte i buto ki ngat mukene mapat ki luotwa. (Jabuli 51:1, 4; Jo Kolocai 3:5) Ka watimo tim me abor, ci walano nyomwa ki Lubangawa Jehovah.​—Nen Lok me Giko Buk Man me 26.

20. Ryeko twero kelo adwogi maber i nyom nining?

²⁰ Itwero jingo nyommi nining wek obed matek? Lok pa Lubanga waco ni: “Gitwero gero ot pi ryeko, dok pi niang matut miyo cung matek liking.” (Carolok 24:3) Ot twero bedo mangic labongo jami iye, nyo twero bedo ma kideyo maleng dok ma bedo iye mit. Man bene rom aroma ki nyom. Dano maryek biyelle me neno ni nyomme obedo maber dok ma kelo yomcwiny.

21. Ngec twero jingo nyom bedo matek nining?

²¹ Ma lubbe ki ot meno, Baibul medde ni: “Pi ngec ma dano tye kwede miyo pongo ode ki kit jami mabeco me wel ki lwak jami ma yomo cwiny.” (Carolok 24:4) Gin ma ipwonyo ki i Lok pa Lubanga  twero yubo nyommi bedo maber. (Jo Roma 12:2; Jo Pilipi 1:9) Ka wutye ka kwano Baibul ki bukkewa kacel macalo luot, wunyam kit ma wutwero keto kwede i tic gin ma wupwonyo. Wuyeny yo ma wutwero nyuto kwede mar, woro, kica, ki niango. Peny Jehovah wek okonyi me dongo kit ma bijingo nyommi ki kit ma biweko luotwu mari.​—Carolok 15:16, 17; 1 Petero 1:7.

22. Pingo omyero water luotwa ki mar kacel ki woro?

²² Omyero watim jami ducu ma twere me tero luotwa ki mar kacel ki woro. Ci nyomwa bibedo maber dok bicung matek. Ento ma pire tek loyo, wabiyomo cwiny Jehovah.​—Jabuli 147:11; Jo Roma 12:10.