1. Ngo ma myero watim wek worowa obed ma yomo cwiny Jehovah, dok pingo?

YECU owacci: “Jo ma woro i ada gibiworo Won i cwiny ki ada, pien Won yenyo jo macalo meno pi wore.” (Jon 4:23; 6:44) Wan ducu ki acel acel omyero ‘wamedde ki pwonyo gin ma yomo cwiny Rwot.’ (Jo Epeco 5:10) Pe yot me timo man. Catan temo bwolowa wek watim jami ma cwero cwiny Jehovah.​—Niyabo 12:9.

2. Tit kong gin mutimme cok ki Got Cinai.

² Catan temme me bwolowa nining? Yo acel aye me nyweno wiwa i kom gin matir ki gin marac. Nen kong gin mutimme i kom rok me Icrael i kare ma onongo gugony cok ki Got Cinai. Moses onongo oito malo i got, ci jo Icrael gubedo ka kuro dwogone i gony. I nge kare mo, guol woko ki kure, ci gupenyo Aron ni oyubigi lubanga. En oyubo cal wod twon me jabu ci jo Icrael gubedo ki kwer madit. Gumyelo matek dok gukulle ka woro cal wod twon-ni. Gin onongo gitamo ni gitye ka woro Jehovah ki kulle i nyim wod twon-ni. Ento, kadi bed jo Icrael  gutero kwer man calo “nino madit bot [Jehovah],” meno pe te lokke ni gutimo gin matir. Jehovah oneno meno calo tim me woro cal jok dok dano mapol guto iye. (Nia 32:1-6, 10, 28) Pwony ango ma wanongo ki i lok man? Pe ibwolle keni. ‘Pe igud gin mo ma kome ki keni,’ dok iwek Jehovah aye opwonyi gin matir ki gin marac.​—Icaya 52:11; Ejekiel 44:23; Jo Galatia 5:9.

3, 4. Pingo pire tek me ngiyo kit ma kwer mogo gucakke kwede?

³ I kare ma Yecu tye i lobo, en opwonyo lukwenane me nyuto lanen maber i woro Lubanga i yo matir. I nge tone, lukwena gumedde ki pwonyo cik pa Jehovah bot lupwonnye manyen. Ento i kare ma lukwena guto, jo mungak gucako kelo tam maraco ki tekwaro kacel ki kwer me dini goba i kacokke. Guloko wa nying kwer magi wek dano gutam ni obedo kwer pa Lukricitayo. (2 Jo Tecalonika 2:7, 10; 2 Jon 6, 7) Pol pa kwer magi pud gitye wa i kare-ni, dok giilo malo niye me goba ki tim jok jok. *​—Niyabo 18:2-4, 23.

⁴ I twok lobo lung, kwero nino madito obedo gin ma pire tek i kwo pa dano. Ento, ka imedde ki pwonyo kit ma Jehovah neno kwede jami, ci iromo niang ni mitte ni ilok tammi i kom kwer mogo. I kare mukene timo man pe yot, ento itwero bedo ki gen ni Jehovah bikonyi. Kong wanenu kit ma kwer mogo gucakke kwede wek waniang kit ma Jehovah nenogi kwede.

5. Ngo ma nyuto ni pe kinywalo Yecu i nino dwe 25 me Decemba?

⁵ I kabedo mapol i lobo-ni, Karama kikwero i nino dwe 25 me Decemba, ma pol pa dano gitamo ni obedo nino ma kinywalo iye Yecu. Baibul pe tittiwa nino dwe nyo dwe ma kinywalo iye Yecu, ento tittiwa gin mo i kom kare ma kinywale iye. Luka ocoyo ni i kare ma kinywalo Yecu i Beterekem, ‘lukwat onongo gibedo i tim, kun gigwoko romigi dyewor.’ (Luka 2:8-11) I dwe me Decemba, Beterekem nongo ngic pi kot ki pee ma bedo tye, pi meno lukwat onongo pe gibedo woko ka gwoko romigi i dyewor. Man pwonyowa gin ango? Kinywalo Yecu i kare ma pinye lyet lyet, ento pe i Decemba. Baibul kacel ki lok me tekwaro nyuto ni kinywale i kine ka dwe me Sektemba ki Oktoba.

6, 7. (a) Jami mapol ma kitimo i kwer me Karama ocakke nining? (b) Tyen lok ango mumiyo wamiyo mic?

⁶ Dong, kwer me Karama ocakke nining? Ocakke ki i kwer pa lukamfiri calo kwer mo pa jo Roma ma onongo kilwongo ni Saturnalia, ma man obedo kwer ma kidyero bot Saturn, lubanga me pur. Buk mo acel me kwedo lok wacci: “Kwer ma Luroma onongo gikwero i dye Decemba, ma kilwongo ni Saturnalia, aye ocibo te guti pi jami mapol ma kitimo me camo raa i Karama. Me labolle, camo cam madwong, miyo mic, ki wango kandol ocakke ki i kwer man.” Ki bene, nino nywal pa lubanga me ceng pa jo Percia onongo kikwero i nino dwe 25 me Decemba.

 ⁷ Ento, pol pa dano ma gikwero Karama i kareni nongo pe gitye ka tamo pi kit ma ocakke kwede. Gin gineno Karama macalo kare me bedo kacel ki lupacogi, camo cam mamit, ki dong miyo mic. Ngene kene gire ni wamaro lupacowa ki luremwa, dok Jehovah mito ni luticce gunywak jami ki luwotgi. 2 Jo Korint 9:7 wacciwa ni “Lubanga maro ngat ma miyo jamine ki yomcwiny.” Jehovah pe mito ni wami mic  bot jo mukene i nino madito keken. Jo pa Jehovah cwinygi yom me miyo mic ki ribbe kacel ki luremgi ki lupacogi i kare mo keken me mwaka. Dok pe gibedo ki lakodi tam moni ni omyero kidwok wang mic ma gumiyo-ni. Gimiyo mic pien gimaro jo mukene.​—Luka 14:12-14.

8. Lutyet ki lakalatwe-ni tika gumiyo mic bot Yecu i kare ma en pud latin lakere? Tit kong.

⁸ Me cwako tam ni omyero kimi mic i kare me Karama, jo mapol giwaco ni luryeko adek gukelo mic bot Yecu ma pud latin lakere ma kipyelo i weer pa dyang. Obedo lok ada gire ni co mogo gulimo Yecu ci gukele mic. I kare me Baibul, onongo kimaro kelo mic bot ngat ma pire tek. (1 Luker 10:1, 2, 10, 13) Ento tika onongo ingeyo ni Baibul waco ni co magi onongo gubedo lutyet ki lakalatwe, lutim tango, dok pe giworo Jehovah? Ki bene, gin pe gulimo Yecu i kare ma en pud latin lakere i weer pa dyang. Gulime lacen ma dong tye “latin” ma bedo i ot.​—Matayo 2:1, 2, 11.

9. Baibul loko i kom kwero nino nywal pa angagi?

⁹ Nino ma kinywalo iye latin obedo nino me yomcwiny. (Jabuli 127:3) Ento, man pe te lokke ni omyero wakwer nino nywal. Tam kong i lok man: Baibul loko i kom kwero nino nywal pa dano aryo keken. Acel obedo nino nywal pa Parao me Ejipt, ki mukene obedo pa Kabaka Kerode Antipac. (Kwan Acakki 40:20-22; Marako 6:21-29.) Luloc  aryo magi pe gubedo lutic pa Jehovah. Ki lok ada, pe tye ka mo i Baibul ma wakwano ni latic pa Jehovah okwero nino nywalle.

10. Lukricitayo macon onongo gineno kwero nino nywal nining?

¹⁰ Buk mo me kwedo lok me tekwaro waco ni Lukricitayo macon “onongo gineno kwero nino me nywal calo kwer pa lukamfiri.” Kwer magi onongo jenge i niye me goba. Me labolle, Lugrik macon onongo gitamo ni gin mo ma obedo cwiny bedo tye i ka nywalle pa dano acel acel ka medde ki gwoko ngat meno ingeye. Dok onongo gitamo ni cwiny meno kubbe ki lubanga mo ma kinywalo i nino acel ki ngat meno. Medo i kom niye magi pa lukamfiri-ni, kwero nino me nywal bene kubbe ki tyeto gin ma bitimme anyim, ki tyeto tyet ki lakalatwe.

11. Jehovah winyo nining ka cingwa yot?

¹¹ Jo mapol gitamo ni nino nywalgi obedo nino ma pire tek adada ma myero kinyutigi pwoc kacel ki mar. Ento watwero nyuto mar bot lupacowa ki luremwa i cawa mo keken, ento pe i nino moni keken. Jehovah mito ni wabed lukica dok ma cingwa yot kare ducu. (Kwan Tic pa Lukwena 20:35.) Wanyuto pwoc bote nino ducu pi mic me kwo, ento pe i nino nywalwa keken.​—Jabuli 8:3, 4; 36:9.

12. Nino me towa twero bedo ber makato nino ma kinywalowa iye nining?

¹² Latitlok 7:1 waco ni: “Bedo ki nying maber ber kato moo me wel ma ngwece kur; ki nino me to pa dano, ber kato nino ma ginywale iye.” Nino me towa twero bedo ber makato nino ma kinywalowa iye nining? Ka pud kinywalowa anywala, nongo  peya watimo gin mo ki kwowa. Ento ka watiyo ki kwowa me tic pi Jehovah kun watimo jami mabeco pi jo mukene, ci ‘wabedo ki nying maber’ dok Jehovah wiye bipo i komwa kadi bed wato. (Yubu 14:14, 15) Jo pa Jehovah pe gikwero nino nywalgi nyo pa Yecu. Ki lok ada, gin acel keken ma Yecu ocikowa me kwerone aye Nipo me tone.​—Luka 22:17-20; Jo Ibru 1:3, 4.

13, 14. Kwer me Easter kubbe ki gin ango?

¹³ Jo mapol gitamo ni gitye ka kwero nicer pa Yecu ka gikwero Easter. Ento, tika Kricito ocikowa me kwero cerre? Pe. Bukke me tekwaro wacciwa ni Easter kubbe ki tim pa lukamfiri dok Lukricitayo macon onongo pe gikwero. Ki lok ada, buk mo me kwedo lok ma kilwongo ni Encyclopædia Britannica waco ni: “Pe tye gin mo i Cik Manyen ma nyuto ni kibedo ka kwero Easter  . . .  Kwero nino mogo madongo pe obedo gin ma Lukricitayo macon onongo gitimo.” Man nyuto ka maleng ni Easter pe kubbe ki nicer pa Yecu.

¹⁴ Ka Jehovah neno dano ka rubo kwer mogo me dini goba ki nicer pa Wode, itamo ni cwinye bedo yom? Lagamme ngene kene. (2 Jo Korint 6:17, 18) Ki lok ada, Jehovah pe ocikowa me kwero nicer pa Yecu.

15. Pingo Lukricitayo gigwokke ki kwer mogo ma kubbe ki woro jo muto?

¹⁵ Lukricitayo me ada gigwokke ki kwer mogo ma kubbe ki woro jo muto. Ka ngat moni oto, jo mogo gibedo ma wanggi twolo dyewor lung. Ka kitye ka yiko lato, lukumo gijobo lobo i cinggi ci gibolo i bur lyel ma peya kitoro wiye. Tye kwer mukene calo puyu lyel ki guro lyel. Dano gitimo jami magi ducu pien gitamo ni jo muto gitwero konyo nyo wano jo makwo. Ento Baibul pwonyo ni “jo ma dong guto  woko pe gingeyo gin mo.” Pi meno, jo ma gimito bedo i mar pa Lubanga pe ginywako i kwer mo keken ma kubbe ki woro jo muto.​—Latitlok 9:5, 10.

16, 17. Ngo ma myero watam iye ka watye ka yubbe pi nyom?

¹⁶ Nyom obedo kare me yomcwiny madit atika. Nyom kitimo i yo mapol mapat pat i twok lobo lung. Dano pol kare pe gitamo i kom kit ma kwer mogo me nyom ocakke kwede, pi meno pe gingeyo ni kwer mogo jenge i niye me goba. Ento Lukricitayo ma gitye ka yubbe me nyom myero gunen ni biyomo cwiny Jehovah. Ka guniang kit ma kwer mogo me nyom ocakke kwede, ci gibimoko tam maber.​—Marako 10:6-9.

¹⁷ Kwer mogo me nyom kitamo ni bikelo “gum” bot laco ki dako. (Icaya 65:11) Me labolle, i kabedo mogo, dano gibolo mucele i kom laco ki dako. Gitamo ni man bimiyo ginywalo lutino, gibedo ki yomcwiny, gikwo pi mwaki mapol, dok bigwokogi ki i kom jami maraco. Ento Lukricitayo gigwokke ki kwer mo keken ma kubbe ki dini goba.—Kwan 2 Jo Korint 6:14-18.

18. Cik ma igi lac mene ma gudo nyom?

¹⁸ Lukricitayo gimito i nyomgi obed me deyo dok okel yomcwiny bot dano ducu. Wele ma gubino i nyom pa Lukricitayo pe myero gulok lok macilo ma kubbe ki miti me mit dok pe myero guwac gin ma pe nyuto woro i kom laco, dako, nyo jo mukene.  (Carolok 26:18, 19; Luka 6:31; 10:27) Nyom pa Lukricitayo pe obedo kare me “wakke ki jami ma watye kwede i kwowa.” (1 Jon 2:16) Ka itye ka yubbe me nyom, yelle matek me neno ni wii bibedo ka po iye ki yomcwiny labongo koko ange mo.​—Nen Lok me Giko Buk Man me 28.

19, 20. Yoko gilac ocakke nining?

¹⁹ Gin acel ma dano maro timone i nyom nyo i ka namo mukene obedo yoko gilac. Ka kitye ka yoko gilac, ngat acel lego gum ci jo mukene giilo gilacgi malo. Lukricitayo myero gunen yoko gilac nining?

²⁰ Buk mo acel ma loko i kom kongo ki tekwaro mapat pat waco ni tim man me yoko gilac-ci nen calo ocakke ki i tekwaro pa lukamfiri “ma onongo kityero iye ginamata mo bot lubange.” Man onongo kitimo “i nge lega mo ma onongo kilego macek ni ‘bed kwo pi kare malac!’ nyo ‘bed ki yot kom!’” I kare macon, dano onongo giilo kikopogi malo me penyo gum ki bot lubangagi. Ento meno pe obedo kit ma Jehovah goyo kwede laa i komwa.​—Jon 14:6; 16:23.

21. Kwer ango mukene ma Lukricitayo myero gugwokke kwede?

²¹ Ka itye ka moko tammi me nywako i kwer moni, tam i kom cwiny ki kit ango ma kwer meno tye ka ilo malo. Me labolle, kwer mogo kwako myel  mogo ma kimyelo i dye gudo ma nongo dano tye cokcok munero, myel ma tugo miti me buto, mato kongo wa i labyel kweri, ki tim tarwang. Kwer mogo ma kit meno bene ilo malo lok man me buto i kin co ki co nyo mon ki mon nyo cuko cwiny dano me woro lobogi. Ka wanywako i kwer mogo calo magi, tika ada watye ka kwero gin ma Jehovah dagi?​—Jabuli 1:1, 2; 97:10; 119:37.

22. Ngo ma twero konyo Lakricitayo me moko tamme ka ce ebinywako i kwer moni?

²² Lukricitayo omyero gugwokke adada ki kwer mo keken ma pe keto deyo i kom Lubanga. Lakwena Paulo ocoyo ni: “Ka wucamo cam nyo ka wumato mat, nyo gin ducu ma wutiyo, wutim ducu pi miyo deyo bot Lubanga.” (1 Jo Korint 10:31; nen Lok me Giko Buk Man me 29.) Kwer ducu pe kubbe ki tim tarwang, dini goba, nyo cwiny me woro lobo. Ka ce kwer mo pe turo cik me Baibul, omyero wamok tamwa piwa kenwa ka ce wabinywako iye. Omyero bene watam i kom kit ma bigudo kwede jo mukene.

23, 24. I yo ango ma watwero tito kwede tam ma wamoko i kom kwer mogo bot lupacowa ma pe gubedo Lucaden?

²³ Twero bedo ni dong ijuko nywako i kwer mogo ma pe keto deyo i kom Jehovah. Lupacowu mogo ma pe gubedo Lucaden pa Jehovah guromo tamo ni dong pe imarogi dok pe imito bedo kacel kwedgi. Oromo bedo ni gitamo ni nino mogo madongo-ni  aye kare ma jo me ot myero gubed kacel. Dong, ngo ma itwero timone? Tye yo mapol ma itwero nyuto botgi ni imarogi dok iterogi calo jo ma pigi tek. (Carolok 11:25; Latitlok 3:12, 13) Iromo lwongogi me namo kacel kwedi i nino mukene.

²⁴ Ka ce wadini gimito niang pingo pe ikwero nino mogo, ci itwero kwedo ngec matut ki i bukkewa ki jw.org ma bikonyi me tito gin mumiyo pe inywako iye. Pe iwek gutam ni itye ka temme me laro lok kwedgi nyo diyogi me bedo ki neno ma rom ki megi. Kony lupacowu me niang ni itamo i kom jami mapol ci imoko tammi piri keni. Bed ma komi opye mot kun ‘iloko lok mamit ma kado oromo maber.’​—Jo Kolocai 4:6.

25, 26. Lunyodo gitwero konyo lutinogi nining me maro cik pa Jehovah?

²⁵ Pire tek adada ni wan ducu waniang maber tyen lok mumiyo pe wanywako i kwer mogo. (Jo Ibru 5:14) Mitiwa tye me yomo cwiny Jehovah. Dok ka wabedo lunyodo, omyero wakwany kare me konyo lutinowa me niang ki maro cik ma igi lac me Baibul. Ka gineno Jehovah macalo ngat ma tye ada, ci gin bene gibibedo ki miti me yomo cwinye.​—Icaya 48:17, 18; 1 Petero 3:15.

²⁶ Jehovah cwinye yom me neno ka watute ki kerowa ducu me wore i yo ma en cwako dok ki cwiny matir. (Jon 4:23) Ento jo mapol gitamo ni ngat mo pe twero bedo ma genne i lobo man marac-ci. Meno tika obedo lok ada? Kong wanyamu lokke i dul ma lubo man.