Bot jo ma maro Lubanga Jehovah ki Lokke, Baibul:

Yecu owaco ni: “Wubingeyo lok me ada, lok me ada bigonyowu.” (Jon 8:32) Tam kong kit ma iwinyo kwede i kare ma inongo lok ada me Baibul! Obedo me yomcwiny atika me ngeyo ni i lobo man ma opong ki goba-ni, watwero pwonyo lok ada.​—2 Temceo 3:1.

Lubanga Jehovah mito ni wange lok ada. Dok pi mar ma watye kwede pi dano, wamito ni watit botgi ada meno. Ento tic pi Lubanga kwako jami mukene mapol. Omyero watute matek me kwo macalo Lukricitayo pien waworo cik pa Jehovah. Yecu otito yo ma pire tek ma watwero nyuto kwede ni wamaro Lubanga. En owacci: “Ka wugwoko cikka, wubibedo i marra, kit macalo ceng agwoko cik pa Abana, abedo i marre.”​—Jon 15:10.

Yecu maro Wonne ki cwinye ducu, dok en timo jami ducu ma Wonne mito. Ka walubo lanen pa Yecu i kwowa, ci Jehovah bimarowa dok wabibedo ki yomcwiny me ada. Yecu owaco ni, “Ka wungeyo lok man, ci wubibedo ki yomcwiny ka wutiyogi.”​—Jon 13:17.

Genwa tye ni buk man bikonyi me kwo kwo ma lubbe ki lok me ada me Baibul wek idok larem Lubanga. Legawa tye ni marri pi Lubanga bidongo kun imedde ki bedo “i mar pa Lubanga . . . nio wa i kwo ma pe tum.”​—Juda 21.