1, 2. Ngo ma myero wange i kom Catan ki jogine?

KWO i lobo manyen pa Jehovah bibedo mit ma pe wacce. Wabikwo kit ma Lubanga onongo oyubo kwede. Ento i kareni, wakwo i lobo ma Catan ki jogine aye doro. (2 Jo Korint 4:4) Kadi bed pe watwero nenogi, gitye dok gitek adada.

² I dul man, wabinyamo kit ma watwero bedo kwede cok ki Jehovah kun wagwokke ki i kom Catan. Jehovah ocikke ni ebikonyowa. Ento omyero watute me niang diro ma Catan ki jogine gitiyo kwede me lweny i komwa.

3. Ngo ma Larac-ci mito timone i komwa?

³ Catan owaco ni dano woro Jehovah pi rwot ineka keken, dok ni wabigiko woro Jehovah woko ka kwo odoko tek adada. (Kwan Yubu 2:4, 5.) Ka ngat mo onyuto miti me pwonyo lok i kom Jehovah, Catan ki jogine gineno, dok gitemme me juko dano meno. Akemo makogi ka ngat mo odyero kwone bot Jehovah dok onongo batija. Baibul  poro Larac-ci ki “labwor ma kok, kun yenyo dano me amwoda.” (1 Petero 5:8) Catan mito balo watwa ki Jehovah.​—Jabuli 7:1, 2; 2 Temceo 3:12.

4, 5. (a) Ngo ma Catan pe twero timone? (b) Tyen lokke ngo me ‘lweny ki Catan’?

⁴ Ento, pe myero walwor Catan ki jogine. Jehovah ojwiko teko ma gitye kwede me tic i komwa. Jehovah ocikke ni “lwak dano mapol ata” ma gubedo Lukricitayo me ada, gibibwot ki i “can madit atika.” (Niyabo 7:9, 14) Pe tye gin mo ma Larac-ci twero timone  me gengo meno ki timme, pien Jehovah tye ka gwoko jone.

⁵ Ka wabedo cok ki Jehovah, ci Catan pe bibalo watwa ki Lubanga. Lok pa Lubanga cuko cwinywa ni: “[Jehovah] tye kwedwu, ka ce wun wutye kwede.” (2 Tekwaro 15:2; kwan 1 Jo Korint 10:13.) Co ki mon mapol ma lugen calo Abel, Enoka, Nua, Cara, ki Moses gulwenyo ki Larac-ci ki bedo cok ki Jehovah. (Jo Ibru 11:4-40) Wan bene watwero timo gin acel-lu. Lok pa Lubanga cuko cwinywa ni: “Wulweny matek ki Catan, ci en biringowu woko.”​—Yakobo 4:7.

6. Catan lwenyo i komwa nining?

⁶ Kadi bed Catan ngeyo ni Jehovah ojwiko tekone me wanowa, ento en pud twero timo gin mo keken me balo watwa ki Lubanga. I kareni, Larac-ci oto lweny i komwa i yo mapat pat, dok en tiyo ki diro ma en dong otiyo kwede pi mwaki alip mapol. Magi gubedo kodi diro ango?

7. Pingo Catan tye ka lweny i kom jo pa Jehovah?

⁷ Lakwena Jon ocoyo ni: “Wangeyo ni lobo ducu tye i te loc pa Larac.” (1 Jon 5:19) Catan aye tye ka doro loboni ducu dok en mito doro jo pa Jehovah bene. (Mika 4:1; Jon 15:19; Niyabo 12:12, 17) Larac-ci ngeyo ni karene odic woko, pi meno en tye ka keto lyeto magwar i kom wan ducu ki acel acel me turo gennewa bot Lubanga. I kine mukene, Catan  lwenyo i komwa atir atir, ento i kare mukene en tiyo ki diro.

8. Lakricitayo acel acel myero onge gin ango?

⁸ Jo Epeco 6:12 waco ni: ‘Walwenyo ki dul mony mogo maraco me cwiny ma tye i polo.’ Lakricitayo acel acel tye ka lweny i kom Larac-ci ki jogine. Omyero wange ni jo ducu ma gudyero kwogi bot Jehovah gitye i lweny man. I waragane bot jo Epeco, lakwena Paulo ocuko cwiny Lukricitayo tyen adek kulu ni ‘gucung matek.’​—Jo Epeco 6:11, 13, 14.

9. Ngo ma Catan ki jogine gitemme me timo i komwa?

⁹ Catan ki jogine gitemo bwolowa i yo mapat pat. Ka wacung matek i kom diro acel pa Catan, man pe te lokke ni pe waromo poto i owicce mukene. Larac-ci tute me ngeyo ka ma gorowa tye iye wek eyer owic mupore me makowa. Ento, pe myero wawek en omakwa pien Baibul tittiwa diro pa Catan wek wagwokke kwede. (2 Jo Korint 2:11; nen Lok me Giko Buk Man me 31.) Owic acel ma en tiyo kwede obedo tim tyet tyet.

10. (a) Tim tyet tyet obedo ngo? (b) Jehovah neno tim tyet tyet nining?

¹⁰ Tim tyet tyet kwako timo jami ma weko ngat moni kubbe ki jogi. I kine tye iye jami mogo calo tyeto gin ma anyim, talo dano, koto piny, nyo penyo dog tipo pa jo muto. Baibul wacciwa ni tim tyet tyet obedo gin me “kwer” bot Jehovah dok pe watwero rwako wiwa iye kun ki tungcel waworo  Jehovah. (Nwoyo Cik 18:10-12; Niyabo 21:8) Lukricitayo myero gugwokke ki gin mo keken ma kubbe ki tim tyet tyet.​—Jo Roma 12:9.

11. Bedo ki miti i kom jami mogo madok i kom jogi twero terowa i gin ango?

¹¹ Catan ngeyo ka watye ki miti i kom jami mogo madok i kom jogi. Ka en dong oniang mitiwa, bedo yot bote me ywayowa i tim jok jok. Kubbe mo keken ki jogi balo liremwa ki Jehovah.

12. Catan mito doro tamwa nining?

¹² Catan temo nyweno wi dano. En coyo akalakala i cwinygi wek gutam ni ‘gin marac ber ki gin maber rac.’ (Icaya 5:20) Larac-ci nyebo tam ni tira me Baibul pe tiyo dok ni wabibedo ki yomcwiny ka wakwero lubo cik pa Lubanga.

13. Catan otemme nining me coyo akalakala?

¹³ Diro acel ma Catan onongo ni tiyo maber adada obedo coyo akalakala i cwiny dano. En obedo ka tic ki diro man pi kare malac. I poto me Eden, en otemme me coyo akalakala i cwiny Kawa i kare ma openye ni: “Lubanga mono owacci, ‘Pe wucam yat ducu ma tye i poto-ni?’” (Acakki 3:1) Lacen, i kare pa Yubu, Catan openyo Jehovah i nyim lwak lumalaika mapol ni: “Itamo ni Yubu lworo Lubanga nono?” (Yubu 1:9) I kare ma Yecu otyeko nongo batija, Catan oteme kun wacci: “Ka in i Wod pa Lubanga, wac ki godi magi gulokke gudok kwon.”​—Matayo 4:3.

14. Catan twero coyo akalakala ni tim tyet tyet pe obedo gin marac nining?

 ¹⁴ I kareni, Larac-ci pud tye ka yelle me coyo akalakala i cwinywa. En temme me keto akalakala i cwiny dano, ma miyo gicako penye kekengi ka ce ada tim tyet tyet rac. En weko tim tyet mukene nen calo gin ma pe rac. Kadi wa Lukricitayo mukene bene gupoto i owic man. (2 Jo Korint 11:3) Pi man, gin ango ma watwero timone me gwokke? Ngo ma watwero timone wek Catan pe obitwa ki dirone? Kong dong wanenu kabedo aryo ma Catan twero bitowa iye: galowang ki lok me yot kom.

15. Galowang ma waneno twero miyo wakubbe ki jogi nining?

¹⁵ I kareni, filim, vidio, purogram me telebijon, tuko me kompiuta, ki kabedo me intanet nyuto tim jok jok, tango, ki teko pa cwiny maraco. Jo mapol gineno jami magi calo galowang mamwa ento pe giniang ni gitye ka yabo yo ki jogi me donyo i kwogi. Ngat mo bene twero donyo i tim jok jok ka ngiyo lakalatwe, tiyo ki lwit, nyo ngiyo i cing. Larac-ci weko jami magi nen calo mit dok me ur madit. Ngat mo bene twero tamo ni neno jami ma kubbe ki jogi pe rac ka teke pe edonyo i tim jok jok. Pingo tam man rac adada?​—1 Jo Korint 10:12.

16. Pingo omyero wakwer galowang mo keken ma nyuto gin ma kubbe ki jogi?

¹⁶ Catan ki jogine pe gitwero neno gin ma tye i tamwa. Ento gitwero niang gin ma wamito ki kit ma watamo kwede ka guneno jami ma wayero piwa  kenwa ki pi jo me odiwa, kadi wa galowang ma wayero. Ka wayero filim, wer, nyo bukke ma loko i kom ajwagi, talo dano, tim tango, yido pa jok i kom dano, ki jami mukene ma rom aroma, ci Catan ki jogine gibiniang ni watye ki miti madit i komgi. Guromo bene bitowa me donyo matut i tim jok jok.​—Kwan Jo Galatia 6:7.

17. Catan twero tic ki mitiwa me bedo ma komwa yot nining?

¹⁷ Catan bene twero tic ki mitiwa me bedo ma komwa yot wek ebal watwa ki Jehovah. I kareni, two tye ka yelo dano mapol. Twero bedo ni ngat moni owoto i ot yat dok olimo ludaktari mapol, ento  twone peya ocang. (Marako 5:25, 26) Cwinye twero balle adada, ci cito wa bot ajwaka nyo ye yadi mogo ma kubbe ki tim jok jok. Ento macalo Lukricitayo, omyero wagwokke ki yero yo me cango two ma kubbe ki tim jok jok mo keken.​—Lulevi 19:31.

18. Yo me cango ango ma Lakricitayo myero ogwokke kwede?

¹⁸ I kare pa jo Icrael macon, tye jo mogo ma gutiyo ki teko pa jogi. Jehovah owaco botgi ni: “Ka wutango cingwu, abiumo wanga woko pe anenowu; kadi bed wulega tyen mapol ata, pe abiwinyo legawu wacel.” (Icaya 1:15) Go kong​—Jehovah onongo pe biwinyo kadi wa legagi! Pe wamito timo gin mo keken ma bibalo watwa ki Jehovah ma miyo pe wanongo kony ki bote, tutwalle ka komwa lit. (Jabuli 41:3) Pi meno, omyero watemme me niang ka ce yo me cango two moni kubbe ki jogi. (Matayo 6:13) Ka ce kubbe mo tye, omyero wagwokke kwede!—Nen Lok me Giko Buk Man me 32.

19. Larac-ci oonyo koyo i kom jo mapol nining?

¹⁹ Kadi bed jo mogo gitamo ni Catan ki jogine pe gitye ada, ento jo mukene gingeyo ni gitye pien guyelogi i kare mukato angec. Jo mapol gilworo cen ki jogi dok gudoko opii pa tim mogo me kwiya piny. Jo mukene gionyo koyo i kom luwotgi ki tito pi jami maraco ma jogi gutimo i kom dano. Pol kare, dano gibedo ki miti madit adada i lok man ci gwokgi bedo dwir adada. Lok magi miyo dano bedo ki lworo i kom Larac-ci.

20. Watwero nyayo lok goba pa Catan nining?

 ²⁰ Tam kong i lok man​—Catan mito ni dano gubed ki lworo i kome. (2 Jo Tecalonika 2:9, 10) En lagoba ma ngeyo doro tam pa jo ma gitye ki miti i kom tim jok jok wek guye jami ma pe tye ada. Jo magi guromo tito lok i kom gin ma gitamo ni gineno dok giwinyo. Ka dano giwoto ki kwango lok magi, ci bene giwoto ki medo kado iye. Pe wamito konyo kor Catan ki boko lok magi ma onyo koyo i kom dano-ni.​—Jon 8:44; 2 Temceo 2:16.

21. Ma ka boko lok i kom jogi, ngo ma watwero lok iye?

²¹ Ka ce Lacaden pa Jehovah mo con okemme ki jogi, en pe myero obok lokke bot jo mukene mere me galowanggi. Jo pa Jehovah pe myero gubed ki lworo pi gin mo keken ma Larac-ci ki jogine gitwero timone. Ma ka meno, omyero waket tamwa i kom Yecu ki teko ma Jehovah omiye. (Jo Ibru 12:2) Yecu pe obedo ka galowang lupwonnyene ki boko lok i kom jogi. En oketo cwinye i kom kwena me Ker-ri ki “tic madito me twero pa Lubanga.”​—Tic pa Lukwena 2:11; Luka 8:1; Jo Roma 1:11, 12.

22. In dong imoko tammi me timo gin ango?

²² Wiwa myero pe owil ni miti pa Catan tye me balo watwa ki Jehovah. En bitemo gin mo keken me cobo meno. Ento wangeyo diro pa Larac-ci dok wamoko tamwa me kwero tim jok jok mo keken. Pe wabimiyo kare ki Catan me bitowa iye. (Kwan Jo Epeco 4:27.) Kakare, ka walwenyo matek ki Larac-ci, ci wabigwokke ki i owicce kun wamedde ki bedo i te gwok pa Jehovah.​—Jo Epeco 6:11.