1-3. (a) Mic maber mene ma Jehovah ominiwa? Watwero tic kwede i yo marac nining? (b) Omyero wati ki mic me lok nining?

KET-TI wego mo omiyo lela bot wode ma tye ki mwaka apar ki wiye. Cwinye yom me miyo bot wode mic meno. Ento, ket-ti wode-ni ongweco ki lelane i yo marac, ogoyo ci owano dano. Wonne biwinyo nining?

² Jehovah aye Lami “kit gin mo ducu maber, ki mot ducu mabeco.” (Yakobo 1:17) I kin mic mabeco ma en ominiwa obedo kero me lok. Mic man konyowa me tito tamwa ki kit ma wawinyo kwede ki i cwinywa. Watwero waco gin ma konyo dano dok ma yomo cwinygi. Ento gin ma wawaco bene twero cwero cwiny jo mukene.

³ Lok ma waloko tye ki teko madit, dok Jehovah pwonyowa kit me tic ki mic me lok i yo maber. En wacciwa ni: “Lok mo marac myero pe okatti ki i dogwu; wulok lok mabeco keken ma dongo tam pa dano i yo ma mitte, wek jo ma winyo lokwu gunong kony ki iye.” (Jo Epeco 4:29) Kong wangiyu kit ma  watwero tic kwede ki mic man i yo ma yomo cwiny Lubanga dok cuko cwiny jo mukene.

4, 5. Pwony ango ma watwero nongone madok i kom teko ma lok tye kwede ki i carolok me Baibul?

⁴ Lok tye ki teko, pi meno, omyero wagwokke ki gin ma waloko ki kit ma wawaco kwede. Carolok 15:4 waco ni: “Lok ma giloko mot ki kica tye macalo yat me kwo, ento lok mogo mungak balo cwiny dano woko.” Kit macalo yat ma mwonya nenone mit dok miyo kwo, lok ma kiloko mot ki kica bene twero kweyo cwiny jo winyo. Ki tungcel, lok me gero twero balo cwiny jo mukene woko.​—Carolok 18:21.

⁵ Carolok 12:18 waco ni: “Lok pa ngat ma pe ki tam winnye malit macalo pala lucwan ka ocobo dano.” Lok ma kirune ka wacone labongo tam keto bur malit i cwiny dano dok balo wa wat bene. Twero bedo ni wi po i kom kare ma ngat mo oloko gin ma ocwero cwinyi adada. Ento, carolok meno medde ni: “Lok ma a ki i leb ngat maryek twero cango dano.” Lok me niango twero cango bur ma tye i cwiny dano dok roco wat ma onongo oballe woko. (Kwan Carolok 16:24.) Ka wiwa opo ni lokwa gudo jo mukene, ci wabigwokke ki lebwa.

6. Pingo tek adada me doro gin ma wawaco?

⁶ Tyen lok mukene mumiyo omyero wagwokke ki gin ma waloko aye ni wan ducu watye ki roc. ‘Tam ducu ma i cwinywa kemo bal keken,’ dok lokwa pol kare nyuto gin ma tye i cwinywa. (Acakki 8:21; Luka  6:45) Twero bedo tek adada me doro gin ma waloko. (Kwan Yakobo 3:2-4.) Ento omyero wayelle matek me yubo kit ma waloko kwede ki jo mukene.

7, 8. Lokwa twero gudo watwa ki Jehovah nining?

⁷ Omyero bene wagwokke ki leb ma watiyo kwede pien ni wabicung i nyim Jehovah pi gin ma wawaco ki kit ma wawaco kwede. Yakobo 1:26 waco ni: “Ka ce dano mo otamo ni en ladini kun pe juko lebe, nongo bwolle abwola kene ki i cwinye, dinine-nu konnye pe.” (1 Jo Korint 15:17) Pi meno, ka waloko ata, ci watwero balo watwa ki Jehovah.—Yakobo 3:8-10.

⁸ Ki lok ada, watye ki tyen lok maber me gwokke ki gin ma wawaco ki kit ma wawaco kwede. Me konyowa tic ki mic me lok i yo ma Jehovah mito ni wati kwede, omyero wange lakodi leb mene ma myero wagwokke kwede.

9, 10. (a) Kodi leb ango ma dong odoko lok me nino ducu i kareni? (b) Pingo omyero wakwer tic ki leb me oree ma winyone lik?

⁹ Jo mapol i kareni giloko lok oree malik nyo lok macilo. Jo mogo gitamo ni omyero giti ki leb macilo nyo malik wek jo mukene guniang gin ma gitye ka wacone. Jo mukene giloko lok oree macilo wek jo mukene gunyer. Ento, lakwena Paulo owaco ni: “Myero dong wubwotgi woko ducu: kiniga, kwar cwiny, raccwiny, yet, ki loko lok mogo me lewic ma pe myero giwiny ka katti ki i dogwu.” (Jo Kolocai 3:8) En bene owaco ni “lok oree ma konnye pe, myero bene pe owinnye” i kin Lukricitayo me ada.​—Jo Epeco 5:3, 4.

¹⁰ Lok oree macilo cwero cwiny Jehovah kacel ki jo ma marre, dok obedo tim caro caro. I Baibul, tim “caro” tye i kin “tic me kit pa dano.” (Jo Galatia 5:19-21) Tim “caro” bene kwako bal mukene mapol, dok tim acel ma pe leng twero terowa i tim macilo mukene. Ka kijuko ngat moni kwe dok oloko odoko kite me tic ki leb macilo, man twero nyuto ni en dong pe mito medde ki bedo i kacokke.​—2 Jo Korint 12:21; Jo Epeco 4:19; nen Lok me Giko Buk Man me 23.

11, 12. (a) Boko lok twero lokke doko kwoto nying nining? (b) Pingo omyero wagwokke ki balo nying dano?

¹¹ Omyero bene wagwokke ki kwoto nying dano marac. Pe rac gire ka watye ki miti i kom jo mukene dok wanywako lok i kom luremwa ki wadiwa. Kadi wa i cencwari me acel, Lukricitayo onongo gimito  ngeyo kit ma omegigi ki lumegigi gitye kwede, ki ngo ma gitwero timone me konyogi. (Jo Epeco 6:21, 22; Jo Kolocai 4:8, 9) Ento yot adada me cako kwoto nying dano marac ka watye ka boko lok i komgi. Ka waloko odoko kitwa me nwoyo lok mo ma wawinyo, ci watwero waco goba nyo jami ma myero obed i mung. Ka pe wagwokke, ci lok maraco magi twero balo nying ngat moni marac adada. Luparicayo gukwoto nying Yecu i kare ma gukok i kome pi timo jami mogo ma en pe otimo. (Matayo 9:32-34; 12:22-24) Kwoto dano twero balo nying ngat meno, tugo daa, kelo cwercwiny, ki dong balo lirem.​—Carolok 26:20.

¹² Jehovah mito ni walok lok ma konyo dok cuko cwiny jo mukene, ento pe mito ni wati ki lebwa me loko lurem wek gudok lumone. Jehovah dag “ngat ma tubo omegine.” (Carolok 6:16-19) Ngat ma obedo lakwot nying mukwongo obedo Catan Larac-ci, ma okwoto nying Lubanga. (Niyabo 12:9, 10) I lobo man, jo mapol giwaco lok goba i kom luwotgi. Ento man pe myero otimme i kacokke pa Lukricitayo. (Jo Galatia 5:19-21) Pi meno, omyero wagwokke adada ki gin ma wawaco kun watamo ma peya waloko. Ma peya inwoyo lok ma iwinyo i kom ngat moni, penye kekeni ni: ‘Lok ma amito wacone-ni mono tye ada? Tika binyuto cwiny me kica? Tika bibedo me kony? Tika amito ni ngat ma atye ka lok i kome-ni owiny gin ma abiwaco-ni? Abiwinyo nining ka ngat mukene owaco lok man i koma?’​—Kwan 1 Jo Tecalonika 4:11.

13, 14. (a) Yet twero gudo jo mukene nining? (b) Pingo Lukricitayo myero gugwokke ki yeto jo mukene?

 ¹³ I kine mukene, wan ducu wawaco jami ma wakok ange iye lacen. Ento pe myero walok odok kitwa me lok marac i kom jo mukene nyo tic ki leb mabit i komgi. Pe myero wayet dano. Lakwena Paulo owacci: “Wuwek dong keccwiny ducu, ki wang-ic ki kiniga, da i wi dano mukene, yet, kacel ki raccwiny ducu.” (Jo Epeco 4:31) Baibul mukene gonyo “yet” ni “lok maraco,” nyo “leb ma cwero cwiny dano,” ki “leb me cac.” Yeto jo mukene miyo girwenyo woro i komgi kekengi dok gitamo ni konygi pe. Lutino aye pol kare cwinygi tur adada, pi meno omyero wagwokke pe me canyogi ki lebwa.​—Jo Kolocai 3:21.

¹⁴ Baibul cikowa matek adada i kom yeto dano. Pud dong bedo me cwercwiny ya ka ngat mo yeto luotte nyo lutinone ki leb mabit! Ada, ngat ma okwero juko yeto dano pe bimedde ki bedo i kacokke. (1 Jo Korint 5:11-13; 6:9, 10) Kit ma waneno kwede, ka watiyo ki leb macilo, waloko lok goba, nyo wawaco jami ma cwero cwiny jo mukene, man bibalo watwa ki Jehovah ki jo mukene.

15. Kodi lok ango ma dongo wat i kin dano?

¹⁵ Watwero tic ki micwa me lok i yo ma yomo cwiny Jehovah nining? Kadi bed Baibul pe wacciwa ngo kikome ma myero waloki nyo pe waloki, ento cuko cwinywa me loko “lok mabeco keken ma dongo tam pa dano.” (Jo Epeco 4:29) Lok ma dongo dano obedo lok maleng, lok me kica, ki lok ada. Jehovah  mito ni walok lok ma cuko cwiny jo mukene dok konyogi. I cawa mukene timo man pe yot. Mito tute matek me waco gin ma dongo dano ka kiporo ki waco gin ma cwero cwiny jo mukene. (Tito 2:8) Kong dong wanyamu kit ma watwero dongo kwede jo mukene ki lok ma waloko.

16, 17. (a) Pingo omyero wapwo jo mukene? (b) Anga ma watwero pwoyone?

¹⁶ Jehovah gin ki Yecu gimiyo pwoc ki cwinygi ducu. Wamito lubo lanengi. (Matayo 3:17; 25:19-23; Jon 1:47) Me miyo pwoc ma cuko cwiny ngat moni, omyero kong watam i kom gin maber ma en otimo dok wanyut miti i kome. Carolok 15:23 waco ni ‘lok ma kiloko i kare ma mitte kikome, ber mada!’ Cuko cwinywa mada ka ngat mo opwoyowa pi ticwa matek nyo pi gin mo maber ma watimo.​—Kwan Matayo 7:12; nen Lok me Giko Buk Man me 27.

¹⁷ Ka iloko odoko kiti me neno gin maber ma jo mukene gitimo, ci bibedo yot boti me miyo pwoc ki cwinyi ducu. Me labolle, gwok nyo ineno ni ngat mo i kacokke yubo pwonye maber adada nyo yelle matek me miyo lagam i cokke. Twero bedo ni latin mo cung matek pi ada i cukul, nyo dano mo muteggi nywako i tic me pwony kare ki kare. Ka ipwoyogi, ci bicuko cwinygi adada. Pire tek adada bene pi co me waco bot mongi ni gimarogi dok gipwoyo jami ducu ma gitimo. (Carolok 31:10, 28) Kit macalo ginapita mito dero ki pii, dano bene gimito pwoc. Lutino tutwalle aye mito ni kipwogi. Bed ma wangi twolo me neno kit mabeco ma gitye kwede kacel ki tutegi, ci  ipwogi iye. Pwoyo lutino twero dongo tekcwinygi ki gen ma gitye kwede i komgi kekengi dok twero cuko cwinygi me medde ki timo gin matir.

18, 19. Pingo omyero wayelle ki kerowa ducu me cuko cwiny jo mukene ki kweyo cwinygi? Watwero timo man nining?

¹⁸ Ka wacuko cwiny dano dok wakweyo cwinygi, nongo watye ka lubo lanen pa Jehovah. En paro mada pi ‘jo mamwol, ma cwinygi cwer.’ (Icaya 57:15) Jehovah mito ni wamedde ki ‘cuko cwinywa kekenwa,’ kun ‘waloko ki kica bot jo ma cwinygi otur.’ (1 Jo Tecalonika 5:11, 14) Ka watemme me timo man, en neno dok pwoyo tutewa.

 ¹⁹ Ka ineno ni ngat mo i kacokke cwinye otur woko, ngo ma itwero wacone me konye? Twero bedo ni pe itwero cobo pekone, ento iromo weko en ngeyo ni iparo pire. Me labolle, itwero keto yub me bedo kacel kwede pi cawa mo. Itwero kwano wang Baibul me cuko cwinye dok itwero lega kacel kwede. (Jabuli 34:18; Matayo 10:29-31) Wek jo ma cwinygi otur gunge ni omege ki lumege ma i kacokke marogi. (1 Jo Korint 12:12-26; Yakobo 5:14, 15) Lok i yo ma nyuto ni itye ka tito lok ada dok iye gin ma iwaco.​—Kwan Carolok 12:25.

20, 21. Ngo ma weko bedo yot pi jo mukene me jolo tam?

 ²⁰ Wadongo jo mukene bene ka waminigi tam maber. Kit ma wan ducu wabedo luroc-ci, wamito tam kare ki kare. Carolok 19:20 waco ni: “Winy tam ma gimini dok imak pwony ma gipwonyi kwede, ci ibibedo dano ma laryeko i kare me anyim.” Pe luelda keken aye gimiyo tam ki tira. Lunyodo myero gutir lutinogi. (Jo Epeco 6:4) Lumege bene gitwero miyo tam bot lumegigi. (Tito 2:3-5) Pi mar ma watye kwede i kom omegiwa ki lumegiwa, omyero wami tam i yo ma pe bimiyo giwinyo marac. Ngo ma twero konyowa me timo man?

²¹ Gwok nyo wi po i kom kare mo ma kimini tam maber i yo ma obedo yot me jolone. Ngo mumiyo ijolo labongo peko mo? Oromo bedo ni ineno ni ngat ma omini tam-mi paro piri. Nyo en oloko kwedi i yo me kica dok ki mar. (Jo Kolocai 4:6) Twero bedo ni tamme onongo jenge i Baibul. (2 Temceo 3:16) Kadi bed wakwano akwana ki i Baibul nyo pe, tam mo keken ma wamiyo myero obed ma jenge i kom Ginacoya. Ngati mo pe myero odi jo mukene me lubo tamme nyo onywen te ginacoya me cwako tamme. Ka wi opo i kom kit ma kimini tam, man twero konyi ka itye ka miyo tam bot jo mukene.

22. In imito tic ki mic me lok nining?

²² Kero me lok obedo mic mua ki bot Lubanga. Marwa pi Lubanga myero oterwa me tic kwede maber. Wi opo ni lok tye ki teko me poko kin dano nyo me dongogi. Pi meno, watute wunu ki kerowa ducu me loko lok ma jingo dok cuko cwiny jo mukene.