1-3. (a) Jo mapol giwinyo nining i kom ticgi? (b) Lapeny mene ma wabinyamo i dul man?

DANO mapol i twok lobo lung gitiyo matek me yenyo kwo ki gwoko jo me odigi. Jo mapol pe gimaro ticgi, dok giyelle ayela me cito ka tic nino ducu. Ka meno aye kit ma iwinyo kwede, ngo ma itwero timone me nongo yomcwiny i ticci? Itwero nongo mit pa ticci nining?

² Jehovah wacciwa ni: “Dano acel acel myero ocam cam, dok omat mat-gu, dok onong yomcwiny ma a i kom ticce ducu ma en tiyo.” (Latitlok 3:13) Jehovah ocweyowa ki miti me tic. En mito ni wanong yomcwiny i tic ma watimo.​—Kwan Latitlok 2:24; 5:18.

³ Dong, ngo ma twero konyowa me nongo yomcwiny i ticwa? Kodi tic ango ma Lukricitayo myero gugwokke kwede? Watwero tiyo ticwa i yo ma pe balo worowa bot Jehovah nining? Dok tic mene ma pire tek loyo ma watwero timone?

4, 5. Neno pa Jehovah tye nining i kom tic?

⁴ Jehovah kikome maro tic. Acakki 1:1 waco ni: “I  acakki piny Lubanga oketo polo ki lobo.” I nge tyeko ticce me cweyo lobo ki jami ducu ma iye, Lubanga owaco ni cwecce “tye mabeco twatwal.” (Acakki 1:31) Lacwecwa onongo cwinye yom i kom ginacweyane.​—1 Temceo 1:11.

⁵ Jehovah pe giko tic. Yecu owaco ni: “Wora tye ka tic nio koni.” (Jon 5:17) Kadi bed pe wangeyo jami ducu me aura ma Jehovah obedo ka timone, ento wangeyo mogo. En obedo ka yero jo mogo ma gibiloc kacel ki Wode Yecu Kricito, i Ker me polo. (2 Jo Korint 5:17) Jehovah bene tye ka tiro ki gwoko dano. Macalo adwogi me tito kwena i wi lobo ducu, dano milion mapol gitye ka ngeyo Jehovah dok gitye ki gen me nongo kwo ma pe tum i lobo paradic.​—Jon 6:44; Jo Roma 6:23.

6, 7. Yecu obedo kodi latic ango?

⁶ Calo Wonne, Yecu bene maro tic. Ma peya en obino i lobo, Yecu obedo ka nget Lubanga “macalo ladiro tic,” kun nywako i tic me cweyo jami ducu ma i polo ki lobo. (Carolok 8:22-31; Jo Kolocai 1:15-17) I kare ma Yecu tye i lobo, en omedde ki tic matek. Macalo bulu, en opwonyo tic me payo bao. Nen calo en obedo ka yubo kom ki mejagi-ni dok ogero odi. Yecu odoko ladiro adada i ticce mumiyo onongo kilwonge ni “lapac.”​—Marako 6:3.

⁷ Ento, tic ma pire tek loyo ma Yecu otimo i lobo kany obedo tito lok me kwena maber-ri ki pwonyo dano lok i kom Jehovah. En onongo tye ki mwaka adek ki nucu me cobo ticce, dok en otiyo matek cakke odiko con nio wa i dyewor. (Luka 21:37, 38;  Jon 3:2) Yecu owoto mairo miya mapol i gudi ma opong ki apwa, kun nywako lok me kwena maber-ri ki dano mapol.​—Luka 8:1.

8, 9. Pingo Yecu onongo yomcwiny i ticce?

⁸ Ki bot Yecu, tiyo tic pa Lubanga obedo calo cam. Tic man omiye kero ki teko. I nino mogo, Yecu onongo tiyo matek adada ma pe kwanyo wa cawa me cam. (Jon 4:31-38) En otiyo ki kare mo keken muwec me konyo jo mukene wek gupwony lok i kom Wonne. Meno aye gin mumiyo en owaco bot Jehovah ni: “Dong aketo deyo i komi i lobo, kun acobo tic ma ceng imiya me atiya.”​—Jon 17:4.

⁹ Dong, nen ka maleng ni Jehovah gin ki Yecu gitiyo matek adada dok ginongo yomcwiny ki yengo i ticgi. Wamito ni ‘walub kit pa Lubanga,’ kun bene ‘walubo kor Yecu macok.’ (Jo Epeco 5:1; 1 Petero 2:21) Meno aye gin mumiyo wayelle me tic matek dok waketo cwinywa i jami ducu ma watimo.

10, 11. Ngo ma twero konyowa me bedo ki neno matir i kom ticwa?

¹⁰ Macalo jo pa Jehovah, watiyo matek me yenyo kwo ki gwoko jo me odiwa. Wamito ni wanong yomcwiny i ticwa, ento i kine mukene pe yot. Dong ngo ma watwero timone ka pe wamaro ticwa?

¹¹ Bed ki neno matir. I kine mukene pe watwero loko ticwa nyo cawa ma myero wabed i dog tic, ento watwero loko nenowa. Ka waniang ngo ma Jehovah mito ki botwa, ci twero konyowa. Me labolle,  Jehovah mito ni luwi odi gutute matek me gwoko jo me odigi. Ki lok ada, Baibul waco ni dano ma pe gwoko jo me ode “rac makato ngat ma pe oye Lubanga.” (1 Temceo 5:8) Ka in ibedo won ot, ngene kene ni itiyo matek me gwoko jo me odi. Kadi bed imaro nyo pe imaro ticci, nge ni tuteni me gwoko jo me odi yomo cwiny Jehovah.

12. Adwogi maber ango ma wanongo pi tic matek ki bedo jo ma genne?

¹² Ti matek dok ibed ngat ma genne. Man twero weko bedo yot boti me nongo mit pa ticci. (Carolok 12:24; 22:29) Ki bene, ladit ticci biketo genne i komi. Ludito tic gimaro lutic ma genne pien pe gibikwalo cente, jami, nyo cawa. (Jo Epeco 4:28) Ento ma dong pire tek loyo, Jehovah ngeyo ka itiyo matek dok igenne. Itwero bedo ma ‘cwinyi pe pidi’ pien ingeyo ni itye ka yomo cwiny Lubanga ma imaro-ni.​—Jo Ibru 13:18; Jo Kolocai 3:22-24.

13. Adwogi maber ango ma twero bino pi bedo ngat ma genne?

¹³ Nge ni kiti i dog ticci twero kelo pak bot Jehovah. Man obedo tyen lok mukene mumiyo omyero wanong yomcwiny i ticwa. (Tito 2:9, 10) Latic lawoti mo bene twero bedo ki miti me kwano Baibul pien inyuto lanen maber.​—Kwan Carolok 27:11; 1 Petero 2:12.

14-16. Ngo ma myero watam iye ka watye ka yero tic?

¹⁴ Baibul pe oryeyo tic ma Lakricitayo myero otim nyo pe otim. Ento tye ki cik ma igi lac ma twero konyowa  me moko tam maber i kom tic. (Carolok 2:6) Watwero tic ki cik ma igi lac me Baibul ka watye ka penye kekenwa ki lapeny ma lubo-ni.

¹⁵ Tic man mono kwako timo gin ma Jehovah waco ni rac? Wangeyo jami ma Jehovah dagi calo kwalo kwo ki loko lok goba. (Nia 20:4; Tic pa Lukwena 15:29; Jo Epeco 4:28; Niyabo 21:8) Pi meno, wagwokke ki tic mo keken ma turo cik pa Jehovah.​—Kwan 1 Jon 5:3.

 ¹⁶ Tic man mono cwako kor gin ma Jehovah dagi? Me labolle, ket-ti kilwongi me tic macalo lagedo ka ma kitye ka gero iye kanica kono? Tic me gedo pe obedo gin marac. Ento ingeyo kit ma Lubanga dag kwede pwony goba ma kipwonyo i kanica. Pi meno, kadi bed pe itye ka pwonyo pwony goba, pe itamo ni Lubanga bene bineni macalo labal ka inywako i gedo kanica-ni?​—Niyabo 21:22-24.

17. Ngo ma twero konyowa me moko tam ma yomo cwiny Lubanga?

¹⁷ Ka watiyo ki cik ma igi lac me Baibul, ci watwero bedo kodi jo ma kiloko i komgi i Jo Ibru 5:14, ma waco ni: “Jo muteggi ma ryekogi ma gupwonnye kwede me poko gin maber ki gin marac dong ojing pi ketone i tic.” Penye kekeni ni: ‘Ka aye tic man, tika biyelo cwiny ma ngolo kop pa jo mukene? Tic man mono bimito ni awek luotwa ki lutinona ci acit i lobo mukene? Man bigudogi nining?’

18. Pingo twero bedo tek me keto pi worowa bot Jehovah mukwongo i kwowa?

¹⁸ Twero bedo tek adada me keto pi worowa bot Jehovah mukwongo i kare man me agikki ma ‘pinye rac-ci.’ (2 Temceo 3:1) Nongo ki gwoko tic twero bedo tek adada. Omyero wagwok jo me odiwa, ento wangeyo ni worowa myero obed mukwongo. Pe watwero weko jami me kom doko gin ma pire tek loyo i kwowa. (1 Temceo 6:9, 10) Dong watwero keto pi ‘jami ma pigi tego bedo mukwongo’ i kwowa nining  kun bene wamedde ki gwoko jo me odiwa?​—Jo Pilipi 1:10.

19. Keto genwa i kom Jehovah konyowa nining me bedo ki neno mupore i kom ticwa?

¹⁹ Gen Jehovah ki cwinyi ducu. (Kwan Carolok 3:5, 6.) Wangeyo ni Lubanga ngeyo gin ma wamito kikome dok en paro piwa mada. (Jabuli 37:25; 1 Petero 5:7) Lokke wacciwa ni: “Pe wubed jo ma maro lim; jami ma wutye kwede myero oromwu, pien Lubanga yam oloko ni, ‘Pe abiboli, pe abibwoti ata.’” (Jo Ibru 13:5) Jehovah pe mito ni wabed ki par kare ducu i kom kit ma wabigwoko kwede jo me odiwa. En obedo ka nyutone teretere ni etwero miyo jami ma mitte bot jone. (Matayo 6:25-32) Kadi bed ticwa mit nyo diyowa, omyero wamedde ki kwano Lok pa Lubanga, tito kwena maber-ri, ki wot i cokkewa.​—Matayo 24:14; Jo Ibru 10:24, 25.

20. Watwero weko kwowa bedo ma rwomme lapiny nining?

²⁰ Bed ki wang ma pe mito jami mapol. (Kwan Matayo 6:22, 23.) Man te lokke ni omyero ibed ki kwo ma rwomme lapiny wek iket cwinyi i tic pi Jehovah. Wangeyo ni obedo me mingo me tero cente, kwo ma rwomme lamal, nyo tet manyen calo gin ma pire tek loyo liremwa ki Lubanga. Dong, ngo ma bikonyowa me keto pi jami ma pigi tego mukwongo? Omyero wayelle matek pe me donyo i banya. Ka ce itye ki banya, go pulan me culone woko. Ka pe wagwokke, jami me kom twero kwalo cawawa ki kerowa, ci miyo pe wanongo kare me lega, kwan piwa kenwa, nyo wot i tic me pwony. Ma ka weko jami me  kom nyweno kwowa, omyero wapwonnye me bedo ma wayeng ki jami ma pigi tego calo “cam ki ginaruka.” (1 Temceo 6:8) Dong kadi bed jamiwa nok nyo pol, ber me ngine kare ki kare wek wanen kit ma watwero tic kwede pi Jehovah ki cwinywa ducu.

21. Pingo mitte ni wamok tam i kom gin mukwongo i kwowa?

²¹ Ket yub me cwiny dok imok iye. Myero wati ki kerowa, cawawa, kacel ki jami me kom i yo me ryeko. Ka pe wagwoke ci jami ma pigi pe tego calo  kwan i rwom ma lamal nyo cente twero camo cawawa woko. Yecu owacci: “Kong wukwong keto cwinywu i kom Kerre.” (Matayo 6:33) Tam ma wamoko, kitwa, yo me kwowa me nino ducu kacel ki yubwa binyuto gin ma pire tek loyo i kwowa.

22, 23. (a) Tic ango ma pire tek loyo ma wan macalo Lukricitayo watye kwede? (b) Ngo ma bikonyowa me nongo yomcwiny i tic ma watimo?

²² Tic ma pire tek loyo ma watye kwede aye tiyo miti pa Jehovah ki tito kwena maber-ri bot jo mukene. (Matayo 24:14; 28:19, 20) Calo Yecu, omyero watute ki kerowa ducu me timo tic man. Jo mogo gudak ka ma can lutit kwena tye iye. Jo mukene gitye ka pwonyo leb manyen wek gitit kwena bot jo ma loko leb meno. Lok ki jo ma gutimo man, dok ipenygi kit ma owoto kwede. Gin gibititi kit ma gunongo kwede yomcwiny ki yengo madit i kwogi.​—Kwan Carolok 10:22.

²³ I kareni, pol pa wan watero cawa malac i tic acel nyo mapat pat wek wanong jami ma mitte pi jo me odiwa. Jehovah ngeyo man, dok en pwoyo tutewa me gwoko jo me odiwa. Pi meno, wamedde wunu ki lubo lanen pa Jehovah ki Yecu kun watiyo matek labongo paro pi tic ango ma watimo. Dok wiwa myero opo ni ticwa ma pire tek loyo aye timo miti pa Jehovah ki tito kwena maber me Ker pa Lubanga. Meno aye obedo gin ma keliwa yomcwiny me ada.