1, 2. (a) Gen ango ma jo munyomme nyen gibedo kwede? (b) Lapeny ango ma wabinyamo i dul man?

GO KONG yomcwiny ma laco ki dako gibedo kwede i nino nyomgi. Wangi nongo meny amenya ki yomcwiny kun anyimgi bene nongo nen opong ki gen. Gigeno ni nyomgi birii dok bibedo me yomcwiny.

² Ento, nyom mapol ma cakke maber pe medde kumeno. Wek nyom orii dok obed me yomcwiny, luot myero gunong tira ki bot Lubanga. Kong dong wanyamu lagam ma Baibul miyo i kom lapeny magi: Adwogi maber ango ma nyom kelo? Ka imito nyomme, itwero yero ngat mupore nining? Itwero bedo laco nyo dako maber nining? Dok ngo ma weko nyom rii?​—Kwan Carolok 3:5, 6.

3. Itamo ni ngat moni myero onyomme wek obed ki yomcwiny? Tit kong.

³ Jo mukene gitamo ni ngat moni pe twero bedo ki yomcwiny ka pe onyomme. Ento man pe lok  ada. Yecu owaco ni bedo labongo nyomme twero bedo mic. (Matayo 19:11, 12) Dok lakwena Paulo bene oloko i kom ber pa bedo labongo nyomme. (1 Jo Korint 7:32-38) In aye myero imok tammi ka ce ibinyomme nyo pe. Pe iwek luremi, lupacowu, nyo tekwarowu oketi i lyeto me nyomme.

4. Adwogi maber ango ma bino pi nyom maber?

⁴ Baibul waco ni nyom bene obedo mic mua ki bot Lubanga dok tye ki berre bene. Ma lubbe ki Adam, Jehovah owaco ni: “Pe ber dano obed kene; abitimo lakony ma romme.” (Acakki 2:18) Jehovah ocweyo Kawa me bedo dako pa Adam, gin gudoko luot mukwongo. Ka luot gitye ki lutino, ci nyomgi myero ocib te guti maber me julo lutino. Ento, tyen lok me nyom pe obedo pi nywalo lutino keken.​—Jabuli 127:3; Jo Epeco 6:1-4.

5, 6. Nyom twero bedo calo “tol adek ma giwiyo kacel” nining?

⁵ Kabaka Solomon ocoyo ni: “Bedo jo aryo ber kato ma dano acel obedo kene, pien gin jo aryo-nu gitwero nongo bakacic maber ma a i kom tic ma gitiyo. I kin jo aryo-ni ka ngat acel opoto piny, ci lawote ilo woko malo; ento ngat ma bedo kene tye ki can, pien ka opoto piny pe tye ngat mo mukene ma twero ile woko malo. . . . Pe tye ngat mo ma twero codo tol adek ma giwiyogi kacel oyotoyot.”​—Latitlok 4:9-12.

⁶ Nyom maber twero bedo lirem macok loyo i kin jo aryo ma nongo ngat acel konyo, kweyo cwiny, dok gwoko lawote. Mar twero weko nyom  bedo matek liking, ento nyom twero bedo matek loyo ka laco ki dakone giworo Jehovah. Ci nyomgi doko calo “tol adek ma giwiyo kacel.” Tol ma kit meno tek loyo tol aryo ma kiwiyo kacel. Nyom bedo matek ka Jehovah tye iye.

7, 8. Tam ango ma Paulo omiyo i kom nyom?

⁷ Luot ma gunyomme gitwero nongo mit pa cobo mitigi me buto. (Carolok 5:18) Ento, ka ngat moni mito nyomme pi cobo mitine me buto keken, ci en pe biyero luote ki ryeko. Meno aye gin mumiyo Baibul waco ni ngat moni myero onyomme ka en dong okato kare me “bulu,” ma nongo miti me buto tek tutwal-li. (1 Jo Korint 7:36, NW) Ber me kuro nio ka miti meno okwe. Dano meno dong cako tamo tam matir dok moko tam maber.​—1 Jo Korint 7:9; Yakobo 1:15.

⁸ Ka itye ka tamo i kom nyomme, myero ibed ki neno mupore kun ingeyo ni nyom ducu tye ki peko mogo iye. Lakwena Paulo owaco ni jo ma nyomme “gibinongo ayelayela me kwo.” (1 Jo Korint 7:28) Kadi wa nyom maber loyo pud kato ki i pekki mapat pat. Pi meno, ka imoko tammi me nyomme, myero iyer ngat ma ibinyomo ki ryeko.

9, 10. Ngo ma bitimme ka wanyomo ngat ma pe woro Jehovah?

⁹ Ka itye ka yero laco nyo dako me bedo luotwu, wi myero opo i kom cik ma iye lac me Baibul man: “Pe wuribbe [i kom ayok acel, NW] ki jo ma pe guye.” (2 Jo Korint 6:14) Lapor man jenge i kom  kwo me pur. Ka lee aryo tye ki caji nyo kero mapat pat, lapur pe tweyogi i kom ayok acel. Ka en otimo man, lee aryo-ni ducu gideno can. I yo acel-lu bene, ka ngat ma woro Jehovah ki ngat ma pe woro Jehovah gutwene i kom ayok acel me nyom, ngene kene ni ayelayela mapol wang ma obedo tye. Pi meno, Baibul miniwa tam me ryeko me nyomme “i kin jo pa Rwot keken.”​—1 Jo Korint 7:39.

¹⁰ I kare mukene, Lukricitayo mogo gitamo ni nyomme ki ngat ma pe woro Jehovah ber loyo bedo kengi. Ento ka wacayo tira me Baibul, pol kare adwogine bedo cwercwiny keken. Macalo luwor Jehovah, tic pire aye obedo gin ma pire tek loyo i kwowa. Ibiwinyo nining ka pe itwero nywako gin ma pire tek loyo i kwoni ki luotwu? Jo mapol gumoko tamgi me bedo ma wigi nono ma ka nyomo ngat ma pe maro dok pe tiyo pi Jehovah.​—Kwan Jabuli 32:8.

11. Itwero yero ngat me anyoma ki ryeko nining?

¹¹ Man pe te lokke ni ngat mo keken ma tiyo pi Jehovah pore me anyoma. Ka imito nyomme, yeny ngat mo ma imaro adada dok ma wiwu rwatte kwede. Kur wang ma inongo ngat ma yubbe rwatte ki megi dok keto tic pi Jehovah bedo mukwongo i kwone. Kwany cawa me kwano ki lwodo lok i kom tam me ryeko ma lagwok ot ma lagen omiyo i kom nyom.​—Kwan Jabuli 119:105.

12. Pwony ango ma watwero nongone ki i nyom ma onongo kiyubo ayuba i kare me Baibul?

¹² I tekwaro mogo, lunyodo aye pol kare yero nga  ma latingi myero onyom. I tekwaro ma kit meno, kineno lunyodo macalo jo ma yamo okuto wigi ma gingeyo ngat mupore pi latingi. Tekwaro man onongo bene tye i kare me Baibul. Pi meno, ka ce lupacowu gilubo tekwaro man, Baibul twero konyo lunyodo me ngeyo ngat ma tye ki kit mupore. Me labolle, i kare ma Abraim oyero dako pi wode Icaka, gin ma pire tek bot Abraim pe obedo cente nyo rwom me kwo; ento en oyenyo ngat ma maro Jehovah.​—Acakki 24:3, 67; nen Lok me Giko Buk Man me 25.

13-15. (a) Laco twero bedo won ot maber nining? (b) Dako twero yubbe me bedo min ot maber nining?

¹³ Ka ce itye ka tamo pi nyom, ci omyero inen ni itye atera. Twero bedo ni itamo ni itye atera, ento kong wanyamu ngo kikome ma nyuto ni ngat moni tye atera me nyomme. Lagamme twero cungo wi woko.

¹⁴ Baibul nyuto ni laco ki dako gitye ki tic mapat pat i ot. Pi man, ngene kene ni laco ki dako giyubbe i yo mapat pat pi nyom. Ka laco mo mito nyomme, en myero openye kekene ka ce etye atera me bedo lawi ot. Jehovah mito ni laco ogwok dakone ki lutinone kun minigi jami me kom ma mitte kacel ki jami ma keligi yomcwiny. Ma dong pire tek loyo, laco myero otel wi jo me ode i woro Lubanga. Baibul waco ni laco ma pe gwoko jo me ode “rac makato ngat ma pe oye Lubanga.” (1 Temceo 5:8) Pi meno, ka in laco ma itye ka tamo pi nyom, tam i kom kit ma itwero keto kwede cik ma iye lac man i tic: “Mukwongo kong ikwong tiyo ticci ma tye woko, pur poto dok ipit iye ginapita ducu ma mitte; ka lacen dong icak gero odi.” Dong, ma peya inyomme nen ni itwero bedo won ot ma Jehovah mito ni ibedi.​—Carolok 24:27.

¹⁵ Dako ma tye ka tamo pi nyom myero openye kekene ka ce etye atera me cobo dog okorine macalo min ot nyo mego. Baibul loko i kom yo mapol ma dako maber gwoko kwede cware ki  lutinone. (Carolok 31:10-31) I kare-ni, co ki mon mapol gitamo mere pi gin ma luotgi twero timone pigi. Ento, Jehovah mito ni watam i kom gin ma watwero timo pi luotwa.

16, 17. Ka itye ka tamo pi nyom, ngo ma myero ilwodi?

¹⁶ Ma peya inyomme, lwod lok i kom gin ma Jehovah waco i kom co ki mon. Bedo lawi ot pe te lokke ni laco dong twero bwuro kun goyo nyo yeto dakone. Lawi ot maber lubo lanen pa Yecu, ma kare ducu maro dok tero jo ma i te gwokke ki kica. (Jo Epeco 5:23) Ki tungcel, dako myero otam i kom kit ma etwero cwako kwede tam ma cware omoko. (Jo Roma 7:2) En myero openye kekene ka ce ebibedo ki yomcwiny me mine i te tela pa laco ma tye ki roc. Ka ce en tamo ni pe etwero, ci en romo moko tamme ni twora ebedo ma wiye nono.

¹⁷ Co ki mon myero gupar pi yomo cwiny luotgi makato yomo cwinygi kekengi. (Kwan Jo Pilipi 2:4.) Lakwena Paulo ocoyo ni: “Laco acel acel i kinwu myero omar dakone macalo maro kome kene, ki dako bene myero onen ni eworo cware.” (Jo Epeco 5:21-33) Co ki mon ducu gimito winyo ni kimarogi dok kiworogi. Ento wek nyom obed me yomcwiny, tutwalle laco myero onge ni dakone wore, dok dako bene myero onge ni cware mare.

18. Pingo laco ki dako myero gugwokke mada i kare ma gitye ka winye?

¹⁸ Kare me winye myero obed kare me yomcwiny ma nongo ngat man woto ki ngeyo lawote. Man bene obedo kare me tito lok ada wek gumok tamgi  ka ce gimito bedo kacel pi kwogi olu. I kare me winye, laco ki dako myero gule tam maber dok gutemme me niang gin ma tye i cwiny ngat acel acel. Ka watgi woto ki moko matek, atematema me nyuto mar twero bino matek pien meno obedo gin ma tye i remo. Ento, omyero gujukke kengi wek pe gudony i tim tarwang ma peya gunyomme. Mar me ada bikonyogi me jukke kengi dok bigwokogi ki i timo gin mo keken ma twero balo watgi ki Jehovah.​—1 Jo Tecalonika 4:6.

19, 20. Lukricitayo gineno nyom nining?

¹⁹ Jo mapol gitamo ni ka ginyomme, ci gibibedo maber ki yomcwiny labongo peko mo keken. Ento meno pe obedo lok ada, nyom obedo mere acakki me kwo me ot. Jehovah mito ni nyom obed gin marii.​—Acakki 2:24.

²⁰ I kareni, jo mapol gitero nyom calo gin ma tye pi tutuno. Yot adada me nyomme, dok yot adada me keto keny woko. Jo mogo gitamo ni ka peko ocakke, omyero giwek luotgi ci giket kenygi woko. Ento wi myero opo i kom lapor ma Baibul otiyo kwede me tol adek ma kiwiyo kacel. Tol ma kit meno pe twero cod oyotoyot kadi bed kitye ka telone matek adada. Ka wayenyo kony ki bot Jehovah, ci nyomwa birii. Yecu owaco ni: “Gin ma Lubanga oribo kacel, dano pe opok kingi.”​—Matayo 19:6.

21. Ngo ma bikonyo laco ki dako me nyuto mar i kingi?

²¹ Wan ducu watye ki kit mabeco kacel ki gorowa. Yot adada me keto tamwa i kom goro pa jo mukene, tutwalle pa luotwa. Ento ka watimo man, pe wabibedo ki yomcwiny. Ki tungcel, ka waketo cwinywa me neno kit mabeco pa luotwa, ci nyomwa bibedo ki yomcwiny. Tika twere me bedo ki neno ma kit man i kom luotwa? Eyo! Jehovah ngeyo maber adada ni wan luroc, ento en keto cwinye me neno kit mabeco ma watye kwede. Tam kong ka en onongo pe timo meno! Laco jabuli owaco ni: “Ai Rwot [Jehovah], ka nene onongo iparo balwa, anga munongo twero cung i nyimi, in Rwot?” (Jabuli  130:3) Co ki mon gitwero lubo lanen pa Jehovah ki keto cwinygi me neno kit mabeco pa luotgi kun bene gitimo kica oyotoyot.​—Kwan Jo Kolocai 3:13.

22, 23. Abraim ki Cara gunyuto lanen maber bot jo munyomme nining?

²² Ka mwaka woto ki kato, ci nyom twero jing  doko matek. Abraim ki Cara gubedo kacel macalo laco ki dako ki yomcwiny pi kare malac. I kare ma Jehovah owaco bot Abraim ni oa woko ki i boma me Ur, Cara onongo nen calo tye ki mwaka 60 ki wiye. Go kong kit ma obedo tek kwede bot Cara me weko pacone ma ongi kwede me cito ka bedo i kema. Ento Cara onongo obedo larem ki luot maber bot cware, dok onongo wore adada. Pi meno, en ocwako tam pa cware dok okonye me cobone.​—Acakki 18:12; 1 Petero 3:6.

²³ Ngene kene ni bedo ki nyom maber pe te lokke ni laco ki dako tamgi birwatte i jami ducu. Nino mo acel ma Abraim pe oye tam pa Cara, Jehovah owacce ni: “Tim kit ma en otiti.” Abraim otimo kumeno ci adwogine obedo maber. (Acakki 21:9-13) I kare mukene ka tammi pe orwatte ki pa luotwu, pe iwek cwinyi oballe. Gin ma pire tek aye ni kadi bed tamwu pe orwatte, myero imedde ki tero luotwu ki mar kacel ki woro.

24. Nyomwa twero kelo deyo bot Jehovah nining?

²⁴ I kacokke pa Lukricitayo, tye jo munyomme alip mapol ata ma cwinygi yom. Ka imito nyomme, wi opo ni yero ngat ma ibinyomo tye i kin tam ma pire tek loyo ma ibimokone i kwoni. Pi meno, yeny tira pa Jehovah, pien tam ma imoko bigudo kit ma ibikwo kwede. Ka ilubo tira pa Jehovah, ci ibiyero luotwu ki ryeko, ibiyubbe maber pi nyom, dok ibidongo wat matek ki luotwu. Man bikelo deyo bot Jehovah.