1, 2. Pingo omyero wagwokke ka watye ka yero galowang?

TAM kong ni imito camo nyig yat mo mamit adada ento dok ineno ni bute tungcel otop woko. Ngo ma ibitimo? Tika ibicamo nyig yatte ducu? Tika ibibolo woko? Nyo kece ibingolo bute mutop-pi ci icamo bute maber-ri?

² I yo mogo, galowang mito bedo rom aroma ki nyig yat meno. Mukene ber, ento polle otop adada pien ni opong ki tim tarwang, tim gero, nyo tim jokjok. Pi man, ka itye ka yero galowang, tika iwaco  ni: “Lokke pe kwako ngat mukene. Atwero yero galowang ma amito”? Nyo tika iwaco ni: “Galowang ducu raco”? Nyo kece iyero galowang ki diro, kun igwokke ki maracone ento iyero mabecone?

3. Ngo ma myero watam iye ka watye ka yero galowang?

³ Wan ducu wamito galowangwa ki yweyo wiwa, dok wamito yerone maber. Pi meno, omyero wapenye kekenwa kit ma galowang ma wayero twero gudo kwede woro ma wamiyo bot Jehovah.

4. Cik ma iye lac mene ma twero konyowa ka watye ka yero galowang?

⁴ Ka wadyero kwowa bot Jehovah, ci nongo wacikke bote ni wabitic ki kwowa me wore. (Kwan Latitlok 5:4.) Wacikke ni ‘wabitimo jami ducu pi miyo deyo bot Lubanga.’ (1 Jo Korint 10:31) Man te lokke ni nongo pud wadyere bot Lubanga ka watye ka mato yamo nyo galowangwa, ento pe ka watye i cokke nyo tic me pwony keken.

5. Kodi woro ango ma myero wami bot Jehovah?

⁵ Jami ducu ma watimo i kwowa gudo worowa bot Jehovah. Paulo otito man i kare ma en owacci: “Wumine kenwu macalo gitum makwo ma gityero bot Lubanga, gin maleng ma yomo cwiny Lubanga.” (Jo Roma 12:1) Yecu owacci: ‘Mar Jehovah Lubangani ki cwinyi ducu, ki kwoni ducu, ki tammi ducu ki tekki ducu.’ (Marako 12:30) Kare ducu wamito miyo bot Jehovah gin maber loyo ma watye kwede. I kare pa Luicrael, ka ngat mo onongo  mito tyero lee bot Jehovah, en onongo myero omi lee ma kome yot. Ka gityer meno onongo tye ki peko mo i kome, Lubanga onongo pe jolo. (Lulevi 22:18-20) I yo acel-li bene, Jehovah twero kwero woro ma wamine. Pingo?

6, 7. Galowang ma wayero twero gudo worowa bot Jehovah nining?

⁶ Jehovah waco botwa ni: “Wubed jo maleng, pien an aleng.” (1 Petero 1:14-16; 2 Petero 3:11) Jehovah bijolo worowa keken ka leng. (Nwoyo Cik 15:21) Worowa pe twero bedo leng ka watimo jami ma Jehovah dagi, calo tim tarwang, tim gero, nyo jami ma kubbe ki tim jokjok. (Jo Roma 6:12-14; 8:13) Ento bene bicwero cwiny Jehovah ka wagalo wangwa ki jami magi. Man twero cido worowa woko ci weko Jehovah dong pe jolo, dok twero balo watwa kwede.

⁷ Pi man, watwero yero galowang ki ryeko nining? Cik ma igi lac mene ma bikonyowa me niang galowang maber ki marac?

8, 9. Kodi galowang ango ma wagwokke kwede, dok pingo?

⁸ Tye jami mapol mapat pat me galowang i kare-ni. Mogo ber pi Lukricitayo, ento polle giraco. Mukwongo, kong wanenu galowang ma myero wagwokke kwede.

⁹ Filim mapol, kabedo me intanet, purogram me telebijon, tuko me vidio, ki wer mapol opong ki tim carocaro, tim gero, nyo tim jokjok. Jami  maraco pol kare kiboyo i yo ma nen ber dok weko dano nyero. Ento Lukricitayo gigwokke ki galowang ma pe nyuto lengo pa Jehovah. (Tic pa Lukwena 15:28, 29; 1 Jo Korint 6:9, 10) Ka wakwero galowang ma kit meno, wanyuto bot Jehovah ni wadag gin marac.​—Jabuli 34:14; Jo Roma 12:9.

10. Adwogine twero bedo nining ka wagalo wangwa ki jami maraco?

¹⁰ Ento jo mogo gitamo ni pe rac me galowanggi ki tim gero, tim tarwang, nyo tim jokjok. Gin gitamo ni: ‘Racce tye kwene? Pe atwero timo jami magi.’ Ka watamo kumeno, ci nongo watye ka bwolle kekenwa. Baibul waco ni: “Cwiny dano en aye gin ma bwolo dano ma kato gin mukene-gu ducu, opong ki gin marac adada.” (Jeremia 17:9) Ka ce wagalo wangwa ki jami ma Jehovah dagi, ci watwero wacone nining ni wadag jami magi? Ka wanenogi teretere, ci wabicako terone calo gin ma pe rac. I nge kare mo, cwiny ma ngoliwa kop bidoko goro ci pe jukowa ka wacok moko tam marac.​—Jabuli 119:70; 1 Temceo 4:1, 2.

11. Jo Galatia 6:7 konyowa nining ka watye ka yero galowang?

¹¹ Lok pa Lubanga wacciwa ni: “Gin ma dano ocoyo, en aye bene en bikayo.” (Jo Galatia 6:7) Obedo lok ada ni ka wagalo wangwa ki jami maraco, ci i nge kare mo wacako timone. Me labolle, jo mogo ma gugalo wanggi ki tim tarwang, lacen gutimo tim tarwang bene. Ento Jehovah miniwa kony me yero galowang ki ryeko.

12. Ngo ma bikonyowa me moko tam maber ka odok i kom galowang?

¹² Tye galowang mogo ma Jehovah okwero lajwac, dok omyero wagwokke kwede. Ento ket kong ni pe ingeyo ka ce galowang moni ber nyo rac. Ngo ma dong ibitimo? Jehovah pe oryeyo cik mapol i kom gin ma watwero neno, winyo, nyo kwanone. Ma ka meno, en mito ni wati ki cwiny ma ngoliwa kop. (Kwan Jo Galatia 6:5.) Jehovah ominiwa cik ma igi lac, ma gubedo lok ada ma pe lokke ma pwonyowa kit ma en neno kwede jami mogo. Cik ma igi lac magi gipwonyo cwiny ma ngoliwa kop-pi. Gikonyowa me ngeyo “gin ma Rwot [Jehovah] mito” wek wamok tam ma yomo cwinye.​—Jo Epeco 5:17.

13. Pingo Lukricitayo gimoko tam mapat pat ka odok i kom galowang? Ento Lukricitayo ducu myero gutim gin ango?

¹³ Pol kare, galowang ma Lakricitayo moni yero twero bedo pat ki ma lawote yero. Pingo? Wan ducu wamaro jami mapat pat. Ki bene, gin ma ngat acel neno ni ber, lawote twero nenone calo pe ber. Kadi bed kumeno, me moko tam maber, Lukricitayo ducu omyero gulub cik ma igi lac me Baibul. (Jo Pilipi 1:9) Man bikonyowa me yero galowang ma yomo cwiny Lubanga.​—Jabuli 119:11, 129; 1 Petero 2:16.

14. (a) Ngo ma myero watam iye ma lubbe ki kit ma watiyo kwede ki cawawa? (b) Tam ango ma Paulo omiyo bot Lukricitayo?

¹⁴ Gin mukene ma myero watam iye aye cawa  ma wacwalo i galowang. Man twero nyuto kit ma galowang pire tek kwede botwa. Macalo Lukricitayo, ticwa pi Jehovah aye gin ma pire tek loyo i kwowa. (Kwan Matayo 6:33.) Ento ka pe wagwokke, ci galowang twero camo cawawa malac. Paulo omiyo tam man bot Lukricitayo: “Pe wubed macalo jo ma kwiya piny, ento calo jo maryek. Kare ma tye myero iti kwede i yo maber.” (Jo Epeco 5:15, 16) Pi meno, omyero waket wang cor i kom cawa ma wacwalo i galowang, kun waneno ni ticwa pi Lubanga aye obedo gin mukwongo i kwowa.​—Jo Pilipi 1:10.

15. Watwero gwokke nining ki i galowang ma twero balo watwa ki Jehovah?

 ¹⁵ Ada, omyero wakwer lajwac kit galowang mo keken ma pe yomo cwiny Jehovah. Ento, ngo ma myero watim ka ce watye ki gung cwiny i kom galowang moni? Tika pud mitte ni wagwokke? Tam kong i kom labol ma kiloko iye i paragraf mukwongo-ni. Wek pe icam gin mutop, omyero pe ingol ka marac-ci keken, ento ingol wa kabedo murumo ka ngete ducu. I yo acel-li, ber pe me cito cok ki ka ma rac i lok madok i kom galowang. Lok pa Lubanga wacciwa ni: “Pe imar timo gin marac.” (Carolok 4:25-27) Pi man, omyero pe wagwokke ki galowang ma wangeyo ni rac keken, ento omyero bene wabed bor ki galowang ma watamo ni pe ber piwa dok twero balo watwa ki Jehovah.

16. (a) Jami macalo mene ma Jehovah dagi? (b) Wanyuto nining ni wadag gin ma Jehovah dag?

¹⁶ Laco Jabuli ocoyo ni: “[Jehovah] maro jo ma dag gin marac.” (Jabuli 97:10) Baibul pwonyowa kit ma Jehovah tamo kwede. Penye kekeni i kom kit ma pwony ma inongo-ni twero konyi kwede me neno jami kit ma Jehovah neno kwede. Me labolle, wapwonyo ni Jehovah dag ‘jo ma loko lok goba, en bene dag jo ma gioyo remo pa jo ma pe ki bal, ki jo ma giringo oyotoyot ka tiyo gin marac.’ (Carolok 6:16-19) Wapwonyo bene ni omyero wagwokke ki “tim kwele, . . . woro cal jogi, talo dano, . . . nyeko, kiniga, . . . mero ki kongo, cam me yomcwiny me  mingo marac, ki mogo mukene macalo meno.” (Jo Galatia 5:19-21) Tika ineno kit ma cik ma igi lac magi twero konyi kwede me yero galowang maber? Wamito lubo cik pa Jehovah i kabedo ducu me kwowa, ka watye i kin dano nyo ka watye kenwa. (2 Jo Korint 3:18) Ki lok ada, tam ma wamoko ka watye kenwa nyuto kit dano ango ma wabedo.​—Jabuli 11:4; 16:8.

17. Ma peya wayero galowang moni, lapeny ango ma myero wapenye kwede?

¹⁷ Pi meno, ka itye ka yero galowang, penye kekeni ni: ‘Tam ma amoko bigudo watta ki Jehovah nining? Bigudo cwiny ma ngola kop nining?’ Kong wanyamu cik ma igi lac mukene ma twero konyowa ka watye ka yero galowang.

18, 19. (a) Tam ango ma Paulo omiyo bot Lukricitayo? (b) Cik ma igi lac mene ma twero konyowa me yero galowang maber?

¹⁸ Ka watye ka yero galowang, rom ma nongo watye ka yero ngo ma wabipongo kwede ki tamwa. Paulo ocoyo ni: “Utmega, wuket tamwu i kom lok macalo magi: gin ducu ma tye ada, gin ducu ma romo awora, gin ducu ma tye atir, gin ducu maleng, gin ducu ma mwonya, gin ducu ma dano pwoyo, ki gin mo maber makato, ma myero apaka.” (Jo Pilipi 4:8) Ka wapongo tamwa ki jami mabeco magi, ci watwero wacone ni: “Mi lok ma a ki i doga ki tam ducu ma tye i cwinya obed ma in ipwoyo, ai [Jehovah].”​—Jabuli 19:14.

¹⁹ Penye kekeni ni: “Ngo ma atye ka pongo kwede ki tamma? I nge neno filim mo, tika adong  ki tam mabeco i wiya? Tika abedo ma wiya opye mot dok ma cwinya pe ngola kop? (Jo Epeco 5:5; 1 Temceo 1:5, 19) Tika abedo agonya me lega bot Jehovah? Nyo awinyo marac? Galowang meno tika oweko abedo ka tam i kom tim gero nyo tim tarwang? (Matayo 12:33; Marako 7:20-23) Galowang ma ayero mono nyuto ni ‘atye ka lubo tam me lobo man’?” (Jo Roma 12:2) Lagamwa twero konyowa me niang gin ma myero watim wek wabed ki wat macok ki Jehovah. Wamito lega calo laco jabuli ma owaco ni: “Pe iwek abed ka neno jami atata ma konygi pe.” *​—Jabuli 119:37.

20, 21. Pingo omyero watam pi kit ma jo mukene giwinyo kwede ka watye ka yero galowang?

²⁰ Cik mukene ma iye lac ma myero watam iye en ene: “Atwero timo jami ducu, ento man pe nyuto ni jami ducu dongo niye pa dano. Dano pe olub gin ma konyo en keken, ento myero olub gin ma konyo lawote bene.” (1 Jo Korint 10:23, 24) Ka watye agonya me timo gin moni, man pe te lokke ni omyero dong watim. Omyero kong watam matut i kom kit ma tam ma wabimoko twero gudo kwede omegiwa ki lumegiwa.

²¹ Cwiny ma ngolo kop pa ngat acel acel pe tiyo marom. Me labolle, cwiny ma ngoli kop romo yeni  me neno purogram mo me telebijon. Ento lacen iromo niang ni purogram meno yelo cwiny ma ngolo kop pa omeru nyo lameru. Ngo ma dong ibitimo? Kadi bed itye ki twero me nenone, iromo moko tammi pe me neno purogram meno. Pingo? Pien pe imito ‘timo bal bot omegini’—​nyo bene ‘i kom Kricito.’ (1 Jo Korint 8:12) Pe wamito ni watim gin mo keken ma biyelo cwiny ma ngolo kop pa Lakricitayo lawotwa.​—Jo Roma 14:1; 15:1; 1 Jo Korint 10:32.

22. Watwero nyuto niango nining ka odok i kom tam ma Lukricitayo mukene gimoko?

²² Ki tungcel, ka cwiny ma ngoli kop pe yeni me neno, kwano, nyo timo gin mo ma ngat mukene nongo ni ber kono? Dong, pien imaro dok iworo omeru, pe ibiketo lyeto i kome me moko tam ma rwatte ki megi. Ladwo mutoka ngeyo ni jo mukene guromo ngwec i cipid ma pe rwatte ki mege, ento nongo pud gubedo ludwo mutoka maber. I yo acel-lu bene, twero bedo ni in ki omego mukene nongo wutye ka lubo cik ma igi lac me Baibul, ento nenowu aye tye mapat pat i kom galowang maber.​—Latitlok 7:16; Jo Pilipi 4:5.

23. Ngo ma bikonyowa me yero galowang maber?

²³ Dong, ngo ma bikonyowa me yero galowang maber? Ka watiyo ki cwiny ma ngoliwa kop ma kipwonyo ki cik ma igi lac me Baibul, dok waparo pi omegiwa ki lumegiwa, ci wabimoko tam maber. Dok wabibedo ki yomcwiny pien watye ka ‘timo jami ducu pi miyo deyo bot Lubanga.’