1, 2. Ngo ma Jehovah mito pi jo me odi?

LUBANGA JEHOVAH aye oyubo nyom me acel. Baibul wacciwa ni en ocweyo dako mukwongo ka ‘okelo bot laco.’ Adam onongo cwinye yom adada mumiyo en owaco ni: “Man aye cogo mua i cogona kikome, ki ringo bene mua ki i ringona kikome.” (Acakki 2:22, 23) Man pwonyowa ni Jehovah mito ni jo munyomme gubed ki yomcwiny.

² Rac mada ni jo me odi mukene pe ginongo yomcwiny i kwogi. Ento, Baibul tye ki cik mapol ma twero konyo jo me odi me yubo kwogi wek obed maber kun ginongo yomcwiny i bedo kacel.—Luka 11:28.

3, 4. (a) Laco myero oter dakone nining? (b) Pingo pire tek pi laco ki dako me timo kica i kingi?

³ Baibul waco ni laco maber myero oter dakone ki mar dok ki woro. Kwan Jo Epeco 5:25-29. Laco myero oter dakone i yo me mar kare ducu. En bene myero ogwok dakone dok pe otim gin mo ma twero wanne.

⁴ Ento laco myero otim gin ango ka dakone otimo bal? Kiwaco bot co ni: “Wun co bene wumedde ki maro monwu, pe wubed ki gero i komgi.” (Jo Kolocai 3:19, NW) Co, wiwu myero opo ni wun bene wutimo bal. Dok ka imito ni Lubanga otimmi kica,  in bene omyero itim kica bot dakoni. (Matayo 6:12, 14, 15) Ka laco ki dakone gitye atera me timo kica i kingi, man bikonyogi me bedo ki yomcwiny i nyomgi.

5. Pingo myero laco owor dakone?

⁵ Jehovah mito ni laco myero owor dakone. Laco myero otam i kom jami ma dakone mito. Man pe obedo lok me tuko. Ka laco nywaro dakone, Jehovah twero kwero winyo legane. (1 Petero 3:7) Gin ma weko dano pigi bedo tek bot Jehovah aye mar ma gin gitye kwede pi en. En pe neno ni laco dok pire tek kato dako.

6. Te lokke ngo pi laco ki dako me bedo “kom acel”?

⁶ Yecu otito ni laco ki dakone ‘pe dong gibedo kom aryo ento kom acel.’ (Matayo 19:6) Gigwoko genne i kingi dok pe gidonyo i tim me abor. (Carolok 5:15-21; Jo Ibru 13:4) Laco ki dakone myero gucob mitigi me buto labongo wanya mo. (1 Jo Korint 7:3-5) Wi laco myero opo ni ‘pe tye ngat mo ma dag kome kekene, ento pito ki cam dok gwoko maber.’ Pi meno, en myero omar dok ogwok dakone maber. Makato ducu, gin ma dako mito ki bot cware aye ni cware myero otere i yo me kica dok ki mar.—Jo Epeco 5:29.

7. Pingo paco acel acel myero obed ki lawiye?

⁷ Paco acel acel myero obed ki lawiye, ngat mo ma tirogi wek guti kacel. Baibul tittiwa i 1 Jo Korint 11:3 ni: “Wi laco acel acel en aye Kricito, wi dako aye cware, ki wi Kricito aye Lubanga.”

8. Dako twero nyuto woro matut pi cware nining?

 ⁸ Co ducu gitimo bal. Ento ka dako cwako tam ma cware omoko dok note kacel kwede, ci jo ducu me ot meno gibedo ki yomcwiny. (1 Petero 3:1-6) Baibul waco ni: “Dako myero onen ni eworo cware.” (Jo Epeco 5:33) Ka laco pe nywako niye pa dakone kono? Pud mitte ni dako myero obed ki woro i kom cware. Baibul waco ni: ‘Kit meno bene, wun mon wumine me bedo i te loc pa cogwu, wek ka ce co mogo i kingi pe gilubo lok pa Lubanga, ci gitwero lokke pi kit pa mongi, kadi bed gin ki komgi pe giloko lok mo ki doggi, ento ka guneno kitwu maleng ma nen me woro.’ (1 Petero 3:1, 2) Lanen maber pa dako twero konyo cware me niang ki woro niye pa dakone.

9. (a) Ngo ma dako myero otim ka tamme pe rwatte ki pa cware? (b) Tam ango ma kimiyo bot mon i Tito 2:4, 5?

⁹ Gin ango ma dako myero otim ka ce tamme pe rwatte ki pa cware? Dako myero olok tamme ki  woro. Me labolle Cara oloko gin mo ma pe oyomo cwiny Abraim, ento Jehovah owaco bot Abraim ni: “Tim kit ma en otiti.” (Acakki 21:9-12) Pol kare, co ma Lukricitayo gimoko tamgi ma lubbe ki gin ma Baibul waco, pi meno dako myero ocwak lokke. (Tic pa Lukwena 5:29; Jo Epeco 5:24) Dako makwiri gwoko jo me ode. (Kwan Tito 2:4, 5.) Ka cware ki lutinone gineno kit ma en tiyo kwede matek, ci gibimare dok gibiwore adada.—Carolok 31:10, 28.

10. Baibul waco gin ango i kom pokke ki keto keny?

¹⁰ I kare mukene, laco ki dako gimoko tamgi me pokke nyo keto keny woko oyotoyot. Ento Baibul waco ni “dako [myero] pe okwer cware” dok “laco bene pe myero oryem dakone.” (1 Jo Korint 7:10, 11) Tye jami mogo ma nongo dong okato um okuro woko ma twero kelo pokke i kin jo munyomme, ento myero kong itam matut ma peya imoko tam man. Ento keto keny kono? Baibul nyuto ni tyen lok acel keken ma miyo ngat moni twero keto keny en aye ka cware nyo dakone otimo abor.—Matayo 19:9.

11. Ngo ma lutino gimito makato gin mo keken?

¹¹ Lunyodo, wumi kare malac ki lutinowu. Lutinoni gimito in. Makato gin mo keken, gimito ni ipwonygi lok i kom Jehovah.—Nwoyo Cik 6:4-9.

12. Ngo ma lunyodo myero gutim me gwoko lutinogi?

¹² Lobo pa Catan-ni tye ka doko rac medde ameda nino ducu, dok tye dano mogo ma gimito wano, nyo pyedo lutinowa. Lunyodo mukene ginongo ni tek  mada me loko lok man ki lutinogi. Ento lunyodo myero gucik lutinogi dok gupwonygi me gwokke ki kodi jo magi. Lunyodo, myero wugwok lutinowu. *—1 Petero 5:8.

13. Lunyodo myero gupwony lutinogi nining?

¹³ Lunyodo gitye ki tic me pwonyo lutinogi kit ma myero gukwo kwede. Iromo pwonyo lutinoni nining? Lutinoni myero gunong pwonye, ento pe myero imi tira ki gero. (Jeremia 30: 11) Pi meno,  pe imi pwod bot lutinoni ma nongo kiniga omaki. Lokki myero pe obed calo ‘pala lucwan ma cobo’ dok wanogi. (Carolok 12:18) Pwony lutinoni me niang tyen lok mumiyo omyero gubed luwiny.—Jo Epeco 6:4; Jo Ibru 12:9-11; Nen Lok me Giko Buk Man me 30.

14, 15. Pingo myero lutino gubed luwiny bot lunyodogi?

¹⁴ Yecu owinyo lok pa Wonne i kare ducu, kadi wa i kare ma onongo pe yot. (Luka 22:42; Jon 8:28, 29) Jehovah bene mito ni lutino guwiny lunyodogi.—Jo Epeco 6:1-3.

¹⁵ Lutino, kadi bed wunongo ni winyo dog lunyodowu obedo gin matek, wiwu opo ni ka in lawiny, Jehovah kacel ki lunyodoni cwinygi bibedo yom i komi. *—Carolok 1:8; 6:20; 23:22-25.

16. (a) I yo ma nining ma Catan temo bito kwede jo matino me timo jami maraco? (b) Pingo pire tek me yero lurem ma gimaro Jehovah?

¹⁶ Larac-ci twero tic ki luremi ki jo matino mukene me bwoli wek itim gin marac. Larac-ci ngeyo maber ni lyeto ma luwotwa keto i komwa cirone twero bedo tek adada. Me labolle, Dina nya pa Yakobo, onongo tye ki lurem ma pe gimaro Jehovah. Man okelo peko madit adada bote ki bot jo ganggi. (Acakki 34:1, 2) Ka luremi pe gimaro Jehovah, gin giromo biti me timo jami ma Jehovah dag, man twero kelo arem  cwiny boti, bot jo gangwu ki bot Lubanga. (Carolok 17:21, 25) Meno aye gin mumiyo pire tek ni inong lurem ma gimaro Jehovah.—1 Jo Korint 15:33.

17. Tic ango ma ngat acel acel me ot tye kwede?

¹⁷ Ka jo me ot ducu gilubo cik pa Lubanga, ci gibwot ki i pekki mapol ata. Pi man, ka in ibedo laco, ter dakoni ki mar. Ka in ibedo dako, wor cwari dok imine i te twerone kun ilubo lanen pa dako ma kicoyo lok i kome i Carolok 31:10-31. Ka in lanyodo, pwony lutinoni me maro Lubanga. (Carolok 22:6) Ka in i wego, medde ki tiro jo me odi i yo “maber.” (1 Temceo 3:4, 5; 5:8) Dok lutino, wuwor lunyodowu. (Jo Kolocai 3:20) Wiwu opo ni, ngat acel acel i ot timo bal, pi meno wubed mwol dok wukwa kica. Ada, Baibul tye ki tira ma Jehovah omiyo bot ngat acel acel me ot.