1, 2. Dano mapol gipenyo lapeny ango?

NINO ki nino wawinyo pi pekki mapol ata ma timme i wi lobo. Me labolle, oyengyeng otugge ki i te nam, ocoro pii ma omwonyo caro mo woko. Laco mo odonyo i kanica ki muduku, ocelo dano ata ci oneko mogo bene. Two kanca oneko dako mo ma meggi lutino abic, ci oweko lutinone gudong niyak.

² Ka peko nyo can ma kit meno opoto, pol pa dano gipenyo ni, “Pingo?” Jo mapol gipenyo pingo lobo-ni opong ki adegadega ki can. Tika dong ipenye ki lapeny man?

3, 4. (a) Lapeny ango ma Kabakuk openyo? (b) Jehovah ogamo lapennye nining?

³ I Baibul, wapwonyo ni kadi wa co ma gubedo ki niye matek i kom Lubanga bene gupenyo kodi lapeny magi. Me labolle, lanebi Kabakuk openyo Jehovah ni: “Pingo imiyo aneno tim maraco kun wanga neno tim aranyi? To-piny ki bwami guruma woko dyere, lweny ki daa ocakke i kabedo ducu.”—Kabakuk 1:3.

⁴ I Kabakuk 2:2, 3, wakwano lagam ma Lubanga omiyo me dok i lapeny pa Kabakuk ki cikkene me yubo jami ma oballe. Jehovah tye ki mar matut pi dano. Baibul waco ni: “En tamo [paro] piwu.” (1 Petero 5:7) Adada, Lubanga dag jami maraco makato wan dano. (Icaya 55:8, 9) Pi meno, kong dong wanyamu lapeny man, Pingo peko onya mapol i wi lobo?

5. Ngo ma pol pa lupwonye dini giwaco i lok madok i kom deno can? Baibul kono pwonyo gin ango?

⁵ Lukwat, padi, ki lupwonye dini pol kare giwacci yub pa Lubanga tye ni dano myero guden can. Mogo giwacci jami ducu ma timme i kwo pa dano, kadi wa maracone nongo dong Lubanga otyeko yubone con dok pe watwero niang pingone. Mukene giwacci jo madito kacel ki litino matino gito wek gubed kacel ki Lubanga i polo. Ento man pe lok ada. Jehovah pe kelo jami maraco i kom dano. Baibul waco ni: “Lubanga pe twero timo gin marac kadi ki acel. Won Twer Ducu pe timo gin mo ma pe tye atir.”—Yubu 34:10.

6. Pingo jo mapol gikok i kom Lubanga pi pekki ducu ma tye i wi lobo?

⁶ Dano mapol gikok i kom Lubanga pi pekki ducu ma tye i wi lobo pien gitamo ni Lubanga aye obedo lalo lobo. Ento kit ma wapwonyo kwede i Dul me 3, lalo lobo kikome obedo Catan Larac-ci.

7, 8. Pingo pekki tye mapol tutwal i wi lobo?

⁷ Baibul wacciwa ni “lobo ducu tye i te loc pa Larac.” (1 Jon 5:19) Lalo lobo man, Catan, obedo ngat mager dok cwinye col. En “labwol dano ma i wi lobo ducu.” (Niyabo 12:9) Jo mapol gilubo kite. Dok meno obedo tyen lok acel mumiyo lobo-ni opong ki bwola, adage, ki tim gero.

⁸ Tye dok tyen lok mukene mumiyo peko tye onya i lobo. I kare ma Adam gin ki Kawa gujemo, gin gukobo bal bot lutinogi. Dok macalo adwogi me bal, dano uno dano luwotgi. Pol kare gimito ni pigi obed tek makato jo mukene. Gilwenyo dok gidiyo luwotgi  tektek. (Latitlok 4:1; 8:9) I kine mukene dano deno can pi “kare kacel ki jami ma gitimme atura.” (Latitlok 9:11, NW) Ka dano tye i kabedo marac i cawa marac, can me gudo kacel ki jami mukene maraco twero timme i kome.

9. Pingo waromo bedo labongo akalakala mo ni Jehovah tye ki tyen lok maber mumiyo en oye ni deno can omedde?

⁹ Jehovah pe kelo peko mo keken i kom dano. Pe myero wakok i kome pi lweny, turo cik, ki tim me dic. Pe Lubanga aye kelo can ma poto atura calo oyengyeng, yamo lapiru mager, ki pii aluka. Ento iromo bedo ki lapeny ni, ‘Ka Jehovah aye dong ngat matek loyo i polo ki lobo, pingo en pe juko timme pa jami maraco ducu?’ Wangeyo ni Lubanga paro piwa mada, pi meno en myero bed ni tye ki tyen lok maber mumiyo en pud oye ni deno can omedde.—1 Jon 4:8.

10. Catan okelo koko ango i kom Jehovah?

¹⁰ I poto me Eden, Larac-ci obwolo Adam gin ki Kawa. Catan omoro koko i kom Lubanga ni obedo Laloc marac. En omedde ki kokone ni Lubanga okano gin mo maber ki bot Adam ki Kawa. Catan onongo mito ni gin gutam ni en etwero bedo laloc maber makato Jehovah dok ni pe gimito Lubanga i kwogi.—Acakki 3:2-5; nen Lok me Giko Buk Man me 27.

11. Lapeny ango ma omyero wanong lagamme?

¹¹ Adam gin ki Kawa gukwero winyo dog Jehovah dok gujemo i kome. Gutamo ni gitye ki twero me moko pigi kengi gin maber ki gin marac. Jehovah onongo twero nyuto nining ni lujemo magi gutimo bal dok en aye engeyo gin maber loyo piwa?

12, 13. (a) Pingo Jehovah pe ojwero Adam ki Kawa cutcut? (b) Pingo Jehovah oye ni Catan obed laloc me lobo man dok ni dano gulone kengi?

 ¹² Jehovah pe ojwero Adam ki Kawa cutcut. Me ka meno, en oye ni gunywal lutino. Ka doki, Jehovah oweko ni lutino pa Adam ki Kawa gubed agonya me yero ngat ma gimito macalo lalocgi. Yub pa Jehovah onongo tye me pongo lobo ki dano ma gipe ki roc, dok meno bicobbe kadi bed Larac-ci pe mito.—Acakki 1:28; Icaya 55:10, 11.

¹³ Catan opyem ki Jehovah i nyim lumalaika milion mapol. (Yubu 38:7; Niyabo 5:11) Pi man Jehovah omiyo Catan kare me nyuto ka adot ma en okelo-ni tye ada. En bene omiyo ki dano kare me temo gamente mapatpat i te loc pa Catan wek gunen ka gitwero lone kengi maber labongo kony pa Lubanga.

14. Kare ma okato-ni onyuto gin ango?

¹⁴ Pi mwaki alip mapol, dano gutemme me lone kekengi, ento pe gutwero. Man onyuto ka maleng ni Catan obedo lagoba. Dano mito kony ma a ki bot Lubanga adada. Lanebi Jeremia oloko lok ada i kare ma en owacci: “Ai Rwot [Jehovah], angeyo ni dano pe loyo kwone kene nio i agikkine; pe tye ngat mo ma tye ki twero me loyo kwone.”—Jeremia 10:23.

15, 16. (a) Pingo Jehovah oweko peko omedde pi kare malac tutwal? (b) Pingo Jehovah pe okwanyo pekki ma Catan okelo?

¹⁵ Pingo Jehovah oweko peko omedde pi kare malac tutwal? Pingo en pe juko timme pa jami maraco? Pien otero kare malac me nyuto ni loc pa Catan pe okelo adwogi maber. Dano dong gutemo gamente  mapatpat ducu ma gitwero, ento pe tye mo ma okelo adwogi maber. Kadi bed ni dongo lobo tye ka timme ma lubbe ki diro me cayan ki tet manyen, can, turo cik, lweny ki tim me ngolo kop alenga tye ka nya i kabedo ducu. Wan dano adana pe watwero lone kenwa labongo kony pa Lubanga.

¹⁶ Jehovah pe okwanyo pekki ma Catan okelo. Ka en otimo meno, ci binyuto ni en cwako loc pa Catan. Dok bene dano twero cako tamo ni gitwero lone kengi kit ma Catan owaco kwede. Ento man obedo lok goba, dok Jehovah pe twero timo gin mo ma miyo dano giye lok goba meno. En pe loko lok goba.—Jo Ibru 6:18.

17, 18. Ngo ma Jehovah bitimone i kom jami ducu ma Catan obalo?

¹⁷ Jehovah tika twero yubo jami ducu ma oballe macalo adwogi me jemo pa Catan ki dano? Eyo. Bot Lubanga jami ducu twere. Jehovah ngeyo awene ma kibicobo pyem ducu pa Catan. I ngeye, en biloko lobo ducu doko paradic, kit ma onongo myero obed kwede con. Jo ducu ma tye i “lyel” kibicerogi. (Jon 5:28, 29) Dano pe dok gibitwo nyo to. Yecu biyubo jami ducu ma Catan obalo. Jehovah bitic ki Yecu me “turo tic pa Catan woko.” (1 Jon 3:8) Watye ki yomcwiny ni Jehovah odiyo cwinye i komwa wek wange en kun wayero en me bedo Lalocwa. (Kwan 2 Petero 3:9, 10.) Kadi bed watye ka limo can, en konyowa me cirone.—Jon 4:23; kwan 1 Jo Korint 10:13.

¹⁸ Jehovah pe diyowa me yero en me bedo Lalocwa. En omiyo bot dano mic me bedo agonya. Kong dong wanenu lok i kom mic ma pire tek man.

19. Mic ma pire tek ango ma Jehovah omiyo botwa? Pingo omyero wabed ki pwoc pi mot man?

¹⁹ Mic pa Jehovah me bedo agonya me moko tamwa weko wabedo pat adada ki lee. Gin gitimo jami ma lubbe ki kit me kwo ma dong tye i remogi, ento wan watwero yero kit ma myero wakwo kwede dok wamoko piwa kenwa ka wamito yomo cwiny Jehovah. (Carolok 30:24) Dok bene, pe watye calo robot ma gilubo yo me timo gin moni keken ci otum. Watye agonya me yero ngat ma myero wabed, jo ma wamito ni gubed luremwa, ki gin ma wamito timone ki kwowa. Jehovah mito ni wanong mit pa kwo.

20, 21. Gin ango ma pud dong ber loyo ma itwero yerone kombeddi?

²⁰ Jehovah mito ni wamare. (Matayo 22:37, 38) En tye calo wego ma cwinye bedo yom ka latinne owacce ni “An amari,” kun waco lok ma a ki i cwinye kene ento pe kidiye adiya ni owaci. Jehovah ominiwa mic me bedo agonya me yero ka wamito tic pire nyo pe. Catan, Adam, ki Kawa guyero me kwero Lubanga Jehovah. In kono ibitic ki mic ma megi me bedo agonya nining?

²¹ Ti ki mic me bedo agonya me tic pi Jehovah. Tye dano milion mapol ma bene gumoko tamgi me yomo cwiny Jehovah kun gikwero Catan. (Carolok 27:11) Ngo ma in itwero timone kombeddi wek ibed tye i lobo manyen pa Lubanga ka en okwanyo pekki woko ducu? Dul ma lubo man bigamo lapeny meno.