1, 2. (a) Ngo ma weko mic moni doko gin ma pire tek boti? (b) Pingo watwero wacone ni ginkok aye obedo mic madit loyo pa Lubanga?

MIC ango maber loyo ducu ma dong inongo i kwoni? Pe ni wel mic moni omyero obed tek ka wek pire obed tek boti. Ka mic moni keli yomcwiny nyo obedo gin ma imito adada, ci ibibedo ki pwoc pire.

² I kin lwagi mic ducu ma Lubanga ominiwa, tye mic acel ma wamito loyo mukene-ni ducu. Obedo mic ma pire tek loyo ma Lubanga omiyo ki dano. I dul man, wabipwonyo ni Jehovah ocwalo Wode Yecu Kricito, ma omiyo kwone macalo ginkok pi dano wek gunong kwo ma pe tum. (Kwan Matayo 20:28.) Cwalo Yecu i lobo onyuto ni Jehovah marowa adada.

3. Pingo dano gito?

³ Ginkok obedo yo ma Jehovah otiyo kwede me laro dano ki i bal ki to. (Jo Epeco 1:7) Me niang gin mumiyo ginkok onongo mitte, omyero wange gin mutimme mwaki alip mapol angec i poto me Eden. Lunyodowa mukwongo, Adam gin ki Kawa gutimo bal. Pi bal ma gutimo-ni, gin guto woko. Wan bene wato pienni walako bal ki bot Adam ki Kawa.—Nen Lok me Giko Buk Man me 9.

4. Adam obedo anga, dok kwo ango ma en onongo tye kwede?

⁴ I kare ma Jehovah ocweyo Adam, laco mukwongo,  Lubanga omiye gin mo ma pire tek adada. En omiyo bot Adam kwo ma roc pe iye. En onongo pe bitwo, tii, nyo to. Kit ma Jehovah aye ocweyo Adam-mi, Lubanga onongo tye calo wonne. (Luka 3:38) Jehovah onongo loko kwede kare ki kare. Lubanga otito ka maleng bot Adam gin ma myero en otim dok omiye tic me atima ma yomo cwinye.—Acakki 1:28-30; 2:16, 17.

5. Tyen lokke ngo ka Baibul wacci Lubanga ocweyo Adam i “kit calle kikome”?

⁵ Lubanga ocweyo Adam i “kit calle kikome.” (Acakki 1:27) Jehovah omiye kit macal ki Mege, ma i kine tye iye mar, ryeko, ngolo kop atir ki teko. En oweko Adam obedo agonya me moko tamme pire kene. Adam onongo pe tye calo gar ma lubo yo ma dong kiyubo woko con. Lubanga ocweye i yo ma en twero yero me timo gin matir nyo marac. Ka onongo Adam oyer me bedo lawiny bot Lubanga, kono en tye kwo wa kombeddi i Paradic.

6. I kare ma Adam okwero winyo dog Lubanga, gin ango ma en orwenyo? Man ogudo kwowa nining?

⁶ I kare ma Adam okwero winyo dog Lubanga ci kingolo to i wiye, en oculo pire ki wel matek. En orwenyo watte macok ki Jehovah, kwone ma roc pe iye, ki pacone me Paradic. (Acakki 3:17-19) Adam gin ki Kawa guyero me kwero winyo Lubanga, pi meno gen mo onongo dong pe pigi. Gin ma Adam otimo-ni oweko “bal yam obino i lobo ka dong to obino pi bal, kit meno bene to onya oromo kin dano ducu, pien dano ducu gubalo.” (Jo Roma 5:12) I kare ma Adam otimo bal, en ‘ocatte’ kacel ki wan lutinone i opii me  bal ki to. (Jo Roma 7:14) Tika dok tye gen mo piwa? Eyo, Jehovah omiyowa ginkok.

7, 8. Ginkok obedo gin ango?

⁷ Ginkok obedo gin ango? Kop i kom ginkok mako tutwalle jami aryo. Mukwongo, ginkok aye wel ma kiculo me gonyo ngat moni nyo dwoko gin moni cen bot rwode. Me aryone, ginkok aye wel ma kiculo ma rwatte ki wel gin moni.

⁸ Pe tye dano mo ma twero culo pi peko madit ma Adam okelo i kare ma otimo bal ci okelo to i kom wan ducu. Ento Jehovah oyabo yo me gonyowa ki i bal kacel ki to. Kong dong wanenu kit ma ginkok otiyo kwede ki kit ma watwero nongo adwogi maber ki iye.

9. Kit ginkok ango ma onongo mitte?

⁹ Pe tye dano mo i kinwa ma onongo twero culo ginkok pi kwo ma roc pe iye ma Adam orwenyo-ni. Pingo? Pien wan ducu watye ki roc. (Jabuli 49:7, 8) Ginkok ma onongo mitte ni kicul-li myero obed dano ma pe ki roc. Baibul waco ni Yecu Kricito “omine kene me bedo gin-kok pi jo ducu.” (1 Temceo 2:6) Kwo ma pe ki roc ma Yecu otyero-ni onongo rom aroma ki kwo ma Adam orwenyo.

10. Jehovah omiyo ginkok nining?

¹⁰ Jehovah omiyo ginkok nining? Jehovah ocwalo Wode ma en maro loyo i lobo. Wode man, ma nyinge Yecu, obedo cwecce mukwongo. (1 Jon 4:9, 10) Yecu oye weko Wonne ki kabedone i polo. (Jo Pilipi 2:7) Jehovah onako kwo pa Yecu ki i polo oketo i i Maliam i lobo kany, ci kinywalo Yecu calo dano ma pe ki roc.—Luka 1:35.

11. Twere nining pi laco acel me bedo ginkok pi dano ducu?

 ¹¹ Adam, laco mukwongo, orwenyo kwo ma roc pe iye pi dano ducu i kare ma en okwero winyo Jehovah. Tika onongo twere pi laco mukene me kwanyo to woko ki i wi lutino pa Adam? Eyo. (Kwan Jo Roma 5:19.) Yecu, ma pe otimo bal mo keken-ni, omiyo kwone ma pe ki roc macalo ginkok. (1 Jo Korint 15:45) Kwone ma pe ki roc-ci onongo twero kwanyo to woko ki i wi lutino pa Adam ducu.—1 Jo Korint 15:21, 22.

12. Pingo Yecu odeno can malit adada?

¹² Baibul tito pi peko malit ma Yecu ociro ma peya oto. Kipwode malit ki lut, kingabe i kom yat ki twon gero, dok kiweke ni oto mot mot ki arem malit. (Jon 19:1, 16-18, 30) Pingo Yecu owok ki i twon can malit kit man? Pien Catan nongo owacci pe tye dano mo ma twero gwoko gennene bot Lubanga ka orwatte ki atematema magwar. Yecu onyuto ni dano ma pe ki roc twero gwoko genne bot Lubanga kadi bed okat ki i peko malit adada. Tam kong kit ma Jehovah obedo kwede ki awaka i kom Yecu!—Carolok 27:11; Nen Lok me Giko Buk Man me 15.

13. Kiculo ginkok-ki nining?

¹³ Kiculo ginkok-ki nining? Kiculo i kare ma Yecu odok cen bot Wonne i polo. I mwaka 33, i nino dwe 14 me Nican i kalenda pa Lujudaya, Jehovah oye ni lumone pa Yecu guneke woko. (Jo Ibru 10:10) I nge nino adek, Jehovah ocero Yecu, pe macalo dano adana ento macalo cwec me cwiny. Ento, Yecu pe orwenyo twerone me kwo macalo dano ma pe ki roc i wi lobo. Lacen i kare ma Yecu odok cen bot Wonne i polo, en omiyo twero man bot Lubanga wek Lubanga oti kwede me  koko lutino pa Adam. (Jo Ibru 9:24) Jehovah ojolo ginkok man, oweko watye ki kare me gonye ki i opii me bal ki to.—Kwan Jo Roma 3:23, 24.

14, 15. Omyero watim gin ango wek kiwek balwa?

¹⁴ Dong watye ka nongo adwogi maber pi mic madit man. Kong dong wanenu adwogi maber ma wanongo pi mic man i kareni ki i anyim.

¹⁵ Kiweko balwa. Tek tutwal me timo gin matir kare ducu. Wan ducu watimo bal, dok i kare mukene wawaco nyo watimo gin marac. (Jo Kolocai 1:13, 14) Kitwero weko balwa nining? Myero wangut pi timo gin marac dok wakwa Jehovah ki mwolo ni otimwa kica. Ka watimo kit meno ci watero bedo ki gen ni balwa dong kiweko woko.—1 Jon 1:8, 9.

16. Gin ango ma myero watim wek wabed ma cwinywa pe pidowa?

¹⁶ Watwero bedo ma cwinywa pe pidowa. Ka cwinywa pidowa ni watimo gin mo marac, lewic makowa dok wawinyo calo konywa pe. Ento pe omyero wail cingwa woko. Ka walego Jehovah ni owek balwa, watwero bedo ki gen ni en biwinyo legawa dok bitimiwa kica. (Jo Ibru 9:13, 14) Jehovah mito ni walok bote pi peko ki goro mo keken ma watye kwede. (Jo Ibru 4:14-16) Macalo adwogine, watwero bedo ki kuc ki Lubanga.

17. Mot ango ma tye piwa pien ni Yecu oto piwa?

¹⁷ Watye ki gen me bedo kwo pi naka. “Mucara me bal en to, ento mot ma Lubanga miyowa nono, en aye kwo ma pe tum i Yecu Kricito Rwotwa.” (Jo Roma 6: 23) Watwero bedo kwo pi naka ma komwa yot pien Yecu oto piwa. (Niyabo 21:3, 4) Ento ngo ma myero watim ka wamito ni wanong mot man?

18. Wangeyo nining ni Jehovah marowa?

¹⁸ Tam kong kit ma cwinyi bedo yom kwede ka ngat mo omini mic maber. Ginkok aye mic ma pud dong pire tek loyo ducu, dok omyero wabed ki pwoc bot Jehovah pi mic man. Jon 3:16 wacciwa ni “Lubanga con omaro lobo kumeno, omiyo iye Wode acel keken.” Adada, Jehovah marowa tutwal mumiyo en ojalo Wode me amara, Yecu, piwa. Wangeyo bene ni Yecu marowa mada, pien oye miyo kwone me to piwa. (Jon 15:13) Mic me ginkok myero owek ibed ki gen ni Jehovah ki Yecu gimaro in adada.—Jo Galatia 2:20.

19, 20. (a) Itwero doko larem Lubanga nining? (b) I yo ango ma itwero nyuto ni itye ki niye i kom ginkok pa Yecu?

¹⁹ Kit ma dong ipwonyo lok i kom mar madit pa Lubanga-ni, itwero doko lareme nining? Pe yot me maro ngat ma pe ingeyo. Jon 17:3 waco ni watwero ngeyo Jehovah. Ka itimo man ci mar-ri pi en bidongo, ibibedo ki miti me yomo cwinye dok ibidoko lareme. Pi man medde ki pwonyo lok i kom Jehovah ki kwano Baibul.—1 Jon 5:3.

²⁰ Ket niye i kom tyer me ginkok pa Yecu. Baibul waco ni “dano ma ye Wod tye ki kwo ma pe tum.” (Jon 3:36) Bedo ki niye tyen lokke ngo? Te lokke gonye ni myero watim gin ma Yecu opwonyowa me timone. (Jon 13:15) Waco ki dogwa keken ni watye ki niye i kom Yecu pe romo. Omyero watim gin mo me  nyuto niyewa. I Yakobo 2:26 wakwano ni: “Niye ka pe giketo i tic, nongo dong oto woko.”

21, 22. (a) Pingo omyero wabed tye i kwero Nipo me to pa Yecu mwaka ki mwaka? (b) Ngo ma wabinyamone i Dul me 6 ki 7?

²¹ Bed tye i Nipo me to pa Yecu. Otyeno ma peya Yecu oto, en opwonyowa ni myero wapo pi tone. Kwer man watimo mwaka ki mwaka, dok kilwongo ni Nipo nyo “Cam [me Otyeno] pa Rwotwa”. (1 Jo Korint 11:20; Matayo 26:26-28) Yecu mito ni wiwa opo ni en omiyo kwone ma pe ki roc piwa me kokowa. En owacci, “wutim kuman me po pira. (Kwan Luka 22:19.) Ka ibedo tye pi kwer me Nipo, inyuto ni wi po i kom ginkok kacel ki mar madit ma Jehovah ki Yecu gunyuto piwa.—Nen Lok me Giko Buk Man me 16.

²² Ginkok obedo mic ma pud dong dit loyo ma watwero nongone. (2 Jo Korint 9:14, 15) Mic ma pire tek man bikonyo kadi dano milion mapol ata ma dong guto woko. Dul me 6 ki 7 bitito kit ma man twere kwede.