KIT ME CAKO LOK
PWONY ME 4
Bed Mwol
Cik ma iye lac: “Wubed ki mwolo, kun dano acel acel woro lawote macalo ngat madit loye.”—Pil. 2:3.
Gin ma Paulo Otimo
1. Nen VIDIO, nyo kwan Tic pa Lukwena 26:2, 3. I nge meno, tam i kom lapeny magi:
-
Paulo onyuto mwolo nining i yo ma en oloko kwede ki Kabaka Agripa?
-
I yo ma nining ma Paulo oywayo kwede tam pa dano i kom Jehovah kacel ki Ginacoya ento pe i kome kekene?—Nen Tic pa Lukwena 26:22.
Pwony Ango ma Wanongo ki Bot Paulo?
2. Kwenawa twero gudo cwiny dano ka waloko ki mwolo dok ki woro.
Lub Lanen pa Paulo
3. Pe ilok i yo me cac. Gwokke ki nyutte ni ingeyo jami ducu dok ni ngat ca pe ngeyo gin mo keken. Lok kwede i yo me woro.
4. Nyut ka maleng ni lok ada ma itye ka pwonyone a ki i Baibul. Lok pa Lubanga twero gudo tam pa ngat moni kacel ki kit ma en winyo kwede. Ka watiyo kwede, ci wabikonyo dano me dongo niye i kom Lok pa Lubanga ento pe i kom lokwa.
5. Bed ma komi opye mot. Pe ibed ka tute me nyuto ni lokki aye tye kakare. Pe wamito pyem ki dano. Nyut mwolo kun ibedo ma komi opye mot dok inge kare mupore me a woko. (Car. 17:14; Tito 3:2) Gamo lok i yo me mwolo twero weko doggola dong twolo pi nyamo lok ki dano meno i nino mukene.
