1-3. (a) Pingo min latin neno ni latinne obedo maber dok maleng? (b) Pingo Jehovah mito ni jo ma wore gubed leng, dok ngo ma cuko cwinywa me bedo leng?

MIN latin yubo latin ka gimito cito ka mo. En neno ni kilwoke dok kirukke bongi maleng. En ngeyo ni lengo pire tek tutwal pi yot kome. En bene ngeyo ni kit ma latinne nen kwede nyutu kit lanyodo ango ma en ebedo.

² Wonwa me polo Jehovah, mito ni luticce gubed leng. Lokke waco ni: “Ngat ma bedo leng in bene ibedo leng bote.” * (Jabuli 18:26, NW) Jehovah marowa; dok en ngeyo ni gwoko lengo pire tek botwa. En bene mito ni wan macalo Lucadenne omyero wawek jo mukene gulok maber  i kome. Ada, lengo me komwa kacel ki ber kitwa kelo deyo ento pe lewic i kom Jehovah ki nyinge maleng-ngi.—Ejekiel 36:22; kwan 1 Petero 2:12.

³ Ngec ma watye kwede ni Lubanga maro jo maleng-ngi, cuko cwinywa tutwal me bedo leng. Wamito ni yo me kwowa okelle deyo pien wamarre. Wamito bene ni wabed i marre. Pi meno, kong dong wangiyu gin mumiyo omyero wabed leng, gin ma bedo leng kwako, ki dok kit ma waromo bedo leng kwede. Ngine ma kit meno romo konyowa me neno kakwene ma omyero wayubbi ka ce tye.

4, 5. (a) Tyen lok ma pire tek ango mumiyo omyero wabed leng? (b) Lengo pa Jehovah nen nining i cwecce?

⁴ Yo acel ma Jehovah telowa kwede obedo lanene. Lokke cuko cwinywa me ‘lubu kit pa Lubanga.’ (Jo Epeco 5:1) Man aye tyen lok ma pire tek mumiyo omyero wabed leng: Jehovah, Lubanga ma waworo-ni leng i yo ducu.—Kwan Lulevi 11:44, 45.

⁵ Kit pa Jehovah me lengo, calo kite mukene mapol-li nen i cwecce. (Jo Roma 1:20) Lobo kiyubo me bedo paco maleng pa dano. Jehovah oketo lobo i yo ma weko luro yamo kacel ki pii gibedo maleng. Lobo tye ki teko me lonye kekene me doko leng. Dong, nen ka maleng ni lengo pire tek bot ngat ma “Oketo lobo.” (Jeremia 10:12) Pire myero obed tek botwa bene.

6, 7. I yo ma nining ma Cik pa Moses onyutu matek tutwal ni lengo mitte pi jo ducu ma giworo Jehovah?

⁶ Tyen lok mukene mumiyo omyero wabed leng aye ni Jehovah, ma obedo Lalocwa-ni mito ni jo ma wore myero gubed leng. I te Cik ma Jehovah omiyo bot jo Icrael, lengo ki woro onongo pe gipokke. Cik man onongo mito ni i Nino me Kwanyo Bal, lalamdog madit omyero  olwoke kiryo ento pe kicel keken. (Lulevi 16:4, 23, 24) Lulam dog ma gubityero tyer onongo mitte ni omyero kong gulwok cinggi ki tyengi ma peya gutyero tyer bot Jehovah. (Nia 30:17-21; 2 Tekwaro 4:6) Cik man oryeyo jami ma romo 70 kulu ma kelo cilo me kom dok weko ngat moni bedo keni. Ka Laicrael moni pe leng, en pe nywako i woro—ka onywako i woro ci kine mukene kingole to. (Lulevi 15:31) Dano mo keken ma kwero lubu yo me lonye man, ma tye iye lwoko kome ki bongine-ni, omyero ‘wange orweny woko ki i dye lwak pa Lubanga.’—Wel 19:17-20.

⁷ Kadi bed wan wape i te Cik pa Moses, ento cik meno olo miniwa ngec i kom kit ma Lubanga tamo kwede i kom jami mogo. Ada, Cik-ki onongo nyutu matek tutwal ni lengo mitte pi jo ducu ma giworo Lubanga. Jehovah peya olokke. (Malaki 3:6) En pe bijolo worowa wang ma nongo tye ‘maleng dok cilo pe iye.’ (Yakobo 1:27) Dong omyero wange ngo ma en mito ki botwa.

8. I yo mapat pat ango ma Jehovah mito ni wabed leng?

⁸ I Baibul, bedo leng pe tere ni bedo leng i kom keken. Bedo leng i wang Lubanga gudu kit yo me kwowa ducu. Jehovah mito ni wabed leng i yo angwen mapat pat—i yo me cwiny, i kitwa, i tamwa, ki dong komwa. Kong wanenu ngo ma lengo man kwako ki acel acel.

9, 10. Te lokke ngo me bedo leng i yo me cwiny, dok Lukricitayo me ada gigwokke ki i kom gin ango?

⁹ Lengo me cwiny. Bedo leng i yo me cwiny pe mito rubo woro me ada ki me goba. I kare ma Jo Icrael gua ki i Babilon me dok cen i Jerucalem, onongo mitte ni gin gulub cik man: “Wua woko ki kunu, pe wugud gin mo ma kome ki keni; . . . wulonnye kekenwu.” (Icaya 52:11) Luicrael  onongo gitye ka dok paco tutwalle pi roco woro me ada pa Jehovah. Worogi onongo omyero obed leng—ma pe orubbe ki pwony, tim ki kwer me dini pa jo Babilon ma pe kelo deyo i kom Lubanga.

¹⁰ Wan macalo Lukricitayo me ada i kare-ni, omyero wagwokke pe me nyobe ki woro goba. (Kwan 1 Jo Korint 10:21.) Kakany, gwokke mitte tutwal pien pwony pa dini goba oromo kabedo ducu. I lobe mapol, tekwaro, tic, kacel ki kwer mapol kubbe ki pwony me dini goba, calo tam ni tye gin mo i i dano ma pe to. (Latitlok 9:5, 6, 10) Lukricitayo me ada gigwokke ki i kom kwer mogo ma kubbe ki niye me dini goba. * Pe waye lyeto ma jo mukene giketo i komwa me dwalo tyenwa ki i lubu rwom me woro maleng me Baibul.—Tic pa Lukwena 5:29.

11. Bedo leng i yo me kwowa kwako gin ango, dok pingo mitte ni wabed leng i yo ma kit man?

¹¹ Lengo i kwowa. Bedo leng i kwowa kwako kwero kit tim me tarwang mo keken. (Kwan Jo Epeco 5:5.) Pire tek ni omyero wabed leng i kwowa. Kit ma wabineno kwede i dul ma lubu man i buk-ki, omyero ‘wabol tim tarwang woko,’ wek wabed i mar pa Lubanga. “Ker pa Lubanga pe bibedo” pa lutim tim tarwang ma gipe ki cwiny me ngut. (1 Jo Korint 6:9, 10, 18) I wang Lubanga, jo ma kit meno gitye i kin dano ma gubedo “lutim tim mogo me kwer.” Ka pe gubedo leng i kwogi ci “gibinongo mot ma gipoko botgi . . . meno aye to me aryo.”—Niyabo 21:8.

12, 13. Kit wat ango ma tye i kin tam ki tic, dok waromo bedo leng i tamwa nining?

¹² Lengo i tamwa. Tam aye tero ngat moni i timo gin moni. Ka ce wanyebo tam maraco me bedo i wiwa ki i cwinywa, ci pe warii ki timo jami macilo. (Matayo 5: 28; 15:18-20) Ento ka ce wapongo tamwa ki jami mabeco maleng, ci romo konyowa me gwoko kitwa me bedo maleng. (Kwan Jo Pilipi 4:8.) Waromo bedo leng i tamwa nining? Gin acel ma myero wagwokke ki i iye aye galowang mogo ma romo cido tamwa. * Medo i kom meno, waromo pongo tamwa ki jami mabeco ki kwano Lok pa Lubanga kare ki kare.—Jabuli 19:8, 9.

¹³ Wek wabed i mar pa Lubanga, pire tek ni omyero wabed leng i yo me cwiny, kitwa, ki tamwa. Yo me lengo magi kinyamogi matut i dul mukene ma tye i buk man. Kong dong wanenu yo me angwenne—lengo me kom.

14. Pingo lengo pe obedo gin ma kwako ngat moni kene?

¹⁴ Lengo me kom kwako gwoko komwa kacel ki jamiwa me bedo maleng. Lengo ma kit man mono obedo gin ma kwako ngat acel acel, ma ngat mukene pe myero oridde iye? Meno pe twere ki tung bot luwor Jehovah. Kit ma dong watyeko nenone kwede, lengowa pire tek bot Jehovah pe ni pien ber pi wan keken ento pien ni gudu kome bene. Tam kong i kom lapor ma kimiyo i acakki-ni. Pol kare neno latin ma kome cilo nyo ma pe kiruko maber weko iuru kit lanyodone mada, pe kumeno? Pe wamito ni gin mo keken ma dok i kom kit ma wanen kwede nyo yo me kwowa okel lewic i kom Wonwa me polo nyo odwo wi dano woko ki lok me kwena ma watito. Lok pa Lubanga wacci: “Wan pe wamito waket ariya mo i yo pa ngat mo, wek dano pe guwac ni ticwa rac; ento i kare ducu wanyuto berwa kenwa macalo lutic pa Lubanga.” (2 Jo Korint 6:3, 4) Dong, wan waromo bedo ma nongo komwa leng nining?

15, 16. Gwoko lengo maber kwako gin ango, dok bongi ma waruko myero obed nining?

 ¹⁵ Lengo me komwa ki kit ma wanen kwede. Kadi bed ni tekwaro kacel ki kit ma dano kwo kwede opokke i lobe acel acel, ento pud waromo nongo cabun ki pii lwok kare ki kare, ki dok me nenone ni wan kacel ki lutinowa wabedo maleng. Gwoko lengo maber tye iye lwoko cingwa ki cabun ma peya wacamo nyo wagudu gin acama, i nge tic ki coron, i nge lwoko nyo loko bongo pa latin. Lwoko cing ki cabun romo konyo me gengo two dok gwoko kwo. Romo gengo nya pa kwidi mogo maraco ma kelo two, pi meno konyo dano weko pe ginongo two cado. I lobe ma odine pe gitye ki coron me pii i igi, konye omyero kiyik woko i ngom kit ma onongo kitimo kwede i Icrael i kare ca.—Nwoyo Cik 23:12, 13.

 ¹⁶ Bongiwa bene omyero walwok obed maleng kare ki kare dok obed ma nen maber. Pe tye ni bongo pa Lakricitayo myero wele obed tek nyo obed bongo ma cital-le pud odonyo adonya nyen, ento myero obed leng dok mupore. (Kwan 1 Temceo 2:9, 10.) Ka mo keken ma watye iye, wamito ni kit ma wanen kwede ‘omi pwony pa Lubanga Lalarwa onen ma mwonya.’—Tito 2:10.

17. Pingo gangiwa kacel ki jami ma iye omyero gubed maleng dok ma nen maber?

¹⁷ Gangiwa ki jamiwa. Oromo bedo ni gangiwa pe tye ki jami ma welgi tego, ento omyero obed maleng dok ma nen maber kit ma kerowa twero kwede. I yo acel-lu bene, ka ce watiyo ki gin wot mo keken me cito i cokke nyo i tic me pwony, omyero wanen ni obedo maleng. Wiwa omyero pe owil ni gang maleng kacel ki jami ma iye ducu miyo caden. Pien ka ineno, wapwonyo dano ni Jehovah obedo Lubanga maleng dok ni en ‘bikelo agikki i kom jo ma tye ka balo lobo,’ ki ni Kerre cokcok-ki biloko lobo doko paradic. (Niyabo 11:18; Luka 23:43) Ada, wamito ni gangiwa kacel ki jami ma iye myero onyut bot jo mukene ni watye ka dongo kit ma rwatte pi lobo manyen ma tye ka bino-ni.

18. Waromo nyutu woro pi Ot me Ker nining?

¹⁸ Kabedo me worowa. Marwa pi Jehovah cwalowa me bedo ki woro i kom Ot me Ker, ma obedo kabedo me woro me ada. Ka jo manyen gubino iye wamito ni gulok maber i kom kabedo me cokkewa. Wek obed ma neno mit, omyero kiyub obed maleng dok kiroc ka ma oballe kare ki kare wek obed mamwonya. Wanyutu woro pi Ot me Ker ki timo gin ducu ma watwero me gwokone wek obed maleng. Obedo mot madit me dyero karewa me konyo yubo kabedo me worowa wek obed maleng nyo ‘roco ka ma oballe.’ (2 Tekwaro 34:10) Cik magi bene tiyo ka ce  warwatte i Ot me Gure nyo kabedo mukene ma gure matino ki madito timme iye.

19. Me gwoko komwa wek obed maleng, ngo ma omyero wakwer, dok Baibul konyowa nining iye?

¹⁹ Me gwoko komwa wek wabed maleng, omyero wakwer tim mogo ma cidowa, calo mato taa, tic ki kongo i yo marac, ki dong tic ki jami mogo calo jayigi-gu ma gigwenyo wi dano. Baibul pe otuco atir jami ducu ma cidowa ki nyingi kacel ki tim mogo ma onya i kin piny i kare-ni, ento tye ki pwony ma konyowa me niang kit ma Jehovah neno kwede jami magi. Marwa pi Jehovah cwalowa me kwanyo yo ma miyo wanongo cwakke pien wangeyo tamme. Kong wanenu pwony abic ma tye i Ginacoya.

20, 21. Jehovah mito ni wabed agonya ki i kom tim mene, dok tyen lok ango ma pire tek ma omiyo myero walubi?

²⁰ “Wun ma amaro, cikke meno yam giciko piwa. Myero walonnye woko kekenwa i gin mo ducu ma cido komwa nyo cwinywa, kun walworo Lubanga, wek wadoku jo maleng atikatika.” (2 Jo Korint 7:1) Jehovah mito ni wagonye ki i kom tim mogo ma wolo komwa dok balo cwinywa, nyo doro tamwa. Omyero wakwer tic ki jami mogo ma romo weko wadoko opiigi kun nongo wangeyo ni balo yot komwa ki tamwa.

²¹ Baibul miniwa tyen lok mucwiny ma omiyo omyero ‘walonnye woko kekenwa i gin mo ducu ma cidowa.’ Nge ni 2 Jo Korint 7:1 waco ni: “Cikke meno yam giciko piwa.” Cikke ango? Kit ma kitito kwede i tyeng mogo malo, Jehovah ocikke ni: “Abijolowu, abibedo wonwu.” (2 Jo Korint 6:17, 18) Tam kong: Jehovah ocikke me gwoki ki dok me nyutti mar kit ma wego maro kwede awobe  nyo anyiragi. Ento Jehovah bicobo cikke magi keken ka ikwero cilo me ‘kom ki me cwiny.’ Bedo twon mingo tutwal ka ce waweko kit nyo tim mogo maraco me balo watwa macok ma watye kwede ki Jehovah!

22-25. Pwony mene me Ginacoya ma romo konyowa me kwero tim ki kit mogo ma cidowa?

²² ‘Mar Jehovah Lubangani ki cwinyi ducu, ki kwoni ducu, ki tammi ducu.’ (Matayo 22:37) Yecu owaco ni cik man aye pud dong dit loyo. (Matayo 22:38) Jehovah pore me nongo mar ma kit meno ki botwa. Wek wamarre ki cwinywa, kwowa, kacel ki tamwa ducu, omyero wakwer tim mogo ma romo giko kwowa macek nyo dwoko piny kero me tam ma wanongo ki bot Lubanga.

²³ “[Jehovah] miyo kwo ki dano ducu wa ki yweyo ki jami ducu.” (Tic pa Lukwena 17:24, 25) Kwo obedo mic mua ki bot Lubanga. Wamaro ngat Mumiyo-ni, dok wamito ni wanyut woro pi mic man. Wakwero kit nyo tim mo keken ma balo yot komwa, pien wangeyo ni tim ma kit meno nyutu cac pi mic me kwo.—Jabuli 36:9.

²⁴ “Mar lawoti macalo imarre keni.” (Matayo 22:39) Tim ma cido dano kacel ki kit maraco pe gudu ngat ma timo-ni keken, ento gudu wa jo macok kwede bene. Me labolle, ywayo ito taa twero kelo two wa i kom jo ma pe gimato taa. Ngat ma wano jo macok kwede nongo tye ka turo cik pa Lubanga ma wacci omyero wamar luwotwa. Ticce nongo nyutu ni en pe maro Lubanga kadi bed ni tuco ki doge.—1 Jon 4:20, 21.

²⁵ “Po wigi ducu me mine kengi i te loc pa luloc, ki wegi twer, me bedo ki winy.” (Tito 3:1) I lobe mapol, gwoko nyo tic ki jami calo jayigi-ni obedo turo cik. Macalo Lukricitayo me ada, omyero pe wagwok nyo wabed ki kodi jami magi ma cik okwero-ni.—Jo Roma 13:1.

26. (a) Wek wabed i mar pa Lubanga, omyero watim gin ango? (b) Pingo bedo leng i wang Lubanga obedo yo me kwo ma pud dong ber loyo?

 ²⁶ Wek wabed i mar pa Lubanga, omyero wabed leng, pe i kabedo acel nyo aryo keken ento i yo ducu. Kwero lajwac tic ki tim mogo ma cidowa kare mukene pe yot, ento twere. * Ada, man aye pud dong yo me kwo maber loyo, pien Jehovah kare ducu pwonyowa wek wanong adwogi maber. (Kwan Icaya 48:17.) Ma dong pire tek loyo aye, ka ce wabedo leng, ci wabibedo ki yengo ma bino ki i ngeyo ni watye ka kelo deyo i kom Lubanga ma wamaro-ni, man weko wabedo i marre.